InfoHub Logo

بۇل ساباق تۋرالى مەن ەرەكشە تولعانىسپەن ايتقىم كەلەدى. سەبەبى، بۇل ساباق قازاقتىڭ ءبىرتۋار ۇلى، بالۋان قاجىمۇقان مۇڭايتپاسوۆ تۋرالى بولاتىن. الدىمەن ساباقتىڭ ماقساتىن ايقىنداپ الدىم جانە تاقىرىپقا ساي كەلەتىن ستراتەگيالاردى ىزدەستىردىم. ماعان ءماتىندى ءوز مانىندە وقۋشىعا جەتكىزە الۋىم ءۇشىن «ءببۇ»، «ەسسە»، «گالەرەياعا ساياحات» جانە توپتا، جۇپتا تالقىلاۋ ادىستەرى كومەكتەستى. اسىرەسە، «ماعىنانى تانۋ» كەزەڭىندە وقۋشىلاردان قاجىمۇقان تۋرالى نە بىلەتىندەرى سۇرالعاندا ولاردىڭ تەك قاجىمۇقاننىڭ اتىن ەستىگەندەرى مەن بالۋان ەكەندىگىن بىلەتىندەرىنەن باسقا اقپاراتتارى بولمادى. بۇل مەنى قاتتى ويلاندىردى. ال، كەرىسىنشە، «بىلگىم كەلەدى» بولىمىندە وقۋشىلاردىڭ كوپ بىلۋگە دەگەن قۇشتارلىقتارىن بايقادىم. ولار سان الۋان سۇراقتارىن جاۋدىرىپ، ءارقايسىسىنا جاۋاپ بەرۋگە تۋرا كەلدى. سول ماقساتتا مەن سىنىپتى توپتارعا ءبولىپ، ءماتىندى جۇپتا، توپتا وقىپ، تالداۋدى ۇسىندىم. وقۋشىلار قۇلشىنىسپەن تالداپ، بولىمدەر بويىنشا مازمۇنعا ساي تاقىرىپ قويدى.

دەگەنمەن تاقىرىپ تاڭداۋ وڭاي بولعان جوق، سەبەبى، ۇسىنىلعان بىرنەشە تاقىرىپتىڭ ىشىنەن بولىمگە ساي كەلەتىنىن الۋ ءۇشىن وقۋشى بەرىلگەن ءماتىن مازمۇنىن تولىق ءبىلۋى جانە ماتىندەگى نەگىزگى ويدى انىقتاي الۋى كەرەك ەدى. مەن وسىنداي ساتتەردە ولارعا باعىتتاۋشى، نۇسقاۋشى سۇراقتار قويىپ، نەگىزگى تۇجىرىمدى وزدەرىنە جاساتۋعا تىرىستىم. ءار توپ مازمۇنداپ، ءتيىستى سۇراقتارعا جاۋاپ بەردى. بۇدان باسقا وقۋشىلاردىڭ ءبىلىمىن كەڭەيتۋ ءۇشىن قاجىمۇقان تۋرالى فيلم كورسەتىلدى. وقۋشىلار ءفيلمدى زور ىقىلاسپەن تاماشالاپ كوردى. فيلمنەن كەيىن وقۋشىلار العان اسەرلەرىن بولىسە وتىرىپ، «ۇيرەندىم» باعانىن تولتىردى. وسى ارقىلى وقۋشىلاردىڭ بۇگىنگى ساباقتان قانشالىقتى ءبىلىم العانى كورىنىپ تۇردى. «وي تولعانىس» كەزەڭىندە ساباقتان العان بىلىمدەرى مەن فيلم بويىنشا العان اسەرلەرىنەن ەسسە جازدى. بۇگىنگى ومىرمەن بايلانىستىرۋ ماقساتىندا ينتەراكتيۆتى تاقتادان استانا قالاسىنداعى سپورت كەشەنىن، قاجىمۇقان اتامىزدىڭ ەسكەرتكىشىن، ول كىسىنىڭ اتىنداعى اۋىل مەن كوشە سۋرەتتەرىن كورسەتتىم.
جالپى، بۇل ساباقتا وقۋشىلاردىڭ بەلسەندىلىكتەرى باسىم بولدى، ءوز ويلارىن بۇكپەسىز ايتىپ، سىن ايتقاندارعا ءوز پىكىرىن دالەلدەي الۋى مەنى قۋانتتى. الداعى ۋاقىتتا ەستە بولاتىن نارسە وقۋشىلاردى بەلگىلى ءبىر تاپسىرمانى ورىنداۋعا بەرىلگەن ۋاقىتقا ۇلگەرۋگە ۇيرەتۋ، سونىمەن قاتار كەيبىر بەلسەندى ەمەس، توپ اتىنان سويلەۋگە تاۋەكەل ەتە الماعان وقۋشىلارعا ەرەكشە نازار اۋدارۋ قاجەت دەپ ءتۇيدىم.