InfoHub Logo

وتەگەن باتىردىڭ قارتايعان شاعى بولسا كەرەك. ءبىر كۇنى اڭ اۋلاۋعا شىققان ول قاسىنداعى از عانا اداممەن شۋ وزەنىنىڭ سالاسىنداعى كوكوراي شالعىنعا كەلىپ، تىنىعىپ وتىرادى. وسى ارادا سەرۋەن قۇرىپ، ەرىگىپ جۇرگەن قىرعىزدىڭ ءبىر توپ تەنتەكتەرى كەزدەسە كەتەدى. قازاق پەن قىرعىز اراسىندا ءبىر تۇسىنىسپەۋشىلىك ورىن العان كەز بولۋى كەرەك، قازاقتاردى كورگەن ءارى ولاردىڭ مىنگەن تۇلپارلارىنا، قىمبات ەر-تۇرمانىنا قىزىققان الگى قىرعىزدار:

— مىناۋ قازاقتىڭ اتاقتى باتىرى وتەگەن عوي. ءبىز بۇلاردى الداۋسىراتىپ اۋىلعا الىپ كەتەيىك تە، قازاقتاردان قۇنىن سۇراتايىق. قازاقتار ول ءۇشىن بارىن بەرۋگە ءازىر. ءسويتىپ ءبىر ولجاعا باتايىق، — دەيدى دە، قاننان-قاپەرسىز وتىرعان وتەگەن باتىردى جىگىتتەرىمەن ەلدەرىنە الىپ كەتەدى.
ەلدەرىنە اپارعان سوڭ باتىردىڭ وزىنە بولەك ءۇي تىگىپ، قادىرلەپ كۇتەدى، ءبىراق قايتارمايدى. ارادا ءبىراز كۇن وتكەن سوڭ قازاقتارعا: «باتىر كەرەك بولسا، قۇنىنا ءبىر تۇيەنىڭ موينىنى گاۋھار تاستان تىزىلگەن مونشاق سالىپ اكەپ، الىپ كەتىڭدەر!» — دەپ ادام جىبەرەدى.

ءبىر كۇنى وتەگەن باتىر قىرعىزدارعا:

— مەنىڭ ۇلكەن ۇلىم قوساعال كەلە جاتىر، ونىڭ اشۋى قاتتى. ۇيلەرىڭدى بيىككە تىگىپ، مالدارىڭا يە بولىندار، ەرتەڭ مىنا جەردىڭ ءبارىن سۋ الادى، — دەيدى. قىرعىزدار سەنبەيدى، باتىردىڭ ايتقانىنا قۇلاق اسپايدى.

ەرتەسىندە شىنىمەن-اق كۇن كۇركىرەپ، نايزاعاي ساتىرلاپ، سەلدەتىپ جاڭبىر قۇيىپ بەرەدى. قىرعىزداردىڭ وتىرعان ۇيلەرىن، جەرلەرىن تەگىس سۋ باسىپ، ەستەرىنەن تانادى. قۇن سۇراماق تۇرماق، ءوز مالدارىنا يە بولا الماي قالادى. سويتسە، وتەگەننىڭ تۇڭعىشى قوساعالدىڭ قاتتى اشۋلانعاندا كۇندى كۇركىرەتىپ، نايزاعاي ويناتاتىن، جاڭبىر جاۋدىراتىن قاسيەتى بار ەكەن. سونىمەن، قوساعالدىڭ قولى قىرعىزداردىڭ بار مالىن ايداپ، وتەگەن باتىردى بوساتىپ اكەتەدى.

ەسىن جيعان سوڭ قىرعىزدار جاعى:

— بىزدەن ءبىر قاتەلىك ءوتتى. وتەگەن باتىر كەشسىن، قوساعال قالاعان مالىن الىپ، قالعانىن قايتارسىن! — دەپ كەشىرىم سۇراپ كەلىپتى.

سوندا وتەگەن باتىر:

— جارايدى، كەشىردىم. ءبىراق قوياتىن ءبىر شارتىم بار، سونى ورىنداساڭدار، مالدارىندى تۇگەل قايتارتام، ورىنداي الماساڭدار، ماعان وكپەلەمەڭدەر! — دەيدى.

وتەگەن ولارعا الدىنا قىرىق تازى سالىپ ايداتىپ، ءبىر باتىرلارىن جىبەرۋ كەرەكتىگىن ايتادى. قىرعىزدار كەلىسەدى.

قىرعىزدار ەلدەرىنە بارعان سوڭ، جان-جاقتان تازى يت جينايدى. قىرىق تازى دا تابىلادى، ولاردى اپاراتىن باتىر دا تابىلادى. ءبىراق الگى باتىرلارى قىرىق تازىنى الدىنا سالىپ ايداي الماي مىسى قۇريدى. سەبەبى، يت ادامنىڭ سوڭىنان ىلەسكەنىمەن، ەش ۋاقىتتا الدىعا سالىپ ايداۋعا كونبەيدى ەكەن.

ءسويتىپ، وڭاي ولجاعا باتپاق بولعان قىرعىزدار مالىنان ايىرىلىپ ءبىر ۇياتقا قالسا، سوزدەن جىعىلىپ، شارتتى ورىنداي الماي ەكى ۇياتتى بولىپتى.

وقۋعا كەڭەس بەرەمىز:

وتەگەننىڭ قىز بەرۋى

وتەگەننىڭ قارىزىن قايتارۋى

وتەگەننىڭ ابىلايدى سىناۋى

---