پىقاننىڭ ساباعى
پىقان ءبىر تويدىڭ ۇستىندە الدەبىر زاڭ قىزمەتكەرىمەن قاتار وتىرىپ قالىپ، وعان اتا-انالاردان اقشا العانى تۋرالى بىردەڭەلەردى بىلجىراتىپ ايتىپ قويدى. سول-اق ەكەن، زاڭ قىزمەتكەرى پىقاننىڭ بىلەگىنە شاپ ەتە ءتۇستى. "بىلىقتىرعان ەكەنسىڭ عوي ابدەن!" - دەدى ءتۇسىن سۋىتىپ.
پىقان شوشىپ كەتتى.
- تاعى قاي جەردە الدىڭ؟!
- باستاۋىش سىنىپقا ساباق بەرىپ جۇرگەندە، - دەدى پىقان.
- سەن ءوزى نەنىڭ ءمۇعالىمىسىڭ؟! بىرەسە جوعارى سىنىپقا، بىرەسە باستاۋىشقا ساباق بەرە بەرەسىڭ بە؟!
پىقان شىنىن ايتتى:
- مەن ءمۇعالىم ەمەسپىن.
- ەندى كىمسىڭ؟!
- مەن ەلەكتريكپىن. باستاۋىش سىنىپتىڭ ءمۇعالىمى بولماي قالىپ، ساباق بەرگەنىم بار ەدى.
- سودان؟!
- سودان باستاۋىشتان ەشتەڭە بىلمەيمىن. اينالىپ كەلىپ بالالارعا "ەلەكتر جەلىسىنە جولاماڭدار" دەپ ايتا بەردىم.
- جولامادى ما سوسىن؟!
- قايداعى جولاماعان؟ بالا دەگەن كەرى قاراي جۇرەتىن حالىق ەمەس پە.
ءبىر بالا ۇيىندەگى ەلەكتر جەلىسىنىڭ اشىق تۇرعان جەرىن ۇستاپ تۇرادى. قايتا سول كەزدە جەلىدە ەلەكتر توگى بولماعان.
ونى كورىپ، شەشەسى بالانى جۇلىپ العان ساتتە، قوسۋلى تۇرعان ەلەكتر شامى جارق ەتە قالىپتى.
ەندى شەشەسى كەلىپ ماعان ۇرىسىپ ءجۇر.
- نە دەپ ۇرىسادى سوندا؟!
- "بالاعا نە تاربيە بەرىپ وتىرسىڭ؟! نە وقىتىپ جاتىرسىڭ؟! ەلەكتر جەلىسىنە جولاما دەپ نەگە ايتىپ قويمايسىڭ؟!" دەيدى. "اۋ، قۇدايدىڭ قۇتتى كۇنى سونى ايتپاي، نە ايتىپ جاتىرمىن؟"
سودان ىزدەنە باستادىم. پەداگوگيكالىق كىتاپتاردى الىپ كەلدىم. سويتسەم، پەداگوگتەر ءبارىن جازىپ كەتكەن ەكەن عوي. بالانى زەرتتەي-زەرتتەي كەلىپ، "نە اتا-انانىڭ ايتقانىن قىلمايتىن، نە ءمۇعالىمنىڭ ايتقانىن تىڭدامايتىن كىپ-كىشكەنتاي جۇگىرمەكتەردى بالا دەپ ايتامىز" دەپ انىقتاماسىن بەرىپتى. "قالاي ءدال بەرىلگەن انىقتاما!" دەيمىن.
ادىس-تاسىلدەرىن دە قوسا بەرگەن ەكەن. سولاردىڭ ىشىنەن ءبىر ءادىستى تاڭداپ الدىم. بۇل ءادىس پەداگوگيكادا ءقاۋىپتى ءتاسىل دەپ اتالادى ەكەن. بۇل ءادىستى تاجىريبەدە قولدانۋعا پەداگوگتاردىڭ وزدەرىنىڭ جۇرەكتەرى داۋلاي بەرمەيدى دەيدى. ەگەر بۇل ءادىس ءوزىنىڭ ناتيجەسىن بەرمەسە، وندا پەداگوگتىڭ وزىنە قارسى جۇمىس ىستەيدى ەكەن.
- ول قانداي ءادىس؟
- كەرى قاراي ايتۋ ءادىسى. ياعني، ۇستاما دەۋدىڭ ورنىنا ۇستا دەيسىڭ.
- سودان؟!
- بىرەۋى جولاسايشى. سول-اق ەكەن، مەكتەپكە "راقمەت سىزگە، ءمۇعالىم! بالامىز ۇيدە ءتاپ-تارتىپتى بولىپ قالدى. ءسىز دۇرىس باعىتتا جۇمىس ىستەپ جاتىرسىز" دەگەن شەشەلەردىڭ العىسى جاۋدى دا كەتتى.
- سول جولى عوي الىپ جۇرگەنىڭ؟!
- كىشكەنتاي. وزدەرى بەردى.
- بىلىقتىرعان ەكەنسىڭ عوي ابدەن! - دەپ زاڭ قىزمەتكەرى پىقاننىڭ بىلەگىن ودان ءارى قىسا ءتۇستى.
پىقان ايتتى:
- وسى ءسىز تويعا قاي جاعىنان قاتىسىپ وتىرسىز؟
- قاي جاعىنان قاتىسىپ وتىرسىڭ دەگەن نە؟! مەنى تانىماي وتىرسىڭ با؟! مەن دەگەن قالىڭدىقتىڭ تۋعان اعاسى ەمەسپىن بە؟!
- ە، باسە!.. - دەدى پىقان.
- نە باسە؟!
- توي ۇستىندە مىنەز كورسەتۋىڭىز جامان دەگەنىم دە. قىز جاعىنان بولعاننان كەيىن ەكەن عوي.
- سەن ۇل جاعىنانسىڭ با؟! انا ىنىڭە ايتىپ قوي! وسى تويدان كەيىن قارىنداسىما ساۋساعىنىڭ ۇشى تيمەيتىن بولسىن! ءوزىڭ مەكتەپتە ىستەيمىن دەپ وتىرسىڭ عوي، ءىنىڭدى تاربيەلەپ ءجۇرسىڭ بە ەندى؟!
- ايتۋداي-اق، ايتىپ جاتىرمىز، - دەدى پىقان. - بىر-بىرلەرىڭدى سىيلاپ جۇرىڭدەر، وتباسى دەگەن سىيلاستىقتان باستالادى دەپ جاتىرمىز.
پىقان ويانسا، وسىنىڭ ءبارى ءتۇسى ەكەن. ءبىراز ەسەڭگىرەپ جاتتى.
وتكەندە پىقاننىڭ ءىنىسىنىڭ ۇيلەنگەنى راس ەدى. كەلىننىڭ اعاسىنىڭ زاڭ قىزمەتكەرى بولىپ شىققانى دا، ەكەۋىنىڭ تويدا بىرگە بولعاندارى دا، قاتار تۇرىپ اڭگىمەلەسكەندەرى دە راس ەدى.
وسى كەزدە پىقاننىڭ ۇستىنە كەلىنشەگى بيبىگۇل كىردى.
- تۇر، جۋىن، - دەدى بيبىگۇل پىقانعا. - كەشكىسىن تولەگەندەردىڭ قوناققا شاقىرىپ وتىرعانىن بىلەسىڭ بە؟
- تولەگەن دەگەن كىم؟ - دەدى پىقان ءبىر كوزىن اشىپ، ءبىر كوزىن جۇمعان قالپى سىعىرايا قاراپ.
- جىندى ما، تولەگەن دەگەن كىم دەگەنى نەسى؟! ءساليانىڭ اعاسى شە، پروكۋراتۋرادا ىستەيتىن.
پىقان شوشىپ كەتتى.
- بارمايمىن! - دەدى پىقان قابىرعاعا قاراي تىعىلا ءتۇسىپ.
- ەسىڭ دۇرىس پا؟! بارماعانى نەسى؟! تولەگەن دەگەن سىيلاسىپ وتىرعان ادامىڭ ەمەس پە؟ تولەگەن دەگەن - ءوزى ءبىر جاقسى جىگىت. پروكۋرورمىن دەپ ءشانيىپ تۇرعان ول جوق.
- مەن مەكتەپتەن شىعامىن، - دەپتى پىقان جىلامسىراپ.
بيبىگۇل پىقاننىڭ جانىنا كەلىپ، قولىنىڭ سىرتىن ونىڭ ماڭدايىنا تيگىزىپ كوردى.
- سەن وسى اۋىرايىن دەپ وتىرسىڭ-اۋ دەيمىن. تولەگەن سەنىڭ مەكتەبىڭدى ءقايتسىن؟ تولەگەننىڭ سەنەن باسقا جۇمىسى جوق دەيسىڭ بە؟ تۇر، جۋىن!
سول كۇنى كەشكىسىن پىقان گالستۋگىن تاعىنىپ، كەلىنشەگى بيبىگۇلدى قولتىقتاپ تولەگەن قۇداسىنىڭ ۇيىنە كەلە جاتتى.
ءوزىنىڭ مەكتەبىنىڭ جانىنان وتە بەرگەندە، سۆەتتىڭ جارىعىمەن جارقىراپ جاتقان مەكتەپتىڭ اۋلاسىنا كوزى ءتۇستى. تۇسىندە تولەگەننىڭ "مەكتەپتەرىڭنىڭ اۋلاسىنا قاراساڭ، جارقىراپ جاتادى، ىشىنە كىرسەڭ، ەدەندەرىڭ جالتىراپ جاتادى، ىشتەرىڭ نەگە سونداي بولىپ تۇرمايدى وسى؟" دەگەن ءسوزىن ەسىنە الدى. "مەكتەپتەرىڭنىڭ اۋلاسى قالاي جارقىراپ جاتسا، ەدەندەرىڭ قالاي جالتىراپ جاتسا، پەداگوگ ادامنىڭ ءىشى دە سولاي جارقىراپ تۇراتىن بولسىن" دەگەنى عوي توكەمنىڭ" دەپ وي ءتۇيدى پىقان.
تولەگەن تەك پىقانداردى عانا ەمەس، تاعى دا ءبىراز جورا-جولداستارىن جۇبايلارىمەن قوسىپ شاقىرعان ەكەن. پىقان دا بيبىگۇلىمەن سولاردىڭ اراسىنا كەلىپ جايعاستى.
ۇستەل باسىندا وتىرىپ، قوناقتارىنا ەلپىلدەپ، قوناقجايلىلىق تانىتىپ وتىرعان تولەگەن قۇداسىنا كوزى تۇسكەن سايىن، پىقاننىڭ دا ءتۇسى ەسىنە ءتۇسىپ كەتىپ، ءالسىن-السىن جىميا بەردى.
You Might Also Like
-
ينتەللەكتۋالدىق قاۋىمداستىق فورۋمىنىڭ (اقش) رەيتينگى بويىنشا استانا 2016 جىلى توپ-21 اقىلدى قالالار تىزىمىنە ەندى، دەپ حابارلايدى قالالىق اكىمدىكتىڭ باسپا ءسوز قىزمەتى.
-
الماتى وبلىسى، تالعار اۋدانى، داۋلەت اۋىلى «مەكتەپ جاسىنا دەيىنگى شاعىن ورتالىعى بار № 11 جالپى ءبىلىم بەرەتىن ورتا مەكتەبى» مەملەكەتتىك كوممۋنالدىق مەكەمەسى 5 «ا» سىنىپ و...
