ن.نازاربايەۆ پەن ب.وبامانىڭ مۇسىندەرىن جاساعان ايدوس استانادا مۋزەي اشۋدى ارماندايدى
ن.نازاربايەۆ جانە ب.وبامانىڭ سيليكون مۇسىندەرىن جاساعان ايدوس ەسماعامبەتوۆ استانادا مۇراجاي اشۋدى ارماندايدى. بۇل تۋرالى سۋرەتشى جانە ءمۇسىنشى ايدوس ەسماعامبەتوۆ «قازاقپارات» تىلشىسىنە بەرگەن سۇحباتىندا ايتتى.
ايدوس سيليكوننان ءمۇسىن جاساۋدى وزدىگىنشە ۇيرەنگەن ەكەن. ونەردىڭ بۇل تۇرىمەن 5 جىل بۇرىن اينالىسا باستاعان.
«ءمۇسىن جاساۋ ونەرىمەن شامامەن 2010 جىلدان اينالىسا باستادىم، - دەدى ايدوس. - سول كەزدە باراك وباما اقش پرەزيدەنتى اتانىپ، مادام تيۋسسو مۋزەيىندە ونىڭ بالاۋىزدان جاسالعان ءمۇسىنى پايدا بولدى. سول كەزدە ءبىزدىڭ پرەزيدەنتىمىز نۇرسۇلتان نازاربايەۆتىڭ ءمۇسىنىن جاساۋ ويعا كەلدى. سونىمەن قاتار، ونىڭ 70 جىلدىق مەرەيتويىنا ارناپ توسىن سىي جاساعىم كەلدى. ءبىزدىڭ قازاقستاندا دا مۇنداي ونەر بار ەكەنىن كورسەتكىم كەلدى. كەيىن بىرنەشە رەت كورمەلەرگە قاتىستىم. ادامدار پۋتين، وبامانىڭ ءمۇسىنىن جاساۋدى ۇسىندى».
وسىلايشا باراك وبامانىڭ ءمۇسىنىن جاسادى. بۇل جۇمىسقا 1 جىلعا جۋىق ۋاقىت كەتتى. ەندى ءمۇسىنشى ورتا سالماقتاعى الەم چەمپيونى، بوكسشى گەنناديي گولوۆكيننىڭ ءمۇسىنىن جاساۋعا نيەتتى. بۇل ءۇشىن ءتيىستى ماتەريالداردى دا ساتىپ العان.
ارقالىقتان 30 شاقىرىم جەردەگى اشۋتاستى اۋىلىندا تۇراتىن ايدوس تاپسىرىس بويىنشا پورترەتتەر مەن سۋرەتتەر سالادى.
«نەگىزگى تەحنولوگيالاردى مادام تيۋسسو مۋزەيىنىڭ ۆيدەوروليكتەرىنەن، سونىمەن قاتار مۇسىندەردىڭ قانداي ماتەريالداردان جاسالعانى تۋرالى ماقالالاردان ۇيرەندىم»، - دەدى ا.ەسماعامبەتوۆ.
ايدوس جۇمىستارى ءۇشىن ماتەريالداردى امەريكادان ينتەرنەت-ماگازيندەر ارقىلى تاپسىرىس بەرىپ الادى. مۇسىندەرىنە شاش جاساۋ ءۇشىن سينتەتيكالىق پاريكتەردى پايدالانادى، الايدا الداعى ۋاقىتتا تابيعي شاشتى قولدانۋدى كوزدەپ وتىر.
ايدوستىڭ سوزىنە قاراعاندا، ءبىر ءمۇسىن ءۇشىن شامامەن 200 مىڭ تەڭگە جۇمسالادى. ەكى كومپونەنتتى سيليكون قۇنى (كولەمىنە بايلانىستى) 80-90 مىڭ تەڭگەنى قۇرايدى. ەۋروپادا بۇنداي مۇسىندەردى 150-500 مىڭ دوللارعا ساتىلادى.
«ونەردىڭ بۇل ءتۇرى مەنى شابىتتاندىرادى. الداعى ۋاقىتتا ول قازاقستاندا دا دامىسا ەكەن دەيمىن. استانادا ءوز ستۋديامدى اشقىم كەلەدى، وزگەلەردى دە ونەردىڭ بۇل تۇرىنە ۇيرەتۋدى قالايمىن، - دەدى ول. - ازىرگە جۇمىستارىمدى ۇيدە ساقتايمىن. شەبەرحانام، مۋزەي بولعانىن قالايمىن، ارينە».
سونىمەن قاتار، دارىندى جىگىت گريم جاساۋمەن، ۆيدەو تۇسىرۋمەن اينالىسادى.
وسىلايشا، ونى زومبيلەر تۋرالى «سەلفي س مەرتۆەسامي» اتتى قازاقستاندىق كوركەم فيلمگە گريم جاساۋشى رەتىندە قاتىسۋعا شاقىردى.
دەرەككوز: inform.kz
You Might Also Like
-
مالىمەتتى ەسكە ساقتاۋعا پەرنەتاقتامەن جازۋعا قاراعاندا، قالاممەن جازۋدىڭ پايدالىراق ەكەنىن بىلەسىز بە؟
