InfoHub Logo

دارىندى جاستاردىڭ ەلدەن كەتۋىن ازايتۋ ماقساتىندا شەتەل ۋنيۆەرسيتەتتەرىنىڭ فيليالدارىن اشۋ جوسپارلانىپ وتىر. بۇل تۋرالى بۇگىن ۇكىمەت وتىرىسىندا ق ر پرەمەر-مينيسترى اسقار مامين ايتتى.

«ءبىلىم سالاسىن دامىتۋ ماسەلەلەرى وتە وزەكتى ءارى ماڭىزدى ەكەنىن بىلەسىزدەر. باسەكەگە قابىلەتتى ادامي كاپيتالدى دامىتۋ - «ءبىلىم ەكونوميكاسىنا» كوشۋدىڭ نەگىزگى فاكتورى. سوندىقتان قوعامدا ءبىلىم بەرۋگە ءارقاشان ەرەكشە تالاپتار قويىلىپ، ۇلكەن نازار اۋدارىلادى. وسىعان وراي، «Nur Otan « پارتياسىنىڭ باعدارلاماسىن ىسكە اسىرۋ اياسىندا ءبىلىم بەرۋدىڭ مازمۇنىن جاڭارتۋ، ونىڭ جاڭا ينفراقۇرىلىمىن قۇرۋ، پەداگوگتار مەن وقۋشىلاردى الەۋمەتتىك قولداۋ بويىنشا ناقتى شارالار ازىرلەندى»، - دەدى ۇكىمەت باسشىسى.

ونىڭ اتاپ وتۋىنشە، 2024 جىلعا قاراي پەداگوگتاردىڭ جالاقىسى مەن ستۋدەنتتەردىڭ شاكىرتاقىسى 2 ەسە وسەدى. 800 جاڭا مەكتەپ سالىنىپ، 5000 اۋىل مەكتەبى جاڭارتىلادى. كوللەدجدەردە 9 سىنىپتىڭ نەگىزىندە ءبىلىم بەرۋ تولىعىمەن تەگىن بولادى. 10 كوللەدج بيزنەسكە سەنىمگەرلىك باسقارۋعا بەرىلدى.

«بۇل تاجىريبەنى ودان ءارى جالعاستىرۋ قاجەت. ۋنيۆەرسيتەتتەردىڭ ءبىلىم بەرۋ باعدارلامالارى كاسىبي ستاندارتتاردىڭ نەگىزىندە 100 پايىز جاڭارتىلادى. بۇل تۇلەكتەردىڭ جۇمىسقا ورنالاسۋ مۇمكىندىگىن ارتتىرادى. دارىندى جاستاردىڭ ەلدەن كەتۋىن ازايتۋ ماقساتىندا شەتەل ۋنيۆەرسيتەتتەرىنىڭ فيليالدارىن اشۋ جوسپارلانىپ وتىر. 20 وتاندىق جەتەكشى جوعارى وقۋ ورنى وڭىرلەردىڭ ءوسۋ نىساناسى بولادى. نازاربايەۆ ۋنيۆەرسيتەتىنىڭ تاجىريبەسى بويىنشا يننوۆاسيالار مەن جاڭا تەحنولوگيالاردى دامىتۋمەن اينالىساتىن ەكى وزىق جوعارى وقۋ ورنى قۇرىلادى»، - دەدى اسقار مامين.

---