InfoHub Logo

عالىمدار جەكسۇرىن ادامداردىڭ مانساپ جولىندا نەلىكتەن تابىسقا ءجيى كەنەلەتىنىن انىقتاپتى. شىن مانىندە ونىڭ سەبەبى قاراپايىم ماسەلەدە.

تاريحتا جەكسۇرىنداردىڭ، وزبىر جانە قىرسىق ادامداردىڭ مانساپ جولىندا كەرەمەتتەي جەتىستىككە جەتكەنىنەن تالاي مىسال كەلتىرۋگە بولادى. ويعا ءبىرىنشى بولىپ كەلەتىنى -  ستيۆ دجوبس (Steve Jobs)، ونىڭ جەتەكشىلىگىنىڭ كەزىندە Apple بانكروتقا ۇشىراۋدان امان قالدى جانە الەمدەگى ەڭ تابىستى كومپانيانىڭ ستاتۋسىن الدى.

دجوبس ارىپتەستەرىمەن قارىم-قاتىناسقا تۇسكەندە وزبىر، قىرسىق بولعان، ولاردىڭ جۇمىسى تۋرالى ادىلەتسىز سىن ايتىپ، تيىسە سولەپ، قارعىس تا ايتاتىن بولعان. ءبىراق بۇعان قاراماستان ونىڭ جەتەكشىلىگىندەگى كومپانيا الپاۋىتتاردىڭ بىرىنە اينالدى.

قىرسىق ادامدار سىپايى ادامدارعا قاراعاندا اقىلدى، جاڭاشىل بولۋىنا بايلانىستى تابىسقا ءجيى جەتەدى دەپ ويلاۋىڭىز دا مۇمكىن، الايدا جاڭا جۇرگىزىلگەن زەرتتەۋلەر بۇل تەوريانى جوققا شىعاردى.

شىن مانىندە جاعىمسىز ادامدار ءوز يدەيالارىن وزگەلەرگە قاراعاندا جۇزەگە اسىرماي تىنبايدى ەكەن، ولار كوپشىلىكتىڭ قولداۋىن تاپپاسا دا، كوپشىلىكتىڭ قالىپتاسقان كوزقاراسىنا سايكەس كەلمەسە دە ءوز دەگەنىن ىستەيدى.

بريتانيالىق پسيحولوگيا قوعامىنىڭ رەسمي بلوگىندا جاريالانعان زەرتتەۋدە عالىمدار سەميۋەل حانتەر (Samuel Hunter) جانە ليلي كۋشەنبەرري (Lily Cushenberry) جاعىمدى دەپ سيپاتتاۋعا كەلمەيتىن ادامداردى قاساقانا تاڭداپ العان. بۇل زەرتتەۋگە اشۋشاڭ، مەنمەن، قىرسىق جانە اينالاسىنداعىلارعا جاۋگەرشىلىكپەن قارايتىن ادامدار كىرگەن.

باستاپقىدا جوعارعى كۋرستارداعى 200-گە جۋىق ستۋدەنت تۇلعالىق سيپاتتى زەرتتەۋگە باعىتتالعان تەستىلەۋدەن وتەدى. ستۋدەنتتەردەن ۋنيۆەرسيتەتكە تۇسەر كەزدە تاپسىرعان وزدەرىنىڭ ورتاشا باللدارى مەن اكادەميالىق باعالاۋ تەستىنىڭ مالىمەتى سۇرالعان. وسىلايشا، زەرتتەۋشىلەر ولاردىڭ تانىم قابىلەتتەرى مەن وقۋداعى جەتىستىكتەرىن باعالاعان.

سودان كەيىن ءاربىر ستۋدەنتكە جەكە تاپسىرمادان بەرگەن: ولار 10 مينۋت ىشىندە بەرىلگەن ماركەتينگ پروبلەماسىنىڭ شەشىمىن ۇسىنۋ كەرەك بولعان. كەلەسى كەزەڭدە زەرتتەۋشىلەر ءۇش ستۋدەنتتەن توپتاستىرىپ، بىرلەسە وتىرىپ، ماركەتينگ جوسپارىن 20 مينۋتتا قۇرۋلارىن سۇراعان.

جوسپارلانعانداي-اق، جەكە تاپسىرمانى ورىنداۋ كەزىندە «جاعىمسىزدىقپەن» ەشقانداي دا ماسەلە تۋىنداماعان. الايدا، توپتارعا بولىنگەن كەزدە مىنەزى اۋىر ستۋدەنتتەردىڭ يدەيالارى توپتىق جوسپاردىڭ نەگىزى بولعان.

تاجىريبەنىڭ ەكىنشى كەزەڭىندە زەرتتەۋشىلەر جاعىمسىز ادامداردىڭ بەلگىلى ءبىر ومىرلىك جاعداياتتارعا تاپ بولعاندا ديسكومفورتتى قالاي سەزەتىنىن انىقتاعىسى كەلەدى. بۇل جولى سىنالۋشىلاردىڭ سانى 300-گە جەتكەن، ولارعا ۋنيۆەرسيتەتكە سىيلىق ويلاپ تابۋ تاپسىرىلعان. قىزدار مەن جىگىتتەردى كومپيۋتەر الدىندا بىر-بىرلەپ وتىرعىزعان، ولار ونلاين-چاتتاعى ەكى اداممەن بايلانىسقا ءتۇسۋى ءتيىس. تاجىريبەگە قاتىسىپ جاتقاندار چاتتا كىممەن سويلەسىپ جاتقانىن بىلمەگەن، ال ولار زەرتتەۋشىلەردىڭ تاعى ءبىر تاپسىرماسىن ورىندايتىن ادامدار بولعان: سىنالۋشىلاردىڭ سىيلىق تاڭداۋ تۋرالى يدەيالارىنا قۇپتاۋ نەمەسە كەلىسپەۋ تۋرالى شەشىمدەرىن ايتۋى كەرەك.

ۋنيۆەرسيتەتكە بەرىلەدى دەگەن سىيلىق تۋرالى سىناق اياقتالعاننان كەيىن، تاعى ءبىر تاپسىرما جۇكتەلەدى: بولاشاقتا جاتاقحانالارداعى بولمەلەردىڭ قانداي بولاتىنى جايلى بىرنەشە نۇسقا ۇسىنۋ. مۇندا دا چاتتاعى ەكى ادام عالىمداردىڭ ايتقانىن ورىنداۋ ءۇشىن وتىرعىزىلعان. ءبىراق بۇل جولى ولار سىنالۋشى ستۋدەنتتەرگە ءوز يدەيالارىن دا ايتا الاتىن بولادى، بۇل كەرى بايلانىس قىزمەتىن اتقاردى.

ءبىرىنشى تاجىريبەنىڭ ناتيجەسى ەكىنشىسىنىڭ ناتيجەسىمەن بىردەي بولىپ شىقتى... ستۋدەنتتەر ءوز بەتىمەن يدەيا ويلاپ جاتقاندا جاعىمسىز مىنەز ارالاسپادى. ال اڭگىمەلەسۋشىلەر ءوز پىكىرلەرىن ايتىپ، سىناي باستاعاندا، سىنالۋشىلار ءوز نۇسقالارىنان قايتپاعان. 

بۇل زەرتتەۋلەر بويىنشا، جاعىمسىز ءارى قىرسىق ادامدارعا سىن اسەر ەتپەيدى، كەرىسىنشە، ءوز دەگەندەرىنىڭ دۇرىستىعىنا كوزدەرىن جەتكىزەدى ەكەن. مەحانيزم كەرىسىنشە دە جۇمىس ىستەيدى: جاعىمدى ادامدار جاقسى باعانىڭ بەرىلۋىنە تاۋەلدى.

عالىمدار جۇرگىزىلگەن زەرتتەۋلەردىڭ ءبىرقاتار شەكتەۋى بار ەكەنىن مويىنداپ وتىر. بىرىنشىدەن، تاجىريبەلەرگە قاتىسقاندار ۋنيۆەرسيتەتتە وقيتىن جاس ادامدار، سوندىقتان بۇل ناتيجەلەر حالىققا جالپىلاي قاتىستى بولا المايدى. ەكىنشىدەن، جاعىمسىز مىنەز ۇزاقمەرزىمدى جوسپاردا پايدالى ما، جوق پا – ول دا بەلگىسىز. ءتىپتى اينالاسىنداعى ادامداردا قىرسىقتار مەن ولاردىڭ يدەياسىنا دەگەن قارسىلىق ويانۋى مۇمكىن.

سوندا شىعاتىنى، جاعىمسىز ادامدار اقىلدىراق نەمەسە شىعارماشىلىققا بەيىم دەۋگە كەلمەيدى، مۇندا باسقا ماسەلە ماڭىزدىراق: ولار وزدەرىنىڭ يدەياسىنان جاعىمسىز سىن ايتىلعاننان كەيىن دە باس تارتا الادى. ولاردىڭ الار اسۋى الدا. تابىسقا كەنەلۋ ءۇشىن زۇلىم اقىلگوي بولۋدىڭ قاجەتى شامالى، باستىسى ءوز تاراپىڭىزعا ايتىلعان اۋىر سىننان كەيىن مىسىڭىز باسىلماۋى كەرەك. دەگەنىڭىزدەن قايتپاي، وزىڭىزگە، كۇش-قۋاتىڭىزعا سەنسەڭىز جەتكىلىكتى.

شىندىق كەلەسىدەي: قاتال ادامدار باسەكەلەس ورتاعا تەز بەيىمدەلەدى، ال سەزىمگە ەرىك بەرەتىندەر ءارقاشان شەگىنۋشىلىگىمەن ءارى ادەپتىلىگىمەن ارتتا قالىپ قويادى.

 

PS: ءبىز ءسىزدى تيران بولسىن دەمەيمىز، ءبىراق ءسال دە بولسا وز-وزىڭىزگە سەنىمدى بولعانىڭىزدى قالايمىز. ؛)

---