ورازگۇل اسانعازى: ءۇش ءتىلدى وقىتۋدى بالاباقشا مەن مەكتەپتى قازاق تىلىنە كوشىرۋدەن باستاۋ قاجەت
ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنىڭ كەڭەسشىسى ورازكۇل اسانعازىنىڭ ايتۋىنشا، ءۇش ءتىلدى وقىتۋ جۇيەسىندە جاڭالىق جاساۋدىڭ قاجەتى جوق. اتالعان ادىستەمەنى كەزىندە الاش ارىستارى جازىپ كەتكەن.
«ءبىز ۇرپاعىمىز ءۇش ءتىلدى جەتىك مەڭگەرسىن دەسەك، ەڭ ءبىرىنشى كەزەكتە قازاق ءتىلىن وقىتۋىمىز كەرەك. قازاقستاننىڭ بۇكىل مەكتەپتەرى مەن بالاباقشالارى تەك قازاق تىلىندە بولۋى كەرەك. بىزدە جاراتىلىستانۋ پاندەرىن اعىلشىن تىلىندە وقىتامىز دەپ جاتىر، بۇل تۇبىرىمەن دۇرىس ەمەس. قازاقستاندا وسەتىن وسىمدىكتى، جانۋارلار الەمىن، تەك قازاقستاندا عانا بولاتىن تىرشىلىكتى قازاقتىڭ بالاسىنا اعىلشىن تىلىندە وقىتۋ دەگەن نە سۇمدىق؟ ءبىز ونى ءوزىنىڭ تامىرىنان ايىرىپ وتىرمىز عوي. مىنە، كەزىندە الاشتىڭ ارىستارى، اxمەت بايتۇرسىنوۆتار جاراتىلىستانۋدى قالاي وقىتتى؟ ءبارىن جازىپ قويعان. جاڭادان ەشتەڭە ويلاپ تابۋدىڭ كەرەگى جوق»، - دەدى و.اسانعازى استانادا وتكەن «الاش ارىستارىنىڭ ءبىلىم بەرۋ جۇيەسىندەگى ماقسات-مۇراتتارى - «ساتىلاي كەشەندى وقىتۋ» تەxنولوگياسىنىڭ وزەگى» اتتى شارادا.
ونىڭ ايتۋىنشا، ءدال وسى تەxنولوگيانىڭ نەگىزىندە ءۇش تىلگە ۇيرەتۋگە ابدەن بولادى. سەبەبى اتالعان ءادىس تەك قانا ءبىلىمدى بەلگىلى ءبىر كولەمدە بەرىپ، قاجەتتى شەبەرلىك پەن داعدىنى مەڭگەرتۋمەن عانا شەكتەلمەيدى. سونىمەن قاتار بالانىڭ جالپى جان-جاقتى دامۋىنا، ويلاۋ، ەستە ساقتاۋ، قيالداۋ، ەلەستەتۋ سياقتى باسقا تانىمدىق-پسيحولوگيالىق قاسيەتتەرىنىڭ جاقسى ۇيلەسىمدى دامۋىنا باعىتتالعان، قازاق تىلىندە ويلايتىن، قازاق مادەنيەتىن مەڭگەرگەن تىلدىك-مادەني تۇلعا قالىپتاستىراتىن وقىتۋدىڭ ءبىر ءتۇرى. ونىڭ ناتيجەسى دە جوق ەمەس.
«ءبىز ءاربىر ءپاننىڭ الگوريتمىن جاسادىق. سول الگوريتم ارقىلى ءاربىر بالاعا ءپاننىڭ مازمۇنىن بەردىك. وسى مازمۇن بويىنشا بالالار ارى قاراي وزدەرىن دامىتىپ، وقىپ كەتتى. ال ەندى بۇنىڭ ناتيجەسىن قايدان كوردىك دەگەندە، ول مىنا ۇلتتىق تەستىلەۋ كەزىندە كورىندى. بالالارىمىز ءار پاننەن 25 باللدان كەم العان جوق. جۇسىپبەك ايماۋىتوۆ ءوز ەڭبەگىندە ايتادى، بالاعا ءبىلىم بەرگەندە، كوزىمەن كورگەندەي، قۇلاعىمەن تىڭداعانداي، قولىمەن ۇستاعانداي ەتىپ بەرۋ كەرەك. مىنە، ساتىلاي وقىتۋ كەشەنى وسىنى كوزدەيدى»، - دەيدى پەداگوگيكا عىلىمدارىنىڭ دوكتورى نۇرشا ورازاقىنوۆا.
ايتا كەتەيىك، بۇگىنگى تاڭدا «ساتىلاي كەشەندى وقىتۋ» تەحنولوگياسى بىرنەشە ايماقتاردا تاجىريبە رەتىندە قولعا الىندى. اتاپ ايتقاندا، باتىس قازاقستان مەن الماتى وبلىستارىندا، سونداي-اق استانا قالاسىنىڭ ءبىرقاتار مەكتەپتەرىندە وسى ءادىستى قولدانىپ كەلەدى.
You Might Also Like
-
اتىراۋ وبلىسىنىڭ اكىمى نۇرلان نوعايەۆ قازاق قوعامىن ۇلتسىزدانۋدان قورعاۋىمىز كەرەك دەپ مالىمدەدى. ايماق باسشىسى بۇل تۋرالى وبلىستا وتكەن رەسپۋبليكالىق جۇمەكەن ناجىمەدەنوۆ وقۋلارى كەزىندە ايتتى.
-
قازاق ەلى - ۇلى دالا ەلى دەگەن كيەلى ۇعىمدار ۋاقىت ارناسىمەن سان قيلى ءداۋىردى باستان وتكەرگەن حالقىمىزدىڭ وتكەنى مەن بۇگىنگى حال-كۇيىنەن حابار بەرەتىندەي. وتانعا دەگەن شىنايى ماحاببات، بۇگىنگى ۇرپا...
