قازاقستاندا كەيىنگى ءۇش جىلدا 41 IT مەكتەپ اشىلدى
كەيىنگى ءۇش جىلدا قازاقستاندا 41 IT مەكتەپ اشىلدى. ال، بيىلدىڭ باسىنان بەرى ولاردا 55 مىڭنان استام وقۋشى وقىپ جاتىر. بۇل – 2021 جىلمەن سالىستىرعاندا 3 مىڭعا كوپ.
ءىت مەكتەپتەر زاماناۋي قۇرال-جابدىقتارمەن جانە روبوتوتەحنيكا كابينەتتەرىمەن جابدىقتالعان. سونداي-اق، وقۋشىلار ءۇشىن بالالاردا سيفرلى ءبىلىم مەن داعدىلاردى دامىتۋعا باعىتتالعان ارنايى ءبىلىم بەرۋ باعدارلامالارى ازىرلەندى.
«وقۋ-اعارتۋ مينيسترلىگى ءبىلىم سالاسىنداعى سيفرلاندىرۋعا كوپ كوڭىل ءبولىپ وتىر. ءبىزدىڭ مەكتەپتەر ەلەكتروندى قىزمەتتەردى پايدالانادى، ونلاين وليمپيادالار، ونلاين جارىستار وتكىزەدى، قۇجاتتار ەلەكتروندى فورماتتا دا قابىلدانادى. جۋىردا ەلىمىزدە وتكەن تمد-عا مۇشە مەملەكەتتەردىڭ سەزىندە ارىپتەستەرىمىز سيفرلاندىرۋ ءبىلىم بەرۋ ۇدەرىستەرىنە قالاي ەنگىزىلىپ جاتقانىن ايتتى. ارينە، ءبىز بالالاردى سيفرلاندىرۋعا ۇيرەتۋدى قولداۋىمىز كەرەك. ول ءۇشىن ءىت مەكتەپتەردى كەڭىنەن اشۋدى قولعا الىپ وتىرمىز. ءىت مەكتەپتەردىڭ ەرەكشەلىگى – ءىت تەحنولوگيالار سالاسىنداعى ماماندانۋ، ەرتە پروفيلدەۋ، روبوتوتەحنيكا مەن باعدارلامالاۋدى تەرەڭدەتىپ وقىتۋ، 3D مودەلدەۋ. جىل سايىن IT مەكتەپتەردىڭ سانى ارتا بەرەدى»، - دەدى وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا كارىموۆا.
بۇگىنگى تاڭدا ءىت مەكتەپتەردە وقيتىن بالالار جالپى ءبىلىم بەرەتىن پاندەر مەن روبوتوتەحنيكا بويىنشا رەسپۋبليكالىق جانە حالىقارالىق وليمپيادالار مەن عىلىمي جوبالار بايقاۋلارىنا بەلسەندى تۇردە قاتىسىپ ءجۇر. بيىل يندونەزيادا وتكەن ينفورماتيكادان حالىقارالىق وليمپيادادا (IOI) وقۋشىلارىمىز 2 كۇمىس جانە 2 قولا مەدال جەڭىپ الدى. قازاقستان اتىنان بەدەلدى وليمپياداعا 4 وقۋشى قاتىستى. وقۋشىلارىمىز الەمنىڭ 90-عا جۋىق ەلىنىڭ 350-دەن استام قاتىسۋشىسىمەن باسەكەلەسىپ، جۇلدەلى ورىندارعا يە بولدى.
You Might Also Like
