InfoHub Logo

ءبىلىم جانە عىلىم مينيسترلىگى وقۋشى سانى از مەكتەپتەر ءۇشىن بىرنەشە ءپان بويىنشا ءبىلىمى بار ۇستازدار دايارلاماق. بۇل تۋرالى بۇگىن ق ر پارلامەنت سەناتىنىڭ دەپۋتاتتارىمەن كەزدەسكەن ءبىلىم جانە عىلىم ءمينيسترى ەرلان ساعادييەۆ ءمالىم ەتتى.

«زاڭ بويىنشا، وقۋشى سانى از مەكتەپتەردى جابا المايمىز. قازىرگى ستاتيستيكاعا سۇيەنسەك، ەلىمىز بويىنشا وقۋشى سانى از مەكتەپتەردىڭ ۇلەسى 40 پايىزدى قۇرايدى. وسى ءبىلىم وردالارىندا بۇكىل وقۋشىنىڭ 8 پايىزى عانا ءبىلىم الىپ ءجۇر. ساباق ۇيرەتەتىن ۇستازداردىڭ پايىزدىق ۇلەسى - 22 پايىز. مىسالى، ءبىر وقۋشى عانا وقيتىن مەكتەپ ءۇشىن جارتى ميلليون تەڭگە ءبولىنىپ جاتادى. سوندىقتان، بۇل وتە ۇلكەن ماسەلە. سوندىقتان، وسى ماسەلەنى مىقتاپ قولعا الدىق. ماسەلەنى شەشۋدىڭ بىرنەشە جولىن قاراستىرىپ وتىرمىز. سونداي امالداردىڭ ءبىرى - وقۋشىنى باسقا مەكتەپكە تاسىپ تۇرۋ. بۇل ءتيىمدى شەشىم بولار ەدى، سەبەبى، اۆتوبۋستاردى جەرگىلىكتى بيلىك ساتىپ الادى. ەكىنشى باعىت - ينتەرنات. اتا-انا بالاسىن ينتەرناتقا سەنىپ تاپسىرۋى ءۇشىن ينتەرناتتاردى تەحنيكالىق جاعىنان تولىق جابدىقتاعىمىز كەلەدى.  دەگەنمەن، ينتەرنات ارقىلى تەك جوعارى سىنىپ وقۋشىلارىنىڭ ماسەلەسىن شەشە الامىز. ءۇشىنشى باعىت - بىرنەشە ءپان بويىنشا ءبىلىم بەرە الاتىن ۇستازداردى دايارلاۋ»،-دەدى ە.ساعادييەۆ.

مينيستر مىسال كەلتىرگەندەي، بيولوگيا مەن حيميا پاندەرىنەن، ماتەماتيكا مەن فيزيكا پاندەرىنەن، ماتەماتيكا مەن ينفورماتيكا پاندەرىنەن، تاريح پەن گەوگرافيا پاندەرىنەن ءبىر ءمۇعالىم ساباق بەرە الاتىنداي جاعداي جاساۋعا بولادى ەكەن. بيىلدان باستاپ ۇستازداردى تۇرعىلىقتى جەرىنە جاقىن قالالارعا اكەلىپ، 6-12 كۋرس ۇيرەتۋ جۇمىسى باستالعان. بۇل بىرىنشىدەن ۇستازداردىڭ جالاقىسىن كوبەيتسە، ەكىنشى جاعىنان وقۋشى سانى از مەكتەپتەردى جابدىقتاۋعا كەتەتىن شىعىندى ازايتپاق ەكەن.

---