InfoHub Logo

(پارسى ەرتەگىسى)

ءبىر كىسى كەرۋەنىنەن كوز جازىپ قالىپ اداسىپ كەتىپتى. قۇم اراسىندا قاڭعىپ ءجۇرىپ، ەسىگىنىڭ الدىندا كەمپىر وتىرعان، ونىڭ قاسىندا يت بايلاۋلى تۇرعان قىڭىرايعان لاشىققا كەزدەسىپتى. الگى كىسى كەلىپ سالەم بەرگەندە، كەمپىر جىلى شىرايمەن قارسى الىپ، قاسىنا وتىرعىزادى.

— كەرۋەننەن كوز جازىپ قالىپ ەدىم، — دەيدى كىسى، — ءنار تاتپاعانىما الدەنەشە كۇن بولدى. قاۋجاڭدار بىردەڭەڭ بولسا بەرە كور.

— ە، بالام، - دەيدى كەمپىر، — الىستاعى سوناۋ جازىقتى كوردىڭ بە؟ سوندا جىلان كوپ، بىرەۋىن ۇستاپ اكەل، ءپىسىرىپ جەيىك.

قايران قالعان جولاۋشى:

— مەن جىلان ۇستاي المايمىن! — دەيدى. — ولاي بولسا، — دەيدى كەمپىر، — ەكەۋمىز بىرگە بارايىق.

كەمپىر ءيتىن بوساتادى دا، ەكەۋى جازىققا قاراي كەتەدى. ەكى ۇلكەن جىلان ۇستاپ الىپ، قۇيرىقتارىن، باستارىن كەسىپ تاستاپ، وتقا قويىپ، قۋىرا باستايدى. جىلاننىڭ ەتى پىسەدى. جولاۋشى ولەردەي اش بولعان سوڭ، امالسىز جىلاننىڭ ەتىن جەيدى. سودان سوڭ قاتالاپ شولدەيدى.

— ءۇي الدىندا انە جەردە بۇلاق بار، — دەيدى كەمپىر.

كىسى بۇلاقتىڭ باسىنا كەلىپ، سۋىن ءىشىپ كورىپ، ساسىق ءيىسى بارىن سەزەدى. سوندا ول كەمپىردەن:

— وسىنداي جايسىز جەردە نەسىنە تۇرىپ جاتىرسىڭ؟ — دەپ سۇرايدى.

— بۇدان جاقسى جەر تاپپايسىڭ،  — دەيدى كەمپىر، — كەڭ جازىق، بۇلاعىنىڭ سۋى مول، بۇدان ارتىق جالعاندا جاقسى جەر تابىلا ما؟

— ءبىزدىڭ جەرىمىزدە،  — دەيدى كىسى، — ارنالى وزەندەر اعىپ جاتادى، اعاشتاردىڭ بۇتاقتارى جەمىستەن مايىسىپ تۇرادى، ءتاتتى-دامدى تاعام مول. جىلاننىڭ ەتىن جەۋ دەگەن ءوڭىم تۇگىل تۇسىمە دە كىرگەن ەمەس.

— ونىڭ ءبارى ءجون عوي، — دەيدى كەمپىر. — مەنىڭ سۇراعىما جاۋاپ بەرشى ەندەشە، سونداي راحات تىرشىلىكتە سەندەرگە ءامىرىن جۇرگىزەتىن، قىسپاققا سالاتىن بىرەۋلەر بار ما، جوق پا؟

— ءيا،  — دەيدى كىسى، — وندا حان دا، حاكىمدەر دە بار، ولار وزدەرىنىڭ قول استىنداعىلارعا سالىق سالادى.

— سەندەردىڭ راحاتتارىڭ وكتەمدىكسىز، ەزۋشىلىكسىز بولمايدى، سوندىقتان ول جىلاننىڭ ۋىنان جامان،  — دەيدى كەمپىر. ۋ ىشسەم دە، ونداي راحاتقا قاراعاندا، ەركىندىكتە جۇرگەنگە نە جەتسىن.

---