وتىرىك ايتپايمىن، ايتىپ تا كورگەنىم جوق
جاستار باس قوسىپ، ءوزارا ويناپ-كۇلىپ وتىر ەدى. كەنەت، سۇتەمگەن ولاردىڭ ويىنىن ءبولىپ جىبەرەدى، ءوز اكەسىنىڭ تاماشا ءبىر قيمىلىن ايتتى:
— قىس مەزگىلى. قازاقشا قاڭتار، اقپان ايلارىنىڭ ءبىرى بولۋ كەرەك، تاڭ سارىدەن بۇرقاعان بوران ءتۇس اۋا باسىلىپ، كۇن شايدا اشىلىپتى، — دەپ باستادى ول اڭگىمەسىن. — بۇل كەزدە اكەم جىلقىلارىن جۋساتىپ، ءوزى قالىڭ تالدىڭ ىقتاسىنىندا، ات ۇستىندە تۇر ەكەن. قۇلاعىنا ءبىر سىلدىر ەستىلەدى، بۇرىلىپ قارايدى. تاڭقالارلىق تاماشا، ءبىر قويان بىرنەشە قۇرىق سۇيرەپ كەلە جاتىر. اكەم الۋەتتى، قانداي جاعدايدا بولسا دا، باتىل
قيمىلدايتىن ادام عوي. دەرەۋ قۇرىعىن جازىپ جىبەرىپ، قوياننىڭ موينىنا تاستاي بەرەدى. قويان كىدىرمەيدى، سۇيرەي جونەلەدى. مىنگەنى اتامنىڭ كوك ايعىرى ەكەن، جانۋار قانداي بەلدى، قوياننىڭ كۇشتى تەگەۋرىنىنە توتەپ بەرەدى.
كورمەگەن ادامدارعا بۇل بولماعان بولۋعا دا ءتيىس ەمەس وقيعا سياقتى. دەگەنمەن، بۇعان سەنۋگە ءتيىستىمىز. ويتكەنى اكەم وتىرىك ايتپايدى، ايتىپ تا كورگەن ەمەس. قوياننىڭ سۇيرەپ كەلە جاتقانى سەگىز قۇرىق ەكەن، اكەمنىڭ قۇرىعى توعىزىنشى بولىپتى. قوياندى تاباندا ولتىرمەي، موينىنداعى توعىز قۇرىقپەن اۋىلعا الىپ كەلىپتى.
مۇنى تىڭداپ وتىرعان جاستار وتىرىك دەرىن دە، شىن دەرىن دە بىلە الماي، تەك اڭگىمەنىڭ قىزىعىنا ۇيىپ، ارتىن كۇلكىگە اينالدىرادى.
بۇدان كەيىن سۇتەمگەن ءوزى ىشىندە بولعان ءبىر تاماشانى ايتتى.
— كىشى بەسىن كەزى ەدى. بالاكول جاعىنان كەلە جاتىپ تولەش ادىرىنا شىعا كەلدىم. ەتەكتەگى تۇبەك ىشىندە بىرنەشە ادام ەرسىلى-قارسىلى جۇگىرىپ ءجۇر. مىنە، تاماشا! — دەپ ول وتىرعاندارعا جاعالاي قارادى. — سول جەردەگى وتكەلدەن ءوتىپ، تۇبەككە كىردىم. بەس-التى ادام تەرلەپ-تەپشىپ، ەنتىگىپ وتىر. ءبارى دە تانىس: بەگەن اۋىلىنىڭ پىشەنشىلەرى ەكەن. جاقسى كەلدىڭ دەپ شۇرقىراسا قالدى. بۇلار جۇمىس ىستەپ جۇرگەن كەزدە كەنەت ءبىر قۇس كورەدى. سوعان قىزىعادى دا، جۇمىستى تاستاپ، جابىلا قۋادى. ساسكەدە قۋعان قۇستى كۇن ۇياسىنا قونار الدىندا عانا سوعىپ الادى. بۇل قولعا سيرەك تۇسەتىن قۇس — كادىمگى ۇزىن سيراق ءشىل.
اسىعىس جۇمىسىم جوق، اتىمدى وتقا جىبەردىم دە، قوسقا كىردىم. ءبارىمىز وتىرا قالدىق تا، ءشىلدىڭ ءجۇنىن جۇلدىق. قۇداي بىلەدى دەپ ايتايىن-اۋ، قولىمدى كەرە جايىپ قۇشاقتاپ، ءتورت رەت شىعاردىم، سوندا دا قوستا ءبىرسىپىرا ءجۇن قالدى...
— ءشىلدىڭ ەتىن اسۋعا كىرىستىك، — دەپ ءسوزىن ودان ءارى جالعاستىردى سۇتەمگەن. — ەرنەۋى ون ءتورت قارىس قازانعا ەكى جىلىگى ارەڭ سيدى. سىلقيا تويىپ جاتتىق. تاڭعا تاياعاندا وياندىم. قاتتى شولدەپپىن. قوستا سۋ جوق، ەسىلگە بارۋعا ەرىندىم. تۇندەگى ەتتىڭ سۋىق سورپاسىن ىشكىم كەلدى. بەتىنە مايى قاتىپ قالىپتى، وجاۋمەن ونى بۇزا المادىم. سەندەرگە وتىرىك، ماعان شىن. ولدا، بەلدا، ءبىر وتىرىگى جوق، قاتقان مايدى بالتامەن بۇزىپ، سۋىق سورپاعا قاندىم.
وتىرعاندار قىزىققا ابدەن باتتى، ىشەك-سىلەسى قاتا كۇلىپ، سەرگىپ قالدى.
You Might Also Like
-
— ۇلكەن تۇبەك ىشىندە بىرنەشە جىگىت ءشوپ شاۋىپ جاتىرمىز. جۇمىسقا شىعار الدىندا ەسىلدىڭ ءبىر يىرىمىنە جۇتپا ورناتقانمىن. تۇسكى تاماققا وتىراردا جۇتپامدى قارادىم. ۇلكەن ءبىر بالىق ءىلىنىپتى. جۇتپامن...
-
كەشكى مەزگىل، مال جايلانىپ، جۇرت ورىنعا وتىرعان كەز. قوڭىركەڭنىڭ ءبىر بالاسى سۋاتتان اتىن سۋاردى دا، ونداعى سۇيمەندى قولىنا الىپ، ۇيگە قايتتى. اي جارىق ەدى. كەنەت، ارتىنا قارادى، بىرەۋ سويىل كوتەرىپ...
