قايران ءبىزدىڭ شەشەلەر!
اردى ويلاعان،
شىلىك شاۋىپ، شي ورىپ، باۋ بايلاعان.
جىگىتتەردەن ايرىلىپ، قالماي قاراڭ،
قىرمان باسىپ، ەگىن caپ اربا ايداعان.
شالبارلانىپ كويلەگىن،
شارت بۋىنىپ،
شارۋانىڭ قوستارىن تارتتى بۋىپ.
ءقاۋىپ تونسە،
قىزعانشاق جولبارىستاي،
اتىلاتىن جاۋىنا جالت بۇرىلىپ.
ۇيىقتامايتىن،
تەك قانا كوز ىلەتىن،
كوزىن ىلسە، ەرىمەن كەزىگەتىن.
ايەلدىگىن ۇمىتىپ كۇنى بويى،
تۇندە عانا،
جاتاردا سەزىنەتىن.
قايران ءبىزدىڭ جەڭگەيلەر!
وسكەن ەرەن،
ەگىن ورىپ، باۋ بايلاپ، دەستەلەگەن.
الاقانداي اق شىتقا مۇڭىن شاعىپ.
حات جازاتىن، كەشكىسىن، كەستەمەنەن.
قارايىپ، كەشەگى اپپاق ماڭدايلارى،
اڭىزاقتا قاڭسيتىن تاڭدايلارى.
كوزدەرىندە تۇراتىن كۇندەرىمنىڭ
كوكتەگەنى دالانىڭ سارعايعانى.
قايران ءبىزدىڭ ءومىردىڭ - بالقايماعى
ءبىر بۇيىمى - ءبىر ۇيگە مۇرا بولار،
قايران ءبىزدىڭ اتايلار - عۇلامالار
العىس ايتىپ، تاڭىرگە قارعىس ايتىپ،
ايدالادا، اۋلاقتا جىلاپ الار.
جىلاپ الىپ،
قايتادان قۋاتتانىپ،
ەگىنجايعا كەلەتىن بۇلاقتى الىپ.
توقتاپ قالعان تىرلىكتىڭ ماشيناسىن
جۇرگىزەتىن، ءبىر جەرىن بۇراپ قالىپ.
قايران جاندار!
قايران جاندار!..

---