InfoHub Logo

قۇرمانعازى ورال تۇرمەسىندە جاتىپ قالادى. بۇل تۇرمەنىڭ وردا تۇرمەسىندەي ەمەس، مىقتى ەكەنىن كورىپ، قۇرمانعازى ءبىرا ناليدى. بىرنەشە كۇن ەشكىممەن كەڭەسپەي، وزىمەن-وزى بولىپ، قالىڭ ۋايىم تەڭىزىنە باتادى. ءبىر كۇنى قىسقا سەرۋەن كەزىندە لاۆوچكين دەگەن ورىس تۇتقىنىمەن تانىسادى. ول «اق پاتشاعا ءتىلى تيگەنى ءۇشىن» قامالعان ورىس جۇمىسكەرى بولىپ شىعادى. ءوزى قازاق اراسىندا كوپ بولىپ، قازاقشانى سۋداي بىلەتىن بولادى. ول قۇرمانعازىنى جۇباتىپ، كوپتەگەن اقىل ايتىپ، ءوزىنىڭ ومىرىنەن ءبىراز شەجىرە ايتادى. ەكەۋى ەندى ايىرىلماس دوس بولىپ، سىرلاسىپ، اقىلداسىپ وتىراتىن بولادى.

قۇرمانعازى لاۆوچكينگە ءوزىنىڭ وسى جولعا شىعارداعى باسىنان كەشكەن ءبىر اڭگىمەسىن بايانداپ بەرەدى:

«اقبايەۆتىڭ اتارمان-شابارماندارى ۇستاپ الىپ، كوك ارباعا تىركەپ، ەندى جۇرگىزەيىن دەپ تۇرعاندا شەشەم القا كەلە جاتقانىن كوردىم. الپەشتەپ وسىرگەن اناما ءالى كۇنگە ءبىر قىزمەت ەتە الماي، ونى ۇنەمى قاۋىپ-قاتەردە، جوقشىلىقتا ۇستاپ كەلگەنمىن. ەندى، مىنە، كوپ جىلدان سوڭ كەلگەندە تاعى دا ونى پۇشايمان ەتىپ كەتىپ بارا جاتقانىم ويىما ءتۇسىپ، شىداي الماي كوزىمنەن ءبىر تامشى جاس شىعىپ كەتتى. سوندا، قايران شەشەم مەنىڭ قاسىما كەلىپ: «مەن ۇل تاپتىم دەپ جۇرسەم، جامان، جاسىق نەمە ەكەن عوي، تۋعانىم. كىمنىڭ الدىندا كوزىڭنىڭ جاسىن شىعارىپ
تۇرسىڭ؟!» دەپ جاعىمنان شاپالاقپەن تارتىپ-تارتىپ جىبەردى. سوندا عانا مەن انتەكتىك جاساعانىمدى سەزدىم. اناما كۇلە قاراپ قوش ايتىستىم»، — دەيدى.

قۇرمانعازىنىڭ بۇل اڭگىمەسى لاۆوچكينگە ۇلكەن اسەر ەتەدى. ول ءوزىنىڭ شەشەسىنىڭ تالاي مەيىرباندى ىستەرىن ەسىنە الىپ، ءبىراز اڭگىمە ەتەدى. قۇرمانعازى بولسا شەشەسىنىڭ جاس كەزىندە قانداي سوتقارلىعى بولسا دا كەشىرىپ، قانداي تەنتەكتىگى بولسا دا ساعىربايدان اراشالاپ، قالاي دا قۇرمانعازىنى قاقپايلاماي، بىر-بەتكەي ەتىپ وسىرۋگە تىرىسقانىن، ونداي تاربيەنىڭ قۇرمانعازى ومىرىندە ۇلكەن ءرول ويناعانىن كۇيشى قايتا-قايتا ەسىنە ءتۇسىرىپ، نەبىر ەركەلىكتەرىن كوز الدىنا ەلەستەتىپ، كورەر تاڭدى كوزىمەن اتىرادى. قاتار جاتقان لاۆوچكين دە وزىمەن-وزى سىرلاسىپ، ول دا اۋناقشىپ ۇيىقتاي الماي شىعادى.

ەرتەڭىندە قۇرمانعازى ويلانىپ-تولعانىپ، قولىنا دومبىراسىن الىپ، قولى حات بىلمەسە دە، ارداقتى اناسىنىڭ ايتا قالعانداي «جازاسىن» قاعاز بەتىنە تۇسىرەتىن مۇمكىنشىلىگى بولماسا دا، دومبىرانىڭ قوس ىشەگىندە ءبىر ەسكەرتكىش قالدىرايىن دەپ كۇي شەرتتى. ونى لاۆوچكينگە تارتىپ بەرگەندە ەكەۋىنىڭ ەرلىگى دە ءبىر ءسات كەيىنگى پىلانعا شىعا تۇرىپ، كىشكەنە كوز جاستارىن توگىپ الدى. ءبىراق ءومىردىڭ نەبىر وتكەل بەرمەس اسۋلارىن، اسقار بەلدەرىنەن وتكەن قايراتتى جىگىتتەر تەز وزدەرىن-وزدەرى جيناپ الىپ، كۇيدى قايتا-قايتا ورىنداپ، تىڭداپ، ونىڭ ىشىندە تەك ساعىنىش نوتالارى عانا ەمەس، كۇش-قۋات بارىن، ءتىپتى سارتىلداپ قاشىپ بارا جاتقان اتتىڭ تۇياعىنىڭ سارىنى بارىن ەستىگەندە، ءبىرىن-بىرى ءتىلسىز ءتۇسىنىپ، ول سارىننىڭ ارمان داۋسى ەكەنىن ءبىلىپ قويدى. اقىلداسىپ كەلىپ كۇيدىڭ اتى «قايران شەشەم» بولدى.

---