وتقا شاقىرۋ
دەمالىس كۇنى بولاتىن. نارتاي ءۇي ماڭىندا دوستارىمەن بىرگە ويناپ جۇرگەن-دى. ءبىر كەزدە ەسىك الدىنان داۋىستاپ اجەسى شاقىردى.
— الىسقا ۇزاپ كەتپە. سالدەن سوڭ ۇيگە قوناق كەلەدى، — دەدى قاسىنا بارعاندا اجەسى قاداعالاي تاپسىرىپ. — ارى-بەرى جۇمساعانعا تاپپاي قالىپ جۇرمەلىك.
— اجە، ۇيگە كىم كەلەدى؟ — دەپ سۇرادى نارتاي قاشانعى داعدىسىمەن توسىن جاڭالىققا نازارى اۋىپ.
— جەكسەن اعاڭنىڭ كەلىنشەگى كەلەدى، — دەدى اجەسى ءوز شارۋاسىنا بۇرىلا بەرىپ.
— جەكسەن اعام دا كەلە مە؟
— جوعا. وعان نە بار! كەلىنشەگىن وتقا شاقىرىپ وتىرساق.
نارتاي ەشتەڭە تۇسىنبەي قالدى. «وت» دەگەندە لاۋلاعان ءورت كەلدى كوز الدىنا. سوسىن سۇراعىن ارى جالعادى.
— اجە، ازدان سوڭ ەسىك الدىنا وت جاعامىز با؟
— جوعا. ونى قايدان شىعاردىڭ! — دەدى اجەسى جالت بۇرىلىپ. ارتىنشا نارتايدىڭ جۇزىنەن «وتقا شاقىرۋ» دەگەن ءسوزدى دۇرىس تۇسىنبەي قالعانىن اڭعارىپ، تۇسىندىرە سويلەدى. — جەكسەن اعاڭ انەۋ كۇنى كەلىنشەك الدى عوي… بىلەسىڭ بە؟— دەدى.
— ءيا. بىلەم.
— بىلسەڭ، سول… سول جاڭا تۇسكەن كەلىندى ۇيگە شاقىردىق. جاڭا تۇسكەن كەلىندى جاقىن تۋىستار ۇيىنە شاقىرىپ، تانىستىق ءبىلدىرىپ، ءۇي كورسەتەدى. سونى…
— سونى «وتقا شاقىرۋ» دەي مە؟
— ءيا. «كەلىندى وتقا شاقىرۋ» دەيدى.
— ەندى ءبىلدىم، اجە! مەن ەسىكتىڭ الدىنا وت جاعادى ەكەنبىز دەسەم…
— قايداعى وت… «وت جاققان جەرىن كورسەتۋ» دەگەننەن شىققان بولۋ كەرەك. قازاق ءۇيدى «وتباسى»، «وت جاققان جەر» دەپ تە ايتادى ەمەس پە… الىسقا ۇزاپ كەتپە! كەرەك بولاسىڭ!
— قۇپ بولادى!— دەدى نارتاي سىمداي بولىپ تۇرا قالدى. وڭ قولىن شەكەسىنە اپاردى. — بۇيرىعىڭىزدى ورىنداۋعا دايىنمىن، كاپيتان!
— قۇلدىعىم اشەيىن! — دەدى اجەسى نارتايدىڭ مىنا قىزىق قىلىعىنا سۇيىنە جىميىپ.
You Might Also Like
-
قۇرالايدىڭ قۋىرشاعى جەتەرلiك. ولاردىڭ كوبiن قۇربىلارى تۋعان كۇنiنە سىيلاعان. قۋىرشاقتارىن بiر-بiرiمەن شاتىستىرىپ الماۋ ءۇشiن قۇرالاي ولارعا ات قويدى. بiرi — اسەم، بiرi — زيادا، بiرi &mda...
-
قازىرگى تاڭدا XXI- عاسىردا ستۋدەنتتەردىڭ نە بولماسا، مەكتەپ قابىرعاسىنداعى وقۋشىلاردىڭ ۇستازدارعا باعىنباي كەتۋى تۋرالى ماسەلە مۇلدە قوزعالماي كەتتى. تەك قورىققان ادامىن سىيلايتىن، تەك سونىڭ ...
