"قاشىقتىقتان وقىتۋدان" قاشپاڭىز!
الەم كۇن سايىن جاڭارۋدا. كۇن سايىن ءتۇرلى جاڭالىقتار اشىلۋدا. كۇن سايىن جاڭا جوبالار ىسكە اسىرىلۋدا. كۇن سايىن بۇل ءومىردىڭ بىزگە دايىنداعان سىيى ارتۋدا. سوندىقتان ءار كۇنگە جاڭاشا كوزقاراسپەن قاراۋعا دايىن بولۋ كەرەك.
الەمدەگى سوڭعى بولعان وقيعالار بۇكىل ادامزاتتى ءدۇر سىلكىندىردى. ەلىمىزدەگى مەگاپوليستەردىڭ كارانتينگە جابىلۋى، جۇمىستىڭ توقتاۋى، قوعامدىق شارالاردىڭ كەيىنگە شەگەرىلۋى – ءبارى بىزدەر ءۇشىن كۇتپەگەن جاڭالىق. ال، ەڭ ۇلكەن وزگەرىس – مەكتەپتەردىڭ قاشىقتىقتان وقىتۋعا كوشۋى. ارينە، بۇل وقۋشىلار تۇرماق، مۇعالىمدەر مەن اتا-انالار ءۇشىن دە قيىنداۋ بولىپ تۇر. كوكەيدە ساۋال كوپ. دەگەنمەن، ىشتەگى قورقىنىش، ۇرەي، سەنىمسىزدىككە قاراماستان العا قاراي قادام جاساۋ ماڭىزدى.
ءبىلىم بەرۋ بۇل ەل بولاشاعى ءۇشىن اسا جاۋاپتى ءۇردىس ەكەنى ءمالىم. سوندىقتان ءبىلىم بەرۋ سالاسىنا قاي مەملەكەتتە بولماسىن ۇلكەن جۇك ارتىلادى. ال قازىرگى جاعدايدا ساپالى، ەڭ باستىسى ناتيجەلى ءبىلىم بەرۋ ءۇردىسىن ۇيىمداستىرۋ ەكى ەسە قيىنداي تۇسەتىنى انىق. دەسە دە، بارشا ارىپتەستەرىمە «قاشىقتىقتان وقىتۋدان» قاشپاۋعا كەڭەس بەرەمىن!
قاشىقتىقتان وقىتۋ ەرتە مە، كەش پە بىزگە جەتەتىن ەدى. ويتكەنى بۇل – زامان تالابى. اقپاراتتاندىرىلعان عاسىردا وزىق تەحنولوگيانىڭ ۇزدىك جەمىستەرىن پايدالانۋ – دامىعان ەلدەردىڭ شەشىمى. سوندىقتان ەلىمىز ءۇشىن بۇل دا ءبىر جاڭا بەلەس، جاڭا شىڭ! ەندەشە، سىزدەرمەن قاشىقتىقتان وقىتۋعا ارنالعان باعدارلامالارمەن بولىسەيىن.
1. Google Classroom قوسىمشاسى
بۇل قوسىمشا كومپيۋتەرمەن دە، ۇيالى تەلەفونمەن دە كىرۋگە ىڭعايلى. ۇيالى تەلەفون ءۇشىن الدىن الا باعدارلاماسىن جۇكتەپ الۋ قاجەت. مۇعالىمدەر دە، وقۋشىلار دا gmail پوشتا ارقىلى تىركەلۋ قاجەت. ءتىپتى، مەكتەپتى دە تىركەۋگە بولادى. بۇل مەكتەپ اكىمشىلىگى ءۇشىن مۇعالىمدەر مەن وقۋشىلاردىڭ جۇمىسىن قاداعالاپ وتىرۋعا ىڭعايلى بولارى ءسوزسىز. ءمۇعالىم رەتىندە تىركەلگەننەن كەيىن ءسىز ءوز پانىڭىزگە ارناپ ارنايى كۋرس اشۋ مۇمكىندىگىنە يە بولاسىز. كۋرستى سىنىپتار مەن پاندەرگە قاراي ءبولىپ اشۋعا دا بولادى. ءار كۋرستىڭ ءوزىنىڭ كودى بولادى. وقۋشىلار كۋرسقا سول كود ارقىلى تىركەلە الادى. كۋرستا وتىلەتىن تاقىرىپتى كۇن سايىن جاريالاپ وتىرۋعا نەمەسە الدىن-الا دايىنداپ، ساباق كەستەسىنە ساي كۇندى، ۋاقىتتى بەلگىلەپ، جوسپارلاپ جاريالاۋعا مۇمكىندىك بار. ياعني، ءبىر سىنىپقا ارنالعان ساباقتاردىڭ بارلىعىن دايىنداپ قويىپ، ساباقتىڭ شىعاتىن كەستەسىن بەلگىلەپ قويساڭىز، ول ءوزى اۆتوماتتى تۇردە جاريالانىپ وتىرادى. وقۋشىلارعا تاپسىرمالاردى تەست تۇرىندە، بەينەماتەريال نەمەسە پرەزەنتاسيا تۇرىندە ۇسىنۋعا بولادى. ءار تاپسىرما باعالاۋ كريتەرييلەرىن ەنگىزە الاسىز. وقۋشىلاردان جۇمىسىن جىبەرگەندە سىزگە حابارلاما كەلەدى جانە ولار ءبىر-بىرىنىڭ جۇمىستارىن كورە المايدى. مۇنداي وقۋشىمەن كەرى بايلانىس جاساۋ مۇمكىندىگى دە قاراستىرىلعان. ءار وقۋشىنىڭ جۇمىسىنا ءوزى عانا كورە الاتىن جەكە كوممەنتاريي قالدىرۋعا بولادى. وقۋشى جۇمىسىن داپتەرگە ورىنداپ، سىزگە سۋرەتكە ءتۇسىرىپ جىبەرگەن جاعدايدا، ونىڭ قاتەلەرىن بەلگىلەپ، پىكىر قالدىرا الاسىز. ەڭ باستىسى، بۇل قوسىمشادا ارنايى جۋرنال بولادى. كىمنىڭ قاي ۋاقىتتا تاپسىرعانىن، قانشا بالل العانىن قاداعالاپ وتىراسىز. سونىمەن قاتار وقۋشىلاردان كەلگەن فايلداردىڭ بارلىعى Google ديسكتە ساقتالادى. كەز كەلگەن ۋاقىتتا قولجەتىمدى بولادى.
2. Learningapps قوسىمشاسى
بۇل – ساباقتى تۇرلەندىرۋگە ارنالعان قوسىمشا. ءداستۇرلى ساباقتارمەن وقۋشىلاردىڭ قىزىعۋشىلىعىن تومەندەتىپ الۋىڭىز ىقتيمال. سول سەبەپتى Learningapps ارقىلى ءار ساباقتى قىزىقتى فورماتتا وتكىزىڭىز. مۇندا وقۋشىلاردى ءوزىڭىز تىركەپ، لوگين پارولدەرىن ۇلەستىرۋگە نەمەسە qr كودپەن ءبولىسىپ، وقۋشىلاردىڭ وزدىگىنەن تىركەلۋىنە بولادى. ارنايى باعدارلاما جۇكتەۋدىڭ قاجەتى جوق، سايتقا كىرىپ، ونلاين تۇردە قولدانا بەرەسىز. ۇيالى تەلەفون ارقىلى دا كىرۋگە بولادى.
3. Telegram
ءيا، بۇل – بارىمىزگە بەلگىلى مەسسەندجەر. بارلىق وقۋشىنىڭ جىلدامدىعى جوعارى عالامتورعا شىعاتىن مۇمكىندىگى جوق. بۇل ورايدا مەسەندجەرلەردى پايدالانۋعا بولادى. سونىڭ ىشىندە ەڭ ءتيىمىدىسى وسى Telegram دەپ سانايمىن. كومپيۋەر ارقىلى دا، ۇيالى تەلەفونمەن دە كىرە الاسىز. مۇندا كانال اشىپ، وقۋشىلارعا سول كانالدىڭ سىلتەمەسىن جىبەرۋگە بولادى. كانالدى كۇندەلىكتى ساباقتارىڭىزدى، تاپسىرمالاردى جاريالاپ وتىراسىز. ءبىر پايداسى وقۋشىلار مۇنداي جازا المايدى، تەك باقىلاپ، كورىپ وتىرا الادى. ال سۇراقتارىن جەكە حات ارقىلى جولدايدى. سونىمەن بىرگە قىسقاشا ساۋالناما ۇيىمداستىرۋعا دا بولادى.
ءقازىر قاشىقتىقتان وقىتۋعا ارنالعان باعدارلامالار وتە كوپ. دەگەنمەن، بۇل ۇسىنىلعان قوسىمشالار ەڭ ءتيىمدى جانە قولجەتىمدى دەپ سانايمىن. ەندەشە، ىسكە ءسات، ارىپتەستەر!
You Might Also Like
-
قاراتاۋ ەلىنىڭ دوساي اۋىلىندا ەسالى دەگەن بولىپتى. ول بالا-شاعامەن دە، كەلىن-كەپشىنمەن دە قالجىڭداسا بەرەتىن اق كوڭىل، اڭقاۋ كىسى ەكەن. ەسالى جازدىڭ ءبىر كۇنىندە تۇركىستان ماڭىنداعى قۇرداسىنىڭ ۇيىنە...
-
ەرتەرەكتە قۇدا-جەكجاتتاردىڭ اراسىندا ءوزارا قارىم-قاتىناس قارىشتاپ تۇرعان كەزدە كوكتەۋباي دەگەن اقساقال ارتىنىپ-تارتىنىپ، الىستاعى قۇداسىن ىزدەپ بارادى. كوپ جىل كورىسپەگەن جەكجاتىنا جەتكەن سوڭ ساعىن...
