InfoHub Logo

بۇگىن ق ر پارلامەنتى ءماجىلىسى وتىرىسىندا ءمۇعالىم مارتەبەسىن ارتتىرۋ ماسەلەسى تالقىلانىپ جاتىر. ءبىلىم جانە عىلىم ۆيسە-مينيسترى اسحات ايماعامبەتوۆ بۇل ماسەلەنى شەشۋدى ەڭ الدىمەن ولاردىڭ ەڭبەكاقىسىن كوتەرۋدەن باستاۋدى وڭ سانايدى، دەپ حابارلايدى Baq.kz.

مينيسترلىك ۇستاز مارتەبەسى باستى ماسەلەلەردىڭ ءبىرى ەكەنىن جاسىرمايدى جانە ۆەدومستۆا الدىندا ءبىرقاتار ءىس-شارالار بارىن ايتادى. ەڭ ءبىرىنشى – جالاقىنى كوتەرۋ ماسەلەسى.

«بيىل جاڭارتىلعان ءبىلىم بەرۋ مازمۇنىنا كوشكەن بارلىق ءمۇعالىمنىڭ جالاقىسىن كوتەرۋ قابىلداندى. 1، 2، 5، 7 سىنىپ مۇعالىمدەرى، 2018-2019 وقۋ جىلى، ياعني قىركۇيەكتە 3، 6، 8 سىنىپ جاڭارتىلعان مازمۇنعا كوشەدى، وسى سىنىپتارعا ساباق بەرەتىن مۇعالىمدەردىڭ ەڭبەكاقىسى ەلباسىنىڭ تاپسىرماسىمەن 30%-عا ارتادى. بۇگىندە ۇكىمەت وزگەرىستەر ەنگىزدى، ول جاڭا جۇيە بويىنشا سانات الاتىن مۇعالىمدەردىڭ ەڭبەكاقىسىن 30%-دان 50%-عا دەيىن ارتتىرۋ جوسپارلانىپ وتىر»، - دەدى ۆيسە مينيستر.

ونىڭ ايتۋىنشا ەلىمىزدە ورتا ءبىلىم بەرۋ مەكەمەلەرىندە 285 996 پەداگوگ جۇمىس ىستەيدى. 1991 جىلمەن سالىستىرعاندا پەداگوگتاردىڭ ساپالىق قۇرامى ايتارلىقتاي جاقسارعان.

«جىلدان جىلعا جوعارى ءبىلىمى بار مۇعالىمدەر سانىنىڭ ءوسۋ ءۇردىسى بايقالادى. مىسالى مۇعالىمدەردىڭ جالپى سانىنان جوعارى ءبىلىمدى مۇعالىمدەردىڭ ۇلەسى 1991 جىلى 66%، بۇگىندە 90%-دى قۇرايدى، سونىڭ ىشىندە جوعارى ساناتتاعى مۇعالىمدەر ۇلەسى - 51%. پەداگوگ-ماگيسترلەر سانى 2014 جىلى 1800 بولسا، بۇگىندە ءبىلىم بەرۋ مەكەمەلەرىندە 4 مىڭعا جۋىق ماگيسترلەر جۇمىس ىستەيدى، ياعني ەكى ەسە ارتقان. جىل سايىن ورتا ەسەپپەن 10 مىڭنان استام جاس مامان كەلەدى»، - دەپ ۆيسە-مينيستر ەلىمىزدەگى مۇعالىمدەر ستاتيستيكاسىنا توقتالىپ ءوتتى.

---