ستۋدەنتتەردەن 2000 تەڭگە پارا سۇراعان تۇلكىباستىق ءمۇعالىمنىڭ سۇحباتى جاريالاندى (ۆيدەو)
وقو تۇلكىباس اۋدانى تۇرار رىسقۇلوۆ ەلدى-مەكەنىندەگى اگروبيزنەس جانە ساياحات كوللەدجىنىڭ ستۋدەنتتەردەن سىناق ءۇشىن 2000 تەڭگە تالاپ ەتكەن ءمۇعالىمى «ازاتتىققا» سۇحبات بەردى دەپ حابارلايدى «قامشى» پورتالى.
كوللەدجدە «تىگىنشى» ماماندىعى بويىنشا وقىپ جاتقان 2-كۋرس ستۋدەنتتەرى «ازاتتىق» تىلشىسىنە وقۋ ورنىنداعى پاراقورلىقتىڭ ءورشىپ تۇرعانىن ايتىپ شاعىمدانعان. اشىنعان ستۋدەنتتەر 18 ءپاننىڭ جەتەۋىنەن عانا پاراسىز سىناق تاپسىردىق دەيدى. ال، كوللەدج بۇل 2015-2016 وقۋ جىلىنداعى ءبىرىنشى پارا الۋ وقيعاسى دەپ اقتالۋدا.
«مۇعالىمدەردىڭ پارا سۇرايتىنىن ايتۋدان قورقامىز. ويتكەنى تەكسەرۋ كەلسە، وقۋشىلاردى [پارا تۋرالى ايتپاۋعا] دايىنداپ قويادى. ولار (تەكسەرۋشىلەر – رەد.) كەتەدى، ءبىز – قالامىز. سوسىن قورقامىز»، - دەگەن «ازاتتىق» تىلشىسىنە اتتارىن اتاماۋدى وتىنگەن ستۋدەنتتەر.
ستۋدەنتتەر ونداي-اق، 2-كۋرستا «4» دەگەن باعانىڭ «باعاسى» قولما-قول تولەسە 1000 تەڭگەگە، قارىزعا قويدىرسا 1500 تەڭگەگە وسكەنىن ايتقان. ال، «5» دەگەن باعا الۋ ءۇشىن 2000 تەڭگە بەرۋىڭ كەرەك ەكەن.
الەۋمەتتىك جەلىلەردە 11 اقپان كۇنى جاريالانعان ۆيدەونى ستۋدەنتتەر قاڭتار ايىنىڭ ورتاسىندا تۇسىرگەن كورىنەدى. ستۋدەنتتەردىڭ ايتۋىنشا ءمۇعالىمنىڭ اقشا تالاپ ەتكەنى ۆيدەوعا تۇسىرىلگەنى ماتەماتيكا ءپانىنىڭ ءمۇعالىمى نۇرجامال جانبوسىنوۆاعا ەسكەرتىلگەن دە ەكەن.
«توبىمىزدا تۇرمىسقا شىققان قىز بار. ءقازىر اياعى اۋىر. ءبىر پاننەن "جەڭىلدىك" دەپ باعاسىن 500 تەڭگەگە قويىپ بەردى. سوندا تۇرمىسقا شىقپاساق، بىزگە جەڭىلدىك جاسالماي ما؟»، - دەپ زار قاعادى شاعىمدانۋشى ستۋدەنتتەر.
ءقازىر وقۋ ورنىندا وبلىستىق ءبىلىم باسقارماسىنىڭ باس مامانى الىبەك كەنجەبايەۆ جۇمىس ىستەپ جاتقانىن ايتادى «ازاتتىق».
"ەشبىر سەسسيادا اقشا جينالماۋ كەرەك. ەشقايسىڭا تيىسپەيدى. ەشكىمنىڭ تيىسۋگە قۇقىعى جوق. جاعدايعا بايلانىستى تەكسەرۋ بىتكەن سوڭ شارا قولدانامىز. كوللەدج ديرەكتورى، ونىڭ ورىنباسارلارىنىڭ جۇمىستا قالۋى ەكىتالاي. ءبولىم مەڭگەرۋشىلەرى مەن مۇعالىمگە دە شارا كورەمىز"، - دەيدى الىبەك كەنجەبايەۆ.
ال وبلىستىق ءبىلىم باسقارماسىنىڭ قىزمەتكەرى بايانعالي جۇمابايەۆتىڭ ازاتتىققا ايتۋىنشا، مۇنداي جاعدايدا سىبايلاس جەمقورلىق تۋرالى زاڭ مەن ەڭبەك كودەكسىندەگى تارتىپتەردى، وزىنە مىندەتتەلگەن جۇكتەمەلەردى دۇرىس اتقارماعانى ءۇشىن شارا قولدانىلادى. اقپاننىڭ 12ء-سى كۇنى كەشكىسىن ءبىلىم باسقارماسى جاۋاپتى ادامدارعا قولدانىلعان تارتىپتىك شارالار تۋرالى مالىمەت تاراتتى. وقىتۋشى نۇرجامال جانبوسىنوۆا «ەڭبەك كودەكسىنىڭ» 52-بابى 1-تارماعى، 14-تارماقشاسىنا (تاربيەلەۋ فۋنكسيالارىن اتقاراتىن جۇمىسكەر وسى جۇمىسىن جالعاستىرۋمەن سىيىسپايتىن، مورالعا قايشى قىلىقتار جاساۋ) سايكەس جۇمىستان بوساتىلعان. كوللەدجدىڭ كاسىپتىك وقىتۋ ءبولىمىنىڭ مەڭگەرۋشىسى جانار قيلىبايەۆا «ەڭبەك كودەكسىنىڭ» 52-بابى 1-تارماعى، 16-تارماقشاسىنا (تارتىپتىك جازاسى بار جۇمىسكەر ەڭبەك مىندەتتەرىن دالەلدى سەبەپسىز قايتالاپ ورىنداماۋ) سايكەس قىزمەتىنەن الىنعان. باسقارما مالىمدەمەسىندە «تۇلكىباس اگروبيزنەس جانە ساياحات كوللەدجى ديرەكتورىنىڭ مىندەتىن اتقارۋشى ب.داۋلەتوۆكە جانە كوللەدج ديرەكتورى س.مىڭبايعا 2016 جىلدىڭ 15 اقپانىندا تارتىپتىك شارا كورۋ ماسەلەسى قارالىپ جاتقانى» جازىلعان.
«ازاتتىق» تىلشىسىمەن سويلەسكەن 51 جاستاعى تۇلكىباس اگروبيزنەس جانە ساياحات كوللەدجىندەگى ماتەماتيكا ءپانىنىڭ بۇرىنعى وقىتۋشىسى نۇرجامال جانبوسىنوۆا اقپاننىڭ 11ء-ى كۇنى ءوزىنىڭ ستۋدەنتتەردەن پارا تالاپ ەتۋ تۋرالى YouTube جەلىسىندە ۆيدەو جاريالانعانىن كورگەن سوڭ «دەنساۋلىعى ناشارلاعانىن» ايتتى. 27 جىلدىق جۇمىس ءوتىلى بار وقىتۋشى "ازاتتىققا" اقپاننىڭ 11ء-ى كۇنى جۇمىستان شىعارىلعانىن راستادى.
"27 جىل جۇمىس ىستەگەن بولسام، بىردە ءبىر سوگىس الماعام، ەسكەرتۋىم دە جوق. ستۋدەنتتەرگە «سىناق تاپسىرىڭدار» دەدىم. سىناقتان وتكەن قىزدار باعاسىن الىپ كەتتى. ىشىندە جاقسى وقىپ، اۆتومات الاتىندار بار. بۇل ءتورت قىز (ۆيدەو تۇسىرگەن ستۋدەنتتەردى ايتادى – رەد.) جىل بويى ساباققا كەشىگىپ كەلدى. ساباقتا ۇيىقتاپ وتىردى. داپتەرلەرى دە جوق بولدى. مەن ءوز سوزىمە جاۋاپ بەرە الامىن"، - دەدى نۇرجامال جانبوسىنوۆا.
You Might Also Like
-
كوز – جاننىڭ ايناسى دەلىنەدى، ولار ءبىز تۋرالى تولىق ايتىپ بەرە الادى دەيدى. ەندەشە تۇلعالىق سيپاتتى انىقتايتىن تەستتى ۇسىنامىز. باستىسى – اق قاعازعا كوزدىڭ سۋرەتىن سالىڭىز (ءوزىڭىز قاندا...
-
اپاسى قاينىلارىنىڭ اتىن اتاماۋشى ەدى. كەيدە "انا بالا"، "مىنا بالا" دەپ تۇسپالداپ كەتەتىنى دە بار. ءداستۇر بابالاردىڭ ارۋاعىنىڭ رازىلىعى ءۇشىن ساقتالىنادى دەيدى اپاسى. سويتكەن اپا...
