InfoHub Logo

ءبىر قۇس اتىپ السا، ون قۇس اتىپ الدىم، — دەپ قۇرىققا سىرىق جالعاپ، جەل ءسوزدى سۋداي ساپىرىپ جۇرگەن ءبىر اڭشى اڭگىمە ۇستىندە قىزا-قىزا كەلىپ:

— ءبىر كۇنى جولىم بولىپ ءبىر تاۋدىڭ قوينىنان قىرىق تۇلكى اتىپ الدىم، — دەپتى. اڭشىنىڭ وتىرىكتى كوزدى جۇمىپ سىلقىتىپ جىبەرگەنىن اڭعارىپ قالعان ءبىر قۇرداسى:

— قوي، ول قىرىق ەمەس، جيىرما-اق تۇلكى ەدى عوي، — دەپتى كۇلىمسىرەپ.

— ءيا، ول جيىرما بولسا جيىرما شىعار، — دەپ سالىپتى اڭشى بايقاۋسىزدا باس تارتا الماي.

— جيىرما ەمەس، ون-اق تۇلكى ەدى عوي، — دەپتى سىرمىنەز قۇربىسىنىڭ تاعى بىرەۋى مىرس ەتىپ كۇلىپ.

سوندا ءسوز ىڭعايىن بايقاعان اڭشى:

— ون ساۋساقتاي ون ەدى،
ون تۇلكىنىڭ تەرىسى
ءبىر ىشىككە مول ەدى،
الىپ كەلگەن مەن ەدى،
كورىپ تۇرعان سەن ەدى.
كۋاسى بار ادامدى
قاي ۇياتسىز جەڭەدى؟! — دەگەن ەكەن.

---