قازاقستاندىقتار ءبىلىم الۋ ءۇشىن زەينەتاقى تولەمىنىڭ ءبىر بولىگىن قالاي جۇمساي الادى
ءبىلىم جانە عىلىم ۆيسە-مينيسترى بيبىگۇل اسىلوۆا ءبىلىم الۋ ءۇشىن زەينەتاقى تولەمىنىڭ ءبىر بولىگىن پايدالانۋ مەحانيزمىن ەنگىزۋ جوسپارى تۋرالى ايتىپ بەردى.
«كەيىنگى جىلدارى مەملەكەتتىڭ جاستاردى جوعارى بىلىممەن قامتۋ باعىتىنداعى شارالارىنا قاراماستان، 2019 جىلى وتاندىق جوعارى وقۋ ورىندارىنا اقىلى نەگىزدە جوعارى ءبىلىم الۋ ءۇشىن 107 مىڭ ادام وقۋعا تۇسكەن. بۇل – جالپى تاپسىرۋشى 173 538 ادامنىڭ 62 پايىزى. مەملەكەتتىك تاپسىرىس اياسىندا 67 مىڭ ادام ءبىلىم الۋ مۇمكىندىگىنە يە بولدى. بۇل رەتتە جالپى ءبىلىم بەرەتىن مەكتەپتەردە 1 سىنىپقا قابىلدانىپ جاتقانداردىڭ سانى ورتاشا ەسەپپەن 400 مىڭ بالاعا دەيىن ارتىپ كەلە جاتقانىن اتاپ وتكىم كەلەدى»، - دەدى بيبىگۇل اسىلوۆا پارلامەنت سەناتىندا وتكەن دوڭگەلەك ۇستەل بارىسىندا.
ۆيسە-مينيستر وسى رەتتە ءبىلىم جانە عىلىم مينيسترلىگى بجزق سالىمشىلارىنىڭ زەينەتاقى جيناقتارىنىڭ ءبىر بولىگىن ءبىلىم الۋ ءۇشىن جۇمساي الاتىنداي مەحانيزم ازىرلەگەنىن ايتىپ ءوتتى. ونىڭ سوزىنە سەنسەك، اتالعان مەحانيزم بويىنشا ەكونوميكالىق تۇرعىدا بەلسەندى ازاماتتار قايتارىم تارتىبىندە زەينەتاقى قورىنداعى اقشانى پايدالانا الادى.
اتالعان مەحانيزمنىڭ نەگىزى مىناداي:
1. بجزق سالىمشىسى ءبىلىم نەسيەسىن رەسىمدەۋ ءۇشىن قۇجاتتار پاكەتىمەن بانككە جۇگىنەدى. قۇجاتتاردىڭ ىشىندە وقۋ اقىسى مەن زەينەتاقى شوتىنان كوشىرمە بولۋى كەرەك؛
2. وسىدان كەيىن بانك نەسيەلىك جەلىنىڭ اشىلعانى تۋرالى شەشىم شىعارىپ، نەسيەنى ترانشتار بويىنشا سەمەسترلەرگە بولە اۋدارادى. بانكتىڭ شارتتارى: «قارجى ورتالىعى» اق نەسيە بويىنشا قامسىزداندىرۋ بويىنشا 100 پايىز كەپىلدىك بەرەدى. سونىمەن بىرگە، بانكتە وقۋ سالىمى شوتى اشىلۋى ءتيىس. بجزق زەينەتاقى قورىنداعى اقشانى سالىمشىنىڭ بانكىندەگى دەپوزيتتىك شوتقا اۋدارادى. دەپوزيتتەن اقشانى تولىعىمەن شەشىپ الۋعا مۇمكىندىك بەرىلمەۋى ءتيىس.
3. بجزق سالىمشىسى قاراجاتتى اۋدارۋ ءۇشىن اشىق وقۋ دەپوزيتىنە جۇگىنەدى؛
4. بانك ءاربىر ترانش بويىنشا «قارجى ورتالىعى» اق-قا حابارلاسىپ، نەسيە بويىنشا كەپىلدى الىپ وتىرادى؛
5. كەپىلدىك العاننان كەيىن بانك ترانش سوماسىن ءبىلىم ۇيىمىنا جولدايدى؛
6. قارىز الۋشى اي سايىنعى ءتارتىپ بويىنشا بانك كەستەسىنە ساي نەسيەنى وتەپ وتىرادى؛
7. قارىز الۋشى تولىعىمەن نەسيەلىك مىندەتتەمەلەردى العاننان كەيىن بانك دەپوزيتتىڭ قارجىسىمەن اقشانى بجزق-عا قايتارادى؛
8. قارىز الۋشى مىندەتتەمەلەردى ورىنداماعان جاعدايدا بانك «قارجى ورتالىعى» اق-قا جۇگىنە الادى.
You Might Also Like
-
بىردە قوجا «وسى جۇرت قۇساپ مەن نەگە قۇس اسىراپ، اڭعا سالمايمىن» دەپ ويلاپ ءبىر ساۋىسقاندى ۇستاپ الادى دا، اسىراي باستايدى.
-
ءبىر تويدا اشقاراق بىرەۋ قوماعايلانا ىشىپ-جەگەنىمەن قويماي، قالتاسىنا قۇرت پەن ىرىمشىكتى سالا بەرەدى، قاسىندا وتىرعان قوجا الگىنىڭ قالتاسىنا ىستىق شاي قۇيىپ جىبەرەدى.
