InfoHub Logo

كريس گاردنەر كىشكەنتاي ۇلىمەن بىرگە قوعامدىق دارەتحانانىڭ ەدەنىندە ۇيىقتاپ جۇرگەن كەزدە، ءبىر كەزدەرى ءوز ءومىرىنىڭ جەلىسىمەن گولليۆۋدتا ايگىلى فيلم تۇسىرىلەتىنى تۋرالى ءۇش ۇيىقتاسا تۇسىنە كىرگەن ەمەس.

ونىڭ ادامعا شابىت سىيلايتىن كەرەمەت وقيعاسى تۋرالى BBC اگەنتتىگى بىلاي دەپ ايتىپ بەردى.

1980-جىلداردىڭ باسىندا 27-جاسار گاردنەر ۇشكە دە تولماعان ۇلىمەن بىرگە ءبىر جىل بويى كاليفورنيا شتاتىنىڭ سان-فرانسيسكو قالاسىنىڭ كوشەسىندە باسپاناسىز قاڭعۋمەن ءجۇردى. گاردنەر بروكەرلىك فيرمانىڭ تالىمگەرى بولىپ جۇرگەن، ونىڭ جالاقاسى پاتەر جالداۋعا دا جەتپەيتىندەي وتە از بولدى.

سۇيىكتىسىمەن رەنجىسىپ قالعاننان كەيىن ول بالاسى ەكەۋى كوشەدە قالىپ، تابىلعان جەرگە تۇنەپ ءجۇردى.

تەمىر جول بەكەتىنىڭ دارەتحاناسىنان باسقا، ولار ساياباقتا، شىركەۋ ۇيىندە نەمەسە جۇمىسشىلاردىڭ ءبارى ۇيلەرىنە تاراپ كەتكەن كەزدە كابينەتىندەگى ۇستەلدىڭ استىندا قونىپ شىعاتىن. ولار باسپاناسىز قالعاندارعا ارنالعان قايىرىمدىلىق اسحاناسىندا تاماقتاندى. ال اكەسىنىڭ بار تاپقان-تايانعانى كىشكەنتاي كريستىڭ بالاباقشاسىنىڭ اقىسىن تولەۋگە كەتەتىن. ويتپەگەن جاعدايدا كريس گاردنەر جۇمىس ىستەي المايتىن ەدى.

وسىنداي قيىندىقتارعا قاراماستان، كريس جۇمىسىن وتە كەرەمەت ىستەدى. ونىڭ اكسيالار مەن وبليگاسيالاردى تابىستى ساتا الاتىن تابيعي دارىنى بولدى. سوندىقتان، Dean Witter Reynolds (DWR) فيرماسىنداعى سىناق ۋاقىتى اياقتالعان سوڭ، وعان تۇراقتى جۇمىس ۇسىندى. تەك سودان كەيىن عانا ول ۇلى ەكەۋىنە پاتەر جالداپ تۇرا باستاپ، تاسى ورگە دومالادى. 1987-جىلى ءوزىنىڭ جەكە Gardner Rich دەگەن ينۆەستيسيالىق فيرماسىن اشتى. 

گولليۆۋد

بۇگىندە 62-جاسار گاردنەردىڭ تابىسى 60 ميلليون دوللار دەپ باعالانعان. ول ادامدارعا شابىت بەرەتىن سوزدەرىمەن الەمدى ارالاپ، باسپاناسىزدارعا كومەكتەسىپ، ايەلدەردىڭ زورلىق-زومبىلىعىنا قارسى كۇرەسەتىن بىرنەشە قايىرىمدىلىق ۇيىمدارىنا قولداۋ كورسەتەدى.

گاردنەر ءوزىنىڭ قيىن بالالىق شاعى تۋرالى، DWR فيرماسىنا كەلمەس بۇرىن تۇرمەگە جاتىپ شىققانى تۋرالى جازىلعان ءومىربايان كىتابىن شىعارعان كەزدە، گولليۆۋد اگەنتتەرى وعان فيلم ءتۇسىرۋ تۋرالى بىردەن ۇسىنىس ايتتى. ال «باقىت ىزدەۋ جولىندا» اتتى كىتابى بىردەن بەستسەللەرگە اينالدى. 

^{فيلمنەن ءۇزىندى.}

2006-جىلى ءدال وسى اتاۋمەن جاڭا فيلم شىقتى. كريس گاردنەردىڭ ءرولىن سومداعان ۋيلل سميت ەڭ ۇزدىك ەر ادام ءرولى ءۇشىن «وسكاردى» يەلەندى. 

ءوز ءومىرى تۋرالى سىر شەرتە وتىرىپ گاردنەر «ەشنارسەنى وزگەرتپەس» ەدىم دەيدى. «بالا كەزىمدە مەن ءوز بالالارىم قيىندىق كورمەس ءۇشىن قينالدىم. بەس جاسىمدا مەنىڭ بالالارىم اكەلەرىنىڭ كىم ەكەنىن بىلەتىن بولادى دەپ وز-وزىمە ۋادە بەرگەنمىن. ال ءومىرىمنىڭ قالعان بولىگى ءوزىم قالاعانداي بولدى. ويتكەنى مەن ءبارىن دۇرىس جاسادىم»، - دەيدى گاردنەر.

شابىت بەرگەن اناسى

بولاشاق ميلليونەر ۆيسكونسيندەگى ميلوۋكي قالاسىندا دۇنيەگە كەلدى. ول ءوزىنىڭ تۋعان اكەسى تۋرالى ەشنارسە بىلمەدى. اناسى بەتتي دجينمەن جانە ۇنەمى اراق ءىشىپ، ونى مازاق ەتەتىن وگەي اكەسىمەن بىرگە جوقشىلىقتا ءومىر ءسۇردى. كۇيەۋىنەن ازاپ كورگەن اناسى ونى ابايسىزدا ءولتىرىپ الىپ، جازاسىن وتەگەنشە ول ءبىراز ۋاقىت اسىراندى بالا بولدى. وسىنداي قيىن بالالىق شاعىنا قاراماستان گاردنەر اناسىنىڭ ءوزىن ۇنەمى شابىتتاندىراتىنىن ايتۋدان جالىققان ەمەس.

«مەنىڭ انام كۇن سايىن «ۇلىم، سەن قالاعان ماقساتىڭا قول جەتكىزىپ، ءوزىڭ قالاعانداي ادام بولا الاسىڭ» دەپ قايتالاي بەرەتىن، قاراپايىم انالاردىڭ ءبىرى بولاتىن. ال مەن وعان سەندىم. وعان 100% كوزىم جەتتى» - دەيدى گاردنەر.

باقىتتى ءسات

ارينە، گاردنەر تابىسقا بىردەن قول جەتكىزگەن جوق. ورتا مەكتەپتى اياقتاعاننان كەيىن ول اقش اسكەري-تەڭىز كۇشتەرىنىڭ قاتارىندا اسكەردە بولدى.1974-جىلى اسكەري مىندەتىن ۇزدىك اياقتاعان گاردنەر سان-فرانسيسكوعا كەلىپ، وندا مەديسينالىق جابدىقتاردى ساتا باستادى. ءبىر كۇنى ءبىر كىسى قىزىل فەرراريىن ونىڭ كولىگىنىڭ جانىنا قويادى. جاس جىگىت ودان قالاي اقشا تاباتىنىن سۇراماق بولدى. مىنە، وسى ساتتەن باستاپ ونىڭ ءومىرى كۇرت وزگەرىپ سالا بەردى. ول بوب بريدجەس ەسىمدى بيرجالىق بروكەر بولىپ شىقتى. ءبىراز اڭگىمەلەسكەننەن كەيىن، گاردنەر وعان ءوزىن وسى كاسىپتە سىناپ كورگىسى كەلەتىنىن ايتتى.

ولار تاعى دا كەزدەسەتىن بولىپ كەلىستى. ءدال وسى بريدجەس گاردنەردىڭ DWR كومپانياسىنا جۇمىسقا كەلۋىنە مۇرىندىق بولدى.

اڭگىمەلەسۋدەن بىرنەشە كۇن بۇرىن كريستى كولىگىن دۇرىس قويماعاندىقتان سالىنعان ايىپپۇلدى تولەمەگەنى ءۇشىن تۇتقىنداپ كەتكەن بولاتىن. ءبىراق ول ءبارىبىر اڭگىمەلەسۋگە كەلدى. تەك، ۇستىندە تۇتقىندالعان كەزدەگى كونە كراسسوۆكيى مەن جەلەتكەسى بولعان ەدى.

سىرتقى تۇرىنە قاراماستان ول جۇمىسقا قابىلداۋشىلاردى ءوزىنىڭ العىرلىعىمەن، ىنتاسىمەن باۋراپ الدى دا، ونى تالىمگەرلىككە بىردەن قابىلدادى.

ءومىردى قايتا باعالاۋ

^{كريس گاردنەر ۇلىمەن.}

2012 جىلى – فيلم شىققاننان كەيىن التى جىلدان سوڭ گاردنەردىڭ ءومىرى تاعى دا تۇبەگەيلى وزگەردى. ونىڭ 55-جاسار جارى قاتەرلى ىسىكتەن كوز جۇمدى. بۇل وقيعا وعان ۋاقىتىن قالاي پايدالانىپ جۇرگەنى تۋرالى وي سالدى. قارجى سالاسىنداعى تابىستى وتىز جىلدان كەيىن ول ءوزىنىڭ مانساپ جولىن تۇبەگەيلى وزگەرتۋگە شەشىم قابىلدادى.

«سوڭعى رەت ايەلىممەن سويلەسىپ وتىرعانىمدا، ول مەنەن: «ءومىردىڭ قانداي قىسقا ەكەنىن بىلگەننەن كەيىن، قالعان كۇندەرىڭدى قالاي وتكىزبەكشىسىڭ؟» دەپ سۇراعان. مۇنداي اڭگىمەدەن كەيىن ءبارى وزگەرەدى. مەن ءقازىر بارىنە قايتالاپ ايتامىن، ەگەر ادام جۇرەگىنىڭ تۇكپىرىندە جاتقان ويلارىن جۇزەگە اسىرماسا، وندا كۇن سايىن وز-وزىمەن ىمىراعا كەلە الماي جۇرەدى.

ول ەندى ءوزىنىڭ ينۆەستيسيالىق بانكير بولىپ جۇمىس ىستەگىسى كەلمەيتىنىن ءتۇسىنىپ، موتيۆاسيالىق ءدىلمارلىق پەن جازۋشىلىقتى قولعا الدى. 

ءقازىر ول جىلدىڭ 200 كۇنى الەمدى ارالاپ، ەلۋدەن اسا ەلدەگى تىڭدارماندارىنىڭ الدىندا ءسوز سويلەيدى.

گاردنەر ءوز تاجىريبەسى ادامداردىڭ بارلىعى – وسكەن ورتاسىنىڭ جەمىسى دەگەن تەوريانى جوققا شىعاراتىنىنا سەنىمدى.

«مۇنداي تەوريا بويىنشا مەن ماسكۇنەم، ساۋاتسىز، ايەلىن، بالا-شاعاسىن ۇراتىن جولى بولمايتىن ەركەك بولۋىم كەرەك ەدى»، - دەپ ەسەپتەيدى ول.

ءبىراق گاردنەر ءوزىنىڭ دۇرىس شەشىم قابىلداعانىنا سەنىمدى. بۇل ءۇشىن ول اناسىنىڭ ماحابباتى مەن باسقا ادامداردىڭ قولداۋىنا قارىزدارمىن دەپ ۇنەمى ايتىپ جۇرەدى.

«مەن انامنىڭ جانە ەشقانداي تۋىستىق بايلانىسى جوق ادامداردىڭ بويىنان نۇردى كوردىم. ول نۇردى كورىپ قانا قويماي، جانىما جاقىن تارتىپ قابىلدادىم»، - دەيدى ميلليونەر.

---