ولەڭ دەگەن تۋمايدى جايشىلىقتا،
ولەڭ دەگەن تۋلايدى قايشىلىڭتا.
اقىن بولساڭ جارقىنىم، الىسقا اتتان،
كۇندەلىكتى تىرلىككە بوي سۋىتپا.
ايشىلىق جول...
شولدەيسىڭ، زارىعاسىڭ،
ارماندايسىڭ، اڭسايسىڭ، ساعىناسىڭ.
جول ازابىن كورەسىڭ، كورەسىڭ دە
اشىناسىڭ، بىرەسە باعىناسىڭ.
دالامەنەن جۇرەسىڭ، تاۋ اساسىڭ،
سەزەسىڭ بيىگىن دە الاساسىن.
كەنەزەڭ كەپكەندە ءبىر، لاي سۋعا
كەز كەلگەن ماقۇلىقپەن تالاساسىڭ.
ساپار ۇزاق.
تاعى دا اياڭدايسىڭ،
الىپقاشپاڭ باسىلىپ، باياۋلايسىڭ.
ەل شەتىنە جەتەسىڭ، جەتەسىڭ دە
كورگەنىڭنىڭ ءبارىسىن باياندايسىڭ.
مىنە، وسىلاي ولەڭنىڭ كىلتى دەگەن،
قۇيتتاي جۇيەڭ قالمايدى سىلكىمەگەن.
اتتانام دەپ الىسقا، ايدالادا
اداسپايتىن بولعاي-دى شىركىن ولەڭ.

---