InfoHub Logo

nissan.com دومەنى ءۇشىن سوتتاسقان تالاس ەڭ ايگىلى سوت تالاسى بولىپ تابىلادى. قارجىلىق مۇمكىندىكتەرى شەكسىز الىپ كورپوراسياعا قارسى كۇرەسكەن قايسار كاسىپكەردىڭ تاريحى گولليۆۋدتا كينو تۇسىرۋگە لايىقتى. ءبىراق بۇل جاعدايعا باسقا تۇرعىدان كوز سالىپ كورەيىك.

^{سۋرەتتە: ۋزي نيسسان مەن كارلوس گون}

بۇنىڭ ءبارى قالاي باستالعان ەدى

1999 جىلعى ماۋسىمدا Renault كونسەرنى شىعىنى كوپ Nissan كومپانياسىن ساتىپ الدى دا، جاپوندىق اۆتوكونسەرندى توقىراۋدان الىپ شىعۋى ءتيىس بولعان كارلوس گوندى ءوندىرىس جونىندەگى ديرەكتور قىزمەتىنە تاعايىندادى. ءبىر جىلدان سوڭ كارلوس گون كومپانيانىڭ پرەزيدەنتى بولدى. ول كەزگە دەيىن گون نەگە nissan.com جانە nissan.net دومەندىك اتاۋلارى اقش-داعى ءبىر كومپيۋتەرلىك كومپانياعا تيەسىلى ەكەنىن تۇسىنە الماي، باسى قاتىپ ءجۇردى.

نيسسان وكىلدەرى دومەننىڭ يەسىنە حابارلاسادى، يەسى دومەندى ساتا سالۋعا دايىن ەكەنىن، ءبىراق وتە كوپ اقشاعا ساتاتىنىن تۇسپالداپ جەتكىزەدى:  

بەرى قاراڭىز، مەنىڭ قاتتى ءبىر ساتقىم كەلىپ تۇرعان جوق، سوندىقتان بىلاي جاۋاپ بەرەيىن: 15 ملن دوللار. ساتقىم كەلمەي تۇرعانىن ەندى ءتۇسىندىڭىز بە؟ (ۋزي نيسسان)

ءبىراق، ساۋدالاسا ءتۇسۋدىڭ نەمەسە شارتتاما جاساۋدىڭ ورنىنا، 1999 جىلعى جەلتوقساندا Nissan اۆتوكونسەرنى وتەمىنە $10 ملن دوللار تولەۋدى جانە دومەندەردىڭ بەرىلۋىن تالاپ ەتىپ، «Nissan Computer Corp» كومپانياسىن سوتقا بەرەدى.    

وسى تۇستا «كىم جانە نە ءۇشىن سوتتاسۋدى ۇيعاردى؟» دەگەن سۇراق تۋىندايدى. «Nissan Computer Corp» كومپانياسى كومپيۋتەرلەر جوندەۋ كلاسسى بويىنشا تىركەلگەن قىزمەت كورسەتۋ بەلگىسىنە (service mark) يەلىك ەتۋ فاكتى اۆتوكونسەرننىڭ پوزيسياسىن وتە ءالسىز ەتىپ تۇرعان ەدى.

كومپانيانىڭ يەگەرىنىڭ تەگى نيسسان بولعانى جاعدايدى ودان ارى ۋشىقتىرىپ جىبەردى. نەگە الدەبىرەۋ نيسسان تەكتى ادامنان nissan.com دومەنىن تارتىپ الۋ جونىندەگى جوسپارى ىسكە اسادى دەپ ۇيعاردى ەكەن؟ ونىڭ ۇستىنە بۇل قايداعى ءبىر باتىس افريكا جاقتا ەمەس، اقش-رىندا — ادۆوكاتتار مەن زاڭگەرلەر ەلىندە بولدى. 

كۇتىلگەندەي-اق، كيبەرسكۆوتتينگ جاسادى دەگەن ايىپ، سوتتىڭ ءبىرىنشى ينستانسياسىندا-اق الىنىپ تاستالدى. قۋىنعان تالاپكەردىڭ ارى قارايعى تاكتيكاسى دومەننىڭ قولدانىلۋىن شەكتەۋگە قۇرىلدى. سونىمەن قاتار، قارجىلىق قيىندىقتار تۋدىرۋ ارقىلى، جاۋاپكەردى مەيلىنشە تيتىقتاتۋ امالدارى دا قولدانىلدى. مىسالى، دومەنگە ەشقانداي ىلىك-شاتىسى جوق، ءبىراق وندا ۋزي نيسسان اكسيونەر بولىپ وتىرعان Internet Center Inc. كومپانياسىنا قارسى سوتقا تالاپ-ارىز بەرىلدى. بارلىق وقيعا «سوتتاسۋ ءۇشىن سوتتاسۋ» قاعيداسى بويىنشا ءوربىپ جاتتى.   

اۆتوكونسەرندەگىلەر ترافيگى ءوسىپ كەلە جاتقان، شارىقتاۋ كەزدەرىندە سايتقا كىرۋشىلەر سانى ايىنا جارتى ميلليونعا جەتىپ جىعىلىپ جاتقان دومەندى مەنسىنبەي جۇرگەندەرى انىق. دومەنگە بولىپ جاتقان سوت پروسەسسى تۋرالى بۇكىل اقپارات سالىنىپ وتىردى جانە مىڭداعان ينتەرنەت پايدالانۋشىلار ۋزي نيسسانعا بولىسىپ، وعان قولداۋ بىلدىرگەن پىكىرلەرىن جازىپ جاتتى. مىناۋ سول كوممەنتارييلەردىڭ باسىم كوپشىلىگىنە ءتان سارىندا جازىلعانى:

امەريكالىق ازاماتتى ونىڭ قۇقىقتارىنان ايىرىپ قانا قويماي، سونىمەن بىرگە، سوت پروسەسستەرى ارقىلى سول امەريكالىقتى ءناجىس پەن جۋىندىعا شىلاۋعا تىرىسقان  —  بۇل كورپوراسيالاردىڭ شىنايى بەت-بەينەسى!  —  شەتەلدىك ءوندىرۋشىنىڭ اۆتوكولىگىن مەنىڭ وتباسىم ەشقاشان ساتىپ المايدى.  

الدەبىرەۋلەر ۋزي نيسساننىڭ ءتۇپ-تامىرى يەرۋساليمنەن ەكەنىنە، ال كارلوس گوننىڭ يزرايلمەن قاستاسقان ليۆاننىڭ تۋماسى ەكەنىنە ءساپ سالىپ، بۇل پروسەسستەن ساياساتتى «بايقاپ قالىپ» جاتتى.  

ءاۆتووندىرۋشى وزدەرىنە ەڭ قاجەتتى امەريكا نارىعىنداعى كليەنتتەرىنىڭ كوڭىلىنەن ايىرىلىپ جاتتى. ابىروي-بەدەلىنە كەلگەن نۇقساننىڭ ءوزىن ۋزي نيسساننىڭ قۇقىقتارىن شەكتەۋگە قۇلشىنعان زاڭگەرلەر ءۋاج رەتىندە پايدالانىپ قالدى.   

فينال

اپەللياسيادان اپەللياسيا بەرىپ ءجۇرىپ، توعىز جىلعا سوزىلعان جانە تاراپتاردى ابدەن تيتىقتاتقان سوت پروسەسسى ءتىپتى جوعارعى سوتقا دەيىن جەتىپ، 2008 جىلى اۆتوكونسەرننىڭ جەڭىلىسكە ۇشىراۋىمەن اياقتالدى. دومەندى الۋ مۇمكىندىگى ماڭگىلىككە عايىپ بولدى. ۋزي نيسسان، قانشا كوپ اقشاعا بولسا دا، دومەندى ساتۋ ىقتيمالدىعىن جوققا شىعاردى جانە ءوزىنىڭ سايتىنا Nissan-نىڭ ءۇستى سىزىلعان لوگوتيپىن سالىپ قويدى.  

اۆتوكونسەرننىڭ بار قولىنان كەلگەنى — دومەندە كوممەرسيالىق قام-قارەكەتكە تىيىم سالىنۋ بولدى. 2013 جىلى Nissan اۆتوكونسەرنى اقش-ندا كومپيۋتەرلىك تەحنيكا كلاسسى بويىنشا ساۋدا ماركاسىن الدى دا، بۇل حيكايانىڭ جالعاسىپ كەتۋ مۇمكىندىگى پايدا بولدى. ءبىراق، ول ۋاقىتتا دومەندى كەرى قايتارىپ الۋ جوسىقسىز ءىس بولىپ تانىلىپ كەتىپ، دومەندى تىركەۋ كۇنى ەرتەرەك بولعان اكىمشىلەرگە قارسى تالاپ-ارىزداردى سوتتا قاراۋ ءۇشىن قابىلدامايتىن بولدى.   

ءبىراق بۇل حيكايانىڭ سوڭعى ءتۇيىنى تەك بىلتىر عانا اعىتىلدى — كارلوس گون اباقتىعا توعىتىلىپ، ال Nissan اۆتوكونسەرنى پرەسس-رەليزىندە توپ-مەنەدجمەنت كومپانيانىڭ اكتيۆتەرىن جەكە شارۋالارىنا پايدالانعانىن مالىمدەدى. زاڭبۇزۋشىلىقتارعا باستى كىنالىلەر بولىپ كارلوس گون مەن ديرەكتور گرەگ كەللي اتالدى.  

ۋزي نيسساننىڭ «Nissan Motor-دىڭ پروسەسستى ماعان مەيلىنشە قىمباتقا ءتۇسىرۋ نيەتى باس كەزىنەن-اق ايدان انىق بولاتىن» دەگەن ءسوزىنىڭ تۇپكى ماعىناسى، ەندى تۇسىنىكتى بولدى. ەگەر اۆتوكونسەرن جاۋاپكەرگە سوت شىعىندارىنىڭ وتەمى رەتىندە $58 مىڭ (بۇل ۋزي نيسساننىڭ ايتۋىنشا، ونىڭ ادۆوكاتتارعا شىعىندالعان اقشاسىنىڭ 2% قۇرايدى — ياعني، شامامەن $3 ملن) تولەگەن بولسا، وندا اۆتوكونسەرننىڭ ءوزى قانشا شىعىنعا ۇشىرادى ەكەن؟ ميلليونداعان دوللاردى شاشىپ تاستاعان بولۋى كەرەك. بۇل اقشا 1999 جىلدىڭ وزىندە-اق دومەندى ەشقانداي شۋسىز جانە سوتقا جازىلعان تالاپ-ارىزدارسىز ساتىپ الۋعا كەڭ-مولىنان جەتەر ەدى. ءبىراق بولاشاعى بۇلىڭعىر سوت ايتىس-تارتىستارىن باستاپ كەتۋگە بەل بۋىلدى. بۇل پروسەسستىڭ شىنايى مۇراتى دومەنگە تەزىرەك قول جەتكىزۋ ەمەس، قىزمەتى قىمباتقا تۇسەتىن ادۆوكاتتار قاتىساتىن پروسەسستىڭ ءوزى بولعان بولۋى دا مۇمكىن. مەنەدجەرلەردىڭ ماقسات-مۇراتتارى مەن كومپانيانىڭ ماقسات-مۇراتتارى ءاردايىم ۇشتاسا بەرمەيدى، سوندىقتان، بيزنەس يەلەرى، ناتيجەسى قانداي بولاتىنى بەيمالىم كۇماندى سوت پروسەسستەرىن باستاۋ جايلى ۇسىنىستار كەلگەن كەزدەردە، بۇنى ءبىلىپ ءجۇرۋى قاجەت. قازىرگى مەزەتتە nissan.com دومەنىنە كىرەتىندەر سانى ايىنا 360 مىڭ ادامعا دەيىن جەتىپ ءجۇر. جانە دە ترافيكتىڭ 95% SEO نەمەسە جارناما ەمەس، تىكەلەي كىرگەندەر. ال اۆتوكونسەرننىڭ nissan-globol اتتى رەسمي سايتىنىڭ ترافيگى 2-3 ەسە عانا ارتىق. «دومەندە تۇرعان ەشتەڭە جوق» دەيتىندەرگە مىنا ستاتيستيكان ۇسىنۋعا بولادى:

^{SimilarWeb ۇسىنعان nissan.com-عا كىرەتىندەر سانى جونىندەگى مالىمەتتەر}

قالاي بولعاندا دا كوپتەگەن زاڭگەرلەر بىلمەستىكتەن نەمەسە قاساقانا تۇردە ساۋدا بەلگىسى بار بولسا، كەز كەلگەن دومەندى تارتىپ الۋعا بولاتىنىن جونىندەگى اڭىز-اپسانانى تاراتۋىن قويار ەمەس. بۇل سوتتاعى تالاس-تارتىسقا كەتەتىن ماعىناسىز شىعىندارعا جانە كەيىن قاجەتتى دومەندى ساتىپ الۋدىڭ قيىنداپ كەتۋىنە ۇرىندىرادى.

قورىتىندى

ۋزي نيسسان باسىنان وتكەن وقيعا حرەستوماتيالىق بولىپ تانىلدى جانە ونى كوپتەگەن زاڭي ۋنيۆەرسيتەتتەردە وقىتادى. نيسسان ءتىپتى قيساپسىز زاڭگەرلەرى بار دۇنيە جۇزىنە ايگىلى كومپانيانىڭ وزىنە تويتارىس بەرۋگە بولاتىن ۇلگىلى وقيعاعا سەبەپ بولدى. قازىرگى كەزدە كومپانيالار تىركەلگەن ساۋدا بەلگىسىن دارالاندىرۋ (ينديۆيدۋاليزاسيا) ءۇشىن شىعارىلعان تاۋارلارعا قاتىستى دومەن پايدالانىلعانىن دالەلدەي الاتىن بولسا عانا نەمەسە قارا نيەتتە پايدالاعان بولسا سوتتاسىپ، سوتتا جەڭىپ جاتادى. 

باسقا جاعدايلاردا بارلىق ماسەلە كەلىسسوز ارقىلى ءبىر جاقتى بولادى. وسىنىڭ ناتيجەسىندە، سوڭعى جيىرما جىل ىشىندە دومەندەردى تىركەۋ كولەمى ەسەلەپ ارتىپ كەتسە دە، ءقازىر اۋقىمى جاعىنان nissan.com دومەنىنە تالاسپەن سالىستىرۋعا جارايتىن سوت ىستەرىن كورىپ جۇرگەن جوقپىز.

ەڭ قىزىعى، nissan.com دومەنى جيىرما جىل بويى — 1985 جىلدان 1994 جىلعا دەيىن مۇلدەم يەسىز بولدى. ونى الدىن الا تىركەپ قويۋعا بولاتىن ەدى عوي، مىسالى، فورد كومپانياسى 1988 جىلى-اق ford.com دومەنىن تىركەپ قويعان بولاتىن. ءبىراق كونسەرننىڭ ساراپشىلارى ينتەرنەت-تەحنولوگيالارىنىڭ بولاشاعىن بولجاي الماي قالعاندىقتان، وسىنداي وقيعا شىعىپ وتىر.  

---