InfoHub Logo

قازاقستانداعى ۋنيۆەرسيتەتتەردىڭ بارىندە پلاگياتتى تەكسەرەتىن جۇيەلەرى ورناتىلدى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ ۇكىمەت وتىرىسىندا ايتتى.

«ءبىلىم بەرۋ باعدارلامالارىنىڭ ساپاسىن ارتتىرۋ ءۇشىن ۋنيۆەرسيتەتتەرگە اكادەميالىق جانە اتقارۋشى دەربەستىك بەردىك. وسىعان وراي، ولار ءبىلىم بەرۋ باعدارلامالارىن دايىنداعاندا مينيسترلىك بەكىتكەن ۇلگىلىك وقۋ جوسپارلارىنىڭ ورنىنا جۇمىس بەرۋشىلەردىڭ كاسىپتىك ستاندارتتارىن نەگىزگە الاتىن بولدى. تيىسىنشە جوعارى وقۋ ورىندارى ءبىلىم بەرۋ باعدارلامالارىن ءوز بەتىنشە ازىرلەۋگە كوشىپ، 9 371 باعدارلاما ازىرلەندى»، — دەدى اسحات ايماعامبەتوۆ.

مينيستر ءتورتىنشى يندۋستريالىق ريەۆوليۋسيانىڭ اسەرىنەن الەمدىك ەڭبەك نارىعىندا «داعدىلاردىڭ تەز ەسكىرۋى» قالىپتى جاعدايعا اينالعانىن ەسكە سالدى.

«ءومىر بويى ءبىر ديپلوم» سەناريى ەندى ماڭىزدى ەمەس. سوندىقتان پرەزيدەنتتىڭ تاپسىرماسى بويىنشا ءومىر بويى وقۋ تۇجىرىمداماسى ازىرلەندى. بۇل جۇمىستىڭ ارقاسىندا ۋنيۆەرسيتەتتەر فورمالدى ەمەس جانە ينفورمالدى ءبىلىم الۋدىڭ ناتيجەلەرىن تانىپ، قابىلدايتىن بولادى»، — دەدى ۆەدومستۆو باسشىسى.

ونىڭ مالىمەتى بويىنشا، ەلدەگى جوعارى وقۋ ورىندارىنا اكادەميالىق ادالدىق تالاپتارىن ساقتاۋ مىندەتى جۇكتەلىپ وتىر. ۆەدومستۆو پلاگيات پروبلەماسىمەن وسىلايشا كۇرەسپەكشى.

«ەندى اكادەميالىق ادالدىق قاعيداتتارىن بۇزعان ستۋدەنتتەردى وقۋدان شىعارۋعا مۇمكىندىك بار. بارلىق ديپلومدىق جۇمىستاردى، جازباشا جۇمىستاردى ءجونسىز كوشىرىپ الۋدى بولعىزباۋ ءۇشىن مىندەتتى تۇردە تەكسەرۋ نورماسى ەنگىزىلدى جانە ۋنيۆەرسيتتەردىڭ بارىندە وسى تەكسەرۋ جۇيەلەرى ورناتىلدى»، — دەدى مينيستر.

---