InfoHub Logo

ءبىر اۋرۋحانادا ەكى قارت جاتىپتى. ەكەۋىنىڭ ناۋقاستارى ءبىر بولعاندىقتان ءبىر بولمەگە جايعاستىرىلىپتى. تەك ءبىرى تەرەزەنىڭ جانىندا، ەكىنشىسى ەسىكتىڭ ءدال قاسىندا جاتادى ەكەن.

تەرەزە جانىنداعى قارت كۇن سايىن ەسىك تۇسىنداعى قارياعا سىرتتاعى تىنىس-تىرشىلىكتى قۇلاق قۇرىشىن قاندىرىپ ايتىپ وتىراتىن:

— بۇگىن تەڭىز ءبىر قالىپتى. ازداپ جەل سوعىپ تۇر عوي دەيمىن. ويتكەنى انا ۇزاقتاعى كەمەنىڭ جەلكەنى جەلبىرەپ تۇر. تەڭىز جاعالاۋىندا شاعالالار ۇشىپ ءجۇر.

وسىلايشا كۇندەر وتە بەرەدى. كۇندەردىڭ بىرىندە الگى تەرەزە جانىنداعى اقساقالدىڭ جۇرەگى ۇستاپ ناشارلاپ قالادى. ادەتتە، بولمەدەگى قوڭىراۋ تۇيمەسىن باسا قالسا دارىگەرەر جەتىپ كەلەتىن. ال بۇگىن قاسىنداعى قارت دارىگەردى شاقىرتاتىن تۇيمەنى باسپادى. ويتكەنى تەرەزەدەن دۇنيەنى ءوزى كورە الماي، تەك كورشىسىن تىڭداۋمەن عانا شەكتەلىپ جاتاتىن. سول ەسىنە ءتۇستى مە، شايتاننىڭ سوزىنە ەرىپ، قوڭىراۋدىڭ تۇيمەسىن باسۋعا قۇنت تانىتا قويمادى. وسىلايشا، ول دوسىن جازىقسىزدان جازىقسىز ولىمگە قيدى دا جىبەردى. كەلەسى كۇنى دارىگەرلەر ەسىكتەگى كىسىنى تەرەزە جانىنداعى بوساعان ورىنعا اۋىستىراتىن بولدى. وسى كۇنگە دەيىن تىڭداۋدى عانا مىسە تۇتقان ادامنىڭ قۋانىشى قوينىنا سىيمادى. ەندى تابيعاتتىڭ سان قىرلى ناقىشتارىن ءوز كوزىمەن كورىپ جاتاتىن بولدى. ورنىنا جايعاسا سالىپ، باسىن كوتەرىپ تەرەزەگە اسىعا موينىن سوزىپ ەدى، ارعى جاقتا قارا قابىرعادان باسقا ەش نارسە كورىنبەدى.

---