InfoHub Logo

مۇندا قاشان تۇسكەنىن بىلمەيدى. جەر باۋىرى جىلىنعالى ءوزىنىڭ باس كوتەرگىسى كەلىپ، ەرەكشە ءبىر سەزىم ءون بويىندا تۋلاپ جاتقانىن سەزدى. ءبىراق، ەڭسەسىن قانشا كوتەرەيىن دەسە دە، بويىن تىكتەي الار ەمەس. اسىرەسە سوڭعى كەزدەرى جاڭبىر كوپ جاۋىپ، توپىراقپەن بويىنا ءنار جۇگىرگەلى اساۋ سەزىم ءتىپتى بۇلقىنىپ كەتتى. بۇرىنعىداي ەمەس، دەنەسىنە جىلۋ دا كوپ كەلەتىن بولدى. ول ءوزىن قۇرساۋىنان شىعارماي تۇرعان اسفالتتان سۇرادى:

— بىلەسىز بە، ماعان بۇل جەردەن باسقا ءبىر كەرەمەت الەم بار سياقتى سەزىلەدى. ول تۋرالى ەستىگەن بە ەدىڭىز؟

— ەستىدىم. ءتىپتى، مەن سول الەمدى كۇندە كورەمىن.

— كەرەمەت! مەن دە سول الەمدى كورسەم بولا ما؟ – دەپ ءۇمىت وتى ويانعان نازىك ساباق قۋانىپ.

— جوق، سەن ونى ەشقاشان كورە المايسىڭ! ويتكەنى، سەن تىم ءالجۋازسىڭ. – دەپ ءمىز باقپادى اسفالت. نازىك ساباقتىڭ ۇنجىرعاسى ءتۇسىپ كەتتى.

راسىمەن دە ءالجۋاز ساباقتارىمەن قايدا بارماق؟ ءبىراق، ول ارمانىنان باس تارتپادى. بىردە يلەۋ قازعان ءبىر قۇمىرسقانىڭ جولى تۋرا بۇك ءتۇسىپ جاتقان نازىك ساباقتىڭ ۇستىنەن ءوتتى. جىبىرلاعان تىرشىلىك يەسىن كورگەن گۇل ودان دا جارىق الەم تۋرالى سۇرادى:

— ءسىز جارىق الەمنەن كەلدىڭىز بە؟

— ءيا. ال سەن نەگە بۇك ءتۇسىپ جاتىرسىڭ؟

— مەن تىم ءالجۋازبىن. جارىق الەمدى كورسەم دەگەن ارمانىم بار. ءبىراق، ونى ەشقاشان كورە المايسىڭ دەدى.

— كىم ايتتى؟

— اسفالت.

— سونى دا ءسوز دەپ! تاس ايتتى دەپ باسىڭدى تاسقا سوقپاقسىڭ با؟ ارمانىڭنان باس تارتپا. ءجا، مەن كەتتىم. جۇمىسىم باستان اسادى. جارىق الەمدە كەزدەسكەنشە، - دەپ قۇمىرسقا اسىعىس ءجۇرىپ كەتتى. قىسقا تىلدەسۋ نازىك ساباقتىڭ جىگەرىن جانىدى. ول توبەسىنەن تونگەن اسفالتتان ءبىر ساڭىلاۋ تابۋعا تىرىسقان نازىك ساباقتارىمەن ءالسىز جاپىراقتارىن تىرەۋ قىلىپ تيتتەي جارىقتاردان العا ۇمتىلدى. بۇعان ءمىز باقپاعان اسفالت ءبىراز ۋاقىتتان كەيىن ءوزىن جارىپ شىعۋعا تىرىسىپ جاتقان تىرشىلىككە قاراپ مىسقىلداي كۇلدى:

— ءاي، ءالسىز ساباق، قايدا اسىقتىڭ؟ سەن نە، مەنىڭ مىقتى قۇرساۋىمدى جارىپ شىعا الامىن دەپ ويلايسىڭ با؟

— ارينە! قيىندىقتىڭ قۇرساۋى ءبىر كۇندە ەمەس، ءار ءسات سايىنعى كۇرەسپەن قيرايدى ەمەس پە؟ – دەپ جاۋاپ قاتتى ءالسىز ساباقتار.

— كورەرمىز، - دەپ مىرس ەتتى اسفالت. ول ءوزىنىڭ بەرىكتىگىنە ەشقاشان كۇماندانعان ەمەس.

— كورەرمىز، - دەدى نازىك ساباق. ول نازىك بولسا دا، قايسار ەدى.

وسىلايشا كۇندە ءالجۋاز ساباقتارىمەن اسفالتتىڭ قاباتىن يتەرە بەردى. ءار كۇنگى كۇرەس سايىن ول تامىرىنىڭ تەرەڭدەپ، ساباعىنىڭ جۋانداي باستاعانىن سەزدى. اسفالت تا قارىسىپ باقتى. نازىك ساباقتار دا العان بەتىنەن قايتپادى.

بۇگىن بويىن ەرەكشە قۋات پەن قۋانىش بيلەگەن ساباق بار كۇشىن سالىپ كىشكەنتاي ساڭىلاۋدان كەڭ الەمگە شىقتى. كۇننىڭ نۇرى! قانداي كەرەمەت ەدىڭ! بويىنا بىردەن جىلۋ جۇگىردى. جارىق الەم، كەڭ الەم وسى ەكەن عوي. تاپ-تازا كوك اسپاندا اپپاق كەمەدەي اقشا بۇلتتار ءجۇزىپ ءجۇر. قۇستار سايراپ، قۇرت-قۇمىرسقا جۇگىرىپ، تىرشىلىك قازانى قىز-قىز قايناۋدا. ونىڭ الىپ-ۇشقان كوڭىلى وسى كەرەمەت الەمنىڭ بار ەكەنىن بىلگەن ەكەن عوي. بولاتتاي بەرىك اسفالتتى جارىپ شىققان نازىك ساباقتارعا بار تىرشىلىك تاڭىرقاي قارادى. ونىڭ قايسارلىعىنا تاڭ-تاماشا قالدى. الىستاعى كۇننىڭ ءوزى وعان جىلۋىن اياماي توكتى. ەرتەسى جاپىراقتارىن جەرگە بەكىتكەن نازىك ساباقتاردان ادەمى كۇلتەلەر باس كوتەردى. بۇل ادەمى گۇل ەكەن. قايسار گۇل. ءاسفالتتىڭ ءوزى جەڭىلگەنىن مويىنداپ، قايسار گۇلگە تومەننەن قاراپ جاتتى. زۋ-زۋ ەتىپ ءوتىپ جاتقان كولىكتەگى ادامدار دا، «انانى قارا، ءاسفالتتى جارىپ گۇل ءوسىپ شىعىپتى! قانداي كەرەمەت!» دەپ تاڭىرقاستى.  ومىردە كوپتەگەن قيىندىق كورىپ، كۇرەسە الماي جۇرگەن جاندار ءاسفالتتى جارىپ شىققان نازىك گۇلدەن ۇلگى الىپ، ومىرلەرىن قايت باستاپتى. قايسار گۇل وسىلايشا باسقالاردىڭ ارمانىنا جىگەر بەرىپ، ءوز ارمانىنا جەتىپتى.

---