InfoHub Logo

باي ەسىگىندە كۇن كورگەن ءبىر كەدەي جىگىتتىڭ شاپسا دا، جورعالاسا دا الدىنا ات سالماعان كەرى اتى بولادى. مال مەن داۋلەت بەرمەسە دە، ەلگە اتاعىن جايعان ءارى جۇيرىك، ءارى جورعا ات بەرگەن تاڭىرگە جىگىت ىشتەي ريزا. قايدا دۋمان، قايدا توي بولادى، قايدا بايگە مەن جورعا جارىسى بولادى، سول توپ الدىمەن كەرى اتقا كوز سۇزە قاراپ، سايگۇلىك دەپ وسىنى ايت دەسىپ تاڭدانادى. «ەر قاناتى ات» دەگەندەي، كەدەي جىگىتتىڭ ماڭدايىنا بىتكەن جالعىز اتقا كوزىنىڭ قۇرتى تۇسكەن تالاي باي مەن اكىم قولقا سالادى. جىگىت ونىڭ ەشقايسىسىنا كونبەيدى. جىگىتتىڭ بۇل «ساراڭدىعىنا» ءىشقۇسا بولعان اكىمنىڭ ءبىرى تارتىپ الۋعا بەل بۋادى دا: «شاڭىراعىن شاعىپ، ءوزىن شابىڭدار دا، كەرى اتتى تارتىپ اكەلىڭدەر»، — دەپ ۇكىم بەرەدى دە، ءبىر توپ سويىلسوعارلارىن اتتاندىرادى. شاش ال دەسە، باس العان سويىلسوعارلار ىرگەلى جاۋمەن شايقاسىپ، ەل كەگىن قايىرارداي-اق قاھارلانىپ، اتقا قونادى.

كەلە جاتقان سويىلسوعارلاردىڭ حابارىن ەستىگەن بىرەۋ قالىڭدىعىنا ۇرىن كەلىپ جاتقان كەر اتتىڭ يەسىنە سۋىق حاباردى جەتكىزەدى. اكىمنىڭ سويىلسوعار ۇرداجىقتارىنا قارسى تۇرار دارمەنى جوق جالعىز جىگىت، تەك قاشىپ قۇتىلۋدى ويلايدى. ادىلەتتىگى جوق قاراڭ زاماننىڭ نادان بيىنەن قۇتىلۋدىڭ باسقا جولىن تابا الماي دال بولادى.

تارىققان جىگىت اتىن ىزدەپ شىقسا، بەكىتىپ قويعان اتى جوق. اۋىل ماڭىنداعى ساي-سالانى ءتىنتىپ، ورەلى كەرىن ىزدەپ دىڭكەسى قۇرىعان جىگىت قويشىعا كەزىگىپ:

— وي، قويشى-اۋ؟! ورەلى كەر كوردىڭ بە، ورەلى كەر كوردىڭ بە؟ —  دەيدى جالىنىشتى ۇنمەن. قوي سوڭىنا ءتۇسىپ ۇزاقتى كۇن دالا دا جۇرسە دە، قويدان باسقاعا نازارىن سالماعان قويشى:

— وي، جەزدە-ەكە-اۋ! ورەلى كەر كورگەم جوق، ورەلى كەر كورگەم جوق، — دەيدى اعىنان جارىلىپ. ورەلى كەرىن تابا الماي دال بوپ جۇرگەن جىگىتتىڭ الىپ ۇشقان كوڭىلىنە: «ءۇي دەيمىن! ورەلى كەر مۇندا تۇر، ورەلى كەر مۇندا تۇر»، — دەپ داۋىستاعان قالىڭدىعىنىڭ ءۇنى سابىر بەرەدى. ءسويتىپ، جاياۋ جۇگىرە-جۇگىرە تۇرالاپ شارشاپ، القىنا ەنتىككەن جىگىت ەكى ەتەگىن قايىرعان كۇيى اتىنا كەلسە، ۇركىپ اتى ۇستاتپايدى. سوندا «تاك-تاك جا-
نىم، تاك-تاك» دەپ اتىن شىر اينالا جۇگىرگەن ەكەن.

جىگىت اتىن ۇستاپ الادى. قۋعىنشىلاردىڭ بۋداق-بۋداق شاڭى كورىنىپ، تاياپ قالعاندىقتان، جىگىت اتىنىڭ ورەسىن الۋعا دا سابىر قىلماي قالىڭدىعىن مىنگەستىرىپ، ورەلى كەرمەن قاشادى. شاپسا الدىنا ۇشقان قۇس تۇسىرمەيتىن كەر ات قۋعىنشىلارعا جەتكىزبەي، امان قۇتىلادى. جاۋ قاراسى الىستاعان سوڭ جىگىت پەن قالىڭدىق اتتان ءتۇسىپ دەم الىپ، اتتىڭ ورەسىن بوساتىپ، قايتادان ىلگەرى قۇيعىتىپ، ەلىنە كەلەدى. ورەلى كەردىڭ وسى جۇرىسىنە ريزا بولعان كۇيشى «ورەلى كەر» كۇيىن شىعارادى.

---