InfoHub Logo

ءبىر جولى تولەۋ، ءۋايىس، نىسانباي اقىندار ساپارلاس ءجۇرىپ، ءبىر ۇيگە قوناق بولادى. ءۇي يەسى بار بولسا دا، ساراڭ ەكەن. قوناقتاردى كوڭىلسىز قارسى الىپ، نيەتىمەن ءجون سۇراپتى دا، ۇشەۋىنىڭ كوڭىلدەرىن كوجەمەن اۋلاپ، وزدەرى قىزىل ىڭىردەن جاتىپ، قوناقتارىنا توسەك سالىپ قويعان ەكەن.

ءۇش اقىن جاتاردا سىرتقا شىققاندا كورشى ۇيدە قوناقتار بار ەكەنىن بايقايدى. ول ءۇيدىڭ قازاندىعىندا قىزىل وت لاۋلاپ جانىپ، توقتىنىڭ جاس ەتى بىلقىلداپ ءپىسىپ جاتادى. بۇل جايدى كوڭىلدەرىنە تۇيگەن ۇشەۋى ۇيگە ەنەدى. كيىمدەرىن شەشىپ، شامدى ءوشىرىپ، جاتۋعا ىڭعايلانعاندا، بايقاسا، كورشى ءۇيدىڭ قازاندىعىنداعى وتتىڭ جارىعى ەسىكتىڭ ساڭىلاۋلارىنان وزدەرى جاتقان ءۇيدىڭ ىشىنە ءتۇسىپ تۇر ەكەن.

بۇل جاي ءۇش اقىننىڭ كوڭىلدەرىن الاڭداتىپ، ويلارىنا تۇرتكى، شابىتتارىنا قوزعاۋ سالادى. بىلقىلداپ ءپىسىپ جاتقان ەت ەسىنە ءتۇسىپ، ءۇي يەسىنىڭ ساراڭدىعىنا كۇيىنگەن نىسانباي:

— نىسانباي ءوزىم اتىس اكەم قويعان، — دەپ ولەڭدەتكەندە،

ءۋايىس؛

— بۇل نەسى باسىن باستاپ، سوڭىن قويعان، — دەپ ونىڭ ءسوزىن ءىلىپ اكەتەدى. ەكى اقىننىڭ سوزدەرىن تولەۋ قاعىپ اكەتىپ:

— قايناسا ءبىزدىڭ سور دا قايناپ جاتقان، مىناۋ ءۇي قوناعىنا توقتى سويعان، — دەپ ولەڭدەتە اياقتاپتى. قوناقتارىنىڭ ءبىرىنىڭ ءسوزىن ءبىرى ءىلىپ-قاعىپ ولەڭدەتكەنىنە قۇلاق ءتۇرىپ جاتقان ءۇي يەسى بۇلاردىڭ بەكەر ادامدار ەمەستىگىنە كوزى جەتىپ، جاتىپ قالعان توسەگىنەن تۇرىپ، ءۇش اقىننان كەشىرىم سۇراپ، ءتۇن ىشىندە قوي سويىپ، قازان اسقان ەكەن.

---