InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتى مەن قازاقستان تاعامتانۋ اكادەمياسى (قتا) ىنتىماقتاستىق كەلىسىمىن ورناتتى. ىنتىماقتاستىق اياسىندا ۋنيۆەرسيتەتتەگى قوعامدىق دەنساۋلىق ساقتاۋ جوعارى مەكتەبىندە (قدجم) نۋتريسيولوگيا كافەدراسى (تاماقتانۋ تۋرالى عىلىم) اشىلاتىنى جونىندە قازۇۋ رەكتورى عالىم مۇتانوۆ پەن قتا پرەزيدەنتى تورەگەلدى شارمانوۆ مەموراندۋمعا قول قويدى، دەپ حابارلايدى ءال-فارابي اتىنداعى قازاق ۇلتتىق ۋنيۆەرسيتەتىنىڭ باسپا ءسوز قىزمەتى.

قازۇۋ مەن قتا ىنتىماقتاستىعى عىلىم مەن تاجىريبە، ءبىلىم بەرۋ ينتەگراسياسى جولىندا مەديسينالىق ءبىلىم بەرۋ ساپاسىن ارتتىرۋ ءۇشىن رەسۋرستاردىڭ ينتەللەكتۋالدىق جانە تەحنيكالىق قابىلەتىن بىرىكتىرۋگە باعىتتالادى. قازۇۋ-دىڭ نۋتريسيولوگيا كافەدراسى ءوز جۇمىسىن مەديسينا عىلىمدارىنىڭ دوكتورى، اكادەميك تورەگەلدى شارمانوۆتىڭ جەتەكشىلىگىمەن باستايتىن بولادى.

الەمدىك مەديسينالىق عىلىم سالاسىنا قوسقان ۇلەسى ءۇشىن لەون بەرنارد اتىنداعى دۇنيەجۇزىلىك دەنساۋلىق ساقتاۋ قورىنىڭ لاۋرەاتى، پروفەسسور ت.شارمانوۆ ءوز سوزىندە «ەلىمىزدىڭ جەتەكشى وقۋ ورداسىندا كافەدرا باسقارۋ - مەن ءۇشىن ۇلكەن مارتەبە. قازۇۋ مەن اكادەميانىڭ بىرلەسكەن قىزمەتى نۋتريسيولوگيا، ديەتولوگيا، ميكرونۋتريەنت تاپشىلىعى پروفيلاكتيكاسى سالاسىنداعى ءوقۋ-بىلىم، عىلىمي-زەرتتەۋ، كونسالتينگتىك جانە ساراپشىلىق ىنتىماقتاستىعىنا نەگىزدەلىپ وتىر»، - دەپ اتاپ ءوتتى.

سونداي-اق، شارمانوۆ نۋتريسيولوگيا كافەدراسىنىڭ اشىلۋى حالىقتىڭ دۇرىس تاماقتانۋ مادەنيەتى مەن دۇرىس ءومىر سالتىن قالىپتاستىرۋدا ماڭىزعا يە ەكەنىن تىلگە تيەك ەتتى. بۇل جۇمىستار ءداستۇرلى تەحنولوگيانى جۇزەگە اسىرۋعا، تاماقتانۋ يندۋسترياسىنا يننوۆاسيالار ەنگىزىپ، تاعام ونىمدەرىن ءوندىرۋدىڭ جاڭا تەحنولوگيالارىن قۇراستىرۋعا باعىتتالاتىن بولادى.

ۇلتتىق وقۋ ورنى مەن اكادەميا ارىپتەستىگى كۇردەلى جانە قولدانبالى مەديسينا-بيولوگيالىق زەرتتەۋلەر جۇرگىزۋدى، مەملەكەتتىك جانە حالىقارالىق قوعامدىق ۇيىمدار مەن قورلاردىڭ گرانت بايقاۋلارىنا قاتىسۋدى، سونداي-اق، نۋتريسيولوگيا سالاسىندا الەمنىڭ جەتەكشى ماماندارىنىڭ قاتىسۋىمەن بىلىمگەرلەر مەن ماماندارعا ارناپ ءبىلىم بەرۋ جانە عىلىمي مەكتەپتەرىن وتكىزۋ ءتارىزدى ورتاق قىزمەتتەردى جوسپارلاپ وتىر.

سونىمەن بىرگە، اتالمىش ىنتىماقتاستىق تاماقتانۋ ماسەلەلەرى بويىنشا وتاندىق قوعامدىق دەنساۋلىق ساقتاۋدىڭ تاڭداۋلى داستۇرلەرى مەن الەم تاجىريبەسىن پايدالانۋعا مۇمكىندىك بەرمەك. كەلەلى كەزدەسۋ بارىسىندا تورەگەلدى شارمانوۆ بيە ءسۇتى مەن جىلقى مايىنان ازىرلەنگەن ونىمدەرمەن تانىستىرىپ ءوتتى. اكادەميك ولاردىڭ يممۋندىق-بيولوگيالىق جانە ەمدىك-پروفيلاكتيكالىق جوعارى قاسيەتىن ساقتاي وتىرىپ، ءوندىرۋدىڭ يننوۆاسيالىق تەحنولوگياسىن بايانداپ بەردى.

---