قازاقستاندىق عالىم قۋات ۇنەمدەيتىن باتارەيا ويلاپ تاپتى
قازاقستاندىق عالىم جۇماباي باكەنوۆ قۋات ۇنەمدەيتىن باتارەيا ويلاپ تاپتى،-دەپ تاراتتى www.24.kz
بۇل - ونىڭ نازاربايەۆ ۋنيۆەرسيتەتىندە قولعا العان العاشقى جوباسى. بۇل - قالتا ءتۇبىن قاقپايتىن ءارى ۇنەمدەۋدە تاپتىرماس ءونىم. قازاقستاندىق پروفەسسور جۇماباي باكەنوۆتىڭ ۇزاق جىلعى جۇمىسىنىڭ جەمىسى. جوبا دۇنيەجۇزىلىك بانكتىڭ گرانتىنا يە بولعان. ال عالىمنىڭ عىلىمي ماقالالارى Thomson reuters حالىقارالىق رەيتينگىندە ۇزدىك جازبالاردىڭ قاتارىندا كوش باستاپ تۇر.
«بۇل باتارەيانىڭ قازىرگى ۋاقىتتا قولدانىستا جۇرگەندەرگە قاراعاندا مۇمكىندىگى الدەقايدا كوپ. تەوريالىق تۇرعىدان الىپ قاراعاندا، ماسەلەن، قازىرگى سمارتفونداردىڭ باتارەياسىنا قاراعاندا 10 ەسە ارتىق جۇمىس ىستەيدى جانە قۋاتتى ۇزاق ساقتاي الادى»، - دەيدى نازاربايەۆ ۋنيۆەرسيتەتى ينجەنەرلىك مەكتەپتىڭ پروفەسسورى جۇماباي باكەنوۆ.
موبيلدiك تەلەفوندارعا ارنالعان باتارەيا بۇل ۇلكەن جوبالاردىڭ باستاۋى عانا. عىلىمي توپتىڭ كەلەشەكتە كوزدەگەن كوكجيەگى بولەك. عالىمنىڭ ايتۋىنشا، ول قازاقستاندا العاشقىلاردىڭ ءبىرى بولىپ ەلەكتروموبيل قۇراستىرعان تاير بالابايەۆپەن تىعىز قارىم-قاتىناستا. ەندى ولار كولىكتەرگە ارنالعان ارنايى ۇنەمدەگىش باتارەيا جاساماق.
اتالمىش جوباداعى باتارەيالار بۇگىندە ساتىلىمعا ءتۇستى. كەلەسى قادام - ەلەكتروموبيلدەرگە ارنالعان باتارەيا ساۋداسىن ءبىر ىزگە سالۋ. ءبىراق ول ءۇشىن ونەرتاپقىشتارعا 3-10 ملن دوللار كولەمىندە قارجى قاجەت. قىرۋار اقشانى عالىمدار ينۆەستيسيالىق كونكۋرستارعا قاتىسىپ، ۇتپاق نيەتتە. عىلىمي توپتا بۇل كۇنى 11 مامان ەڭبەكتەنۋدە. ولاردىڭ قاتارىندا نازاربايەۆ ۋنيۆەرسيتەتىنىڭ ستۋدەنتتەرى دە بار.
«ءبىزدىڭ العا قويعان ماقساتىمىز - حالىقارالىق دەڭگەيدەگى زەرتتەۋ ۋنيۆەرسيتەتى اتاعىن الۋ. قازىرگى ۋاقىتتا زەرتحانالارىمىز زاماناۋي قۇرىلعىلارمەن جاراقتاندىرىلعان. ستۋدەنتتەردى وقۋعا قابىلداعاننان باستاپ عىلىمي جۇمىستارعا تارتامىز»، - دەيدى نازاربايەۆ ۋنيۆەرسيتەتىنىڭ پرورەكتورى ەنن لونسدەيل.
قۋات ۇنەمدەيتىن اككۋمۋلياتور 2017 جىلى ەحرو كورمەسىندە كوپشىلىك نازارىنا ۇسىنىلماق. وقۋ ورداسىندا بۇل كۇنى 140-تان استام جوبا قولعا الىنعان. عالىمدار امەريكا، ۇلىبريتانيا، اۆستراليا جانە قىتايداعى ارىپتەستەرىمەن دە تىعىز بايلانىستا.
You Might Also Like
-
جىل ون ەكى اي – ءۇش ءجۇز الپىس، بىردە-بىرى جاتسىنباسىن ەشكىم دە. ءۇش ءجۇز الپىس كۇننىڭ ءبىرى – بىلگەنگە – ءبىلىم كۇنى! سەنىڭ دە ويىڭ ءوستى مە؟!
-
بەلگىلى WhatsApp مەسسەندجەرىن ەندى تەگىن پايدالانۋعا بولادى. 99 سەنت كولەمىندەگى جىلدىق ابونەنتتىك تولەمنىڭ جويىلۋى جونىندەگى اقپارات كومپانيانىڭ كورپوراتيۆتىك بلوگىندا پايدا بولدى.
