InfoHub Logo

قۇرمانعازى مەن لاۆوچكين سول ءتۇنى تۇرمەدەن قاشىپ كەتەدى. اينالانى شارلاپ تاستاعان. كۇيشى نەبىر جىرا-جىقپىلدى تاۋىپ، ساتتە-اق قارالارىن كورسەتپەي الىستاپ كەتەدى. ونىڭ ۇستىنە جاردەمدەسكەن كۇزەتشى دە قۇعىنشىلاردىڭ ماڭدايىن باسقا جاققا بۇرىپ جىبەرىپ، بۇلارعا ءبىراز ۋاقىت ۇتقىزادى. يەن دالاعا شىققان سوڭ، بۇلار ەركىنىرەك جۇرەدى. ءبىر كۇن، ءبىر ءتۇن ءجۇرىپ، تاڭ اتا لاۆوچكيننىڭ ءبىر تانىس بالىقشىسىنىڭ ۇيىنە كەلىپ دەم الىپ، تاماقتانادى. بىرنەشە كۇن تىنىققان سوڭ، قۇرمانعازى تۇرمە دوسىنا ءوزىنىڭ ەلىنە قايتۋ كەرەكتىگىن، وندا قالعان اتا-انانىڭ حال-جايىن ءبىلۋ كەرەكتىگىن ايتادى. لاۆوچكين قيماس دوسىمەن ايىرىلۋدىڭ كەرەك ەكەنىن بىلسە دە، ءبىراز ۋاقىت تاعى وتىرىپ اڭگىمەلەسەدى. قۇرمانعازى قولىنا دومبىراسىن الىپ، تاعى ءبىر كۇي شەرتەدى. ول كۇيدىڭ بۇرىنعى ءوزى ەستىپ جۇرگەن كۇيلەرگە ۇقسامايتىنىن، كۇيشىنىڭ تاعى ءبىر شىعارماشىلىق جاڭالىعى ەكەنىن لاۆوچكين سەزەدى دە، ەشنارسە دەمەي تىڭداپ، ۇلكەن ويعا باتىپ وتىرا بەرەدى. كۇيدى اياقتاعان سوڭ، قۇرمانعازى لاۆوچكينگە قاراپ: «انانىڭ ءبارى دە — انا، قاي تىلدە سويلەسە دە، ولاردىڭ بالاعا دەگەن مەيىرباندىقتارىنىڭ ءتىلى اركىمگە دە تۇسىنىكتى، مىنا مەنىڭ جالپىعا ءتىلى تۇسىنىكتى كۇيىمدى سول ورىس اناعا — لاۋىشكەنگە ارنايمىن»، — دەيدى. قۇرمانعازىنىڭ «ۆ»، «چ» دىبىستارىنا ءتىلى كەلە بەرمەيتىن. سوندىقتان كۇيشىنىڭ ءوزى ايتقانداي، حالىق اراسىندا بۇل كۇي «لاۋىشكەن» اتانىپ تاراپ كەتتى. دوسىنىڭ مۇنداي سىي تارتقانىنا لاۆوچكين قاتتى ريزا بولىپ، ءوزى دومبىرا تارتا المايتىنىنا قىنجىلىپ، ءبىراق: «سەنىڭ قولىڭنان بۇل كۇي حالىققا جايىلادى عوي، شەشەمە كورگەندە ايتارمىن» دەپ ۋادە بەرىپ، قۇشاقتاسىپ قوشتاسىپ، ەكەۋى ەكى جاققا ءجۇرىپ كەتەدى.

 

---