InfoHub Logo

ەلىمىز ەگەمەندىگىن الىپ، ءوز الدىنا جەكە مەملەكەت بولعالى دا شيرەك عاسىردان اسىپ بارادى. وسى ۋاقىت ارالىعىندا قازاقستاننىڭ الەم ەلدەرى اراسىندا بەدەلى ارتىپ، ىشكى دامۋ ساتىلارىندا دا تالاي بيىكتەردى باعىندىرعانىن كوز كوردى، كوڭىل سەندى. ءبىرقاتار حالىقارالىق ۇيىمدارعا جەتەكشىلىك ەتتى، اۋقىمدى ءىس-شارالاردى ابىرويمەن اتقارىپ شىقتى. ەل تىزگىنىن ۇستاعان نۇرسۇلتان نازاربايەۆتىڭ بۇل باعىتتاعى اتقارعان ىستەرىنىڭ ورنى بولەك ەكەنى شىندىق، سونىڭ ىشىندە حالىقرالىق كەڭىستىكتە الەم ەلدەرىن بەيبىتشىلىككە شاقىرىپ ءۇن قاتۋى ادامزات بالاسىنىڭ الداعى تاعدىرى ءۇشىن اسا ماڭىزدى باستاما بولاتىن. ەلىشىلىك قاتىناستاردا، سونداي-اق سىرتقى ساياساتتا دا وسى باستاماسىن سوزىمەن دە، ىسىمەن دە جانداندىرۋعا بار كۇشىن سالدى.

ەل ىشىندە ۇلتارالىق تاتۋلىققا دەم بەرە وتىرىپ، تاۋەلسىزدىك العانعا دەيىنگى قالىپتاسقان جاعدايدى بىردەن وزگەرتۋگە ارەكەت جاسامادى. ەسەسىنە مەملەكەت قۇرۋشى ۇلتتىڭ ۇزاق ۋاقىتتاعى ارمان-تىلەگىن جۇزەگە اسىرۋدى ۇزاق مەرزىمدى دامۋ ساتىلارىنا نەگىزدەدى. قازاقى ۇعىم-تۇسىنىك تۇرعىسىنان العاندا «باتپانداپ كىرگەن اۋرۋدىڭ مىسقالداپ شىعاتىن» زاڭدىلىعىن ۇمىتقان جوق، قاراپايىم حالىقتىق فيلوسوفيانىڭ ءتۇيىندى تۇسىن الىس ماقساتتارعا ارقاۋ ەتە ءبىلدى. بىرنەشە عاسىرعا سوزىلعان بوداندىق ەزگىدەن ەسەڭگىرەگەن ەلدىڭ بولاشاعىن تىنىشتىقپەن بايلانىستىردى. قارۋ تۇرعان جەردە تىنىشتىق بولمايتىنىن تەرەڭنەن ءتۇسىندى، ءسويتتى دە يادرولىق قارۋدان ءوز ەركىمەن باس تارتتى. باسقاسىن ايتپاعاندا جاڭا زاماناعا ساي ەكونوميكاسى مەن قورعانىسى جاعىنان دا دەربەس ساياسات جۇرگىزىپ كورمەگەن قازاقستاننىڭ سول تۇستاعى جاعدايى قورعانسىزدىڭ كۇنىمەن بىردەي ەدى. سونداي ءبىر سىندارلى تۇستا قولدا بار قارۋدان باس تارتۋ اسا ۇلكەن ەرلىك پەن بولاشاققا دەگەن كورەگەن سەنىمدى قاجەت ەتەتىن ەدى. ن.نازاربايەۆتىڭ الاپات قارۋدان باس تارتۋ شەشىمىن سول كەزدە كوپشىلىك ءۇشىن اسا تۇسىنىكتى بولماعانى دا شىندىق...

بازيلجان ەرجان  م.ت.ءجۇمادىل. ت.ع.ك

---