InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتى –قازاقستان رەسپۋبليكاسىنىڭ جەتەكشى ءارى ۇزدىك ۋنيۆەرسيتەتىنىڭ ءبىرى. بۇل وقۋ ورنى ءبىلىمدى شاكىرتتى عانا ەمەس، بىلىكتى مامان دايارلاۋعا دا كوپ كوڭىل بولەدى. 1934 جىلى قۇرىلعان بۇل وقۋ ورنى قازىرگى كەزدە الەمدىك دەڭگەيدەگى ۋنيۆەرسيتەتتەرمەن تەڭ دارەجەدە تۇر. 

قازاق ۇلتتىق ۋنيۆەرسيتەتى   تالاي ستۋدەنتتەردىڭ اسقاق ارمانىن ورىنداپ، جول كورسەتكەن وقۋ ورنى. مۇندا كوپتەگەن اتاقتى اقىن-جازۋشىلارىمىز، تىلشىلەرىمىز ءبىلىم نارىمەن سۋسىنداعان. مىسالى، ءا.نۇرشايىقوۆ، ك.احمەتوۆا، ز.قابدولوۆ، ب.كەنجەبايەۆ، ا.قىراۋباي قىزى، ت.ب. اتاقتى تۇلەكتەرىمىزدى ايتۋىمىزعا بولادى. بۇل وقۋ ورنىمىزدىڭ ۇزدىك ەكەنىنىڭ دالەلى بولىپ تۇر.

قازىرگى تاڭدا قازۇۋ-دا ءبىلىم الۋعا، ءوزىن-وزى جەتىلدىرۋگە       مول مۇمكىندىكتەر جاسالعان. قازۇۋ قالاشىعىنىڭ بارلىق ايماعى Wi-Fi سىمسىز جەلىسىمەن قامتىلعان. ونىڭ كەز كەلگەن نۇكتەسىندە ءار ستۋدەنت ۋنيۆەرسيتەت بىرلەستىگىنىڭ جەلىسىندە جۇمىس ىستەۋمەن قوسا، ينتەرنەتكە تەگىن قوسىلۋ مۇمكىندىگىنە يە بولدى. سونىمەن قاتار تاۋلىك بويى ىستەيتىن 300 ورىندىق جاڭا ينتەرنەت-كافە جۇمىس ىستەيدى. ءو.ا. جولداسبەكوۆ اتىنداعى ستۋدەنتتەر سارايى – قازۇۋ قالاشىعىنىڭ ءىنجۋ-مارجانى. مۇندا قازاق ۇلتتىق اسپاپتار وركەسترى، كوركەمونەر ۇيىرمەلەرى، «ءبىز» ستۋدەنتتەر تەاترى، كتك كومانداسى جۇمىس ىستەيدى. سپورتپەن اينالىسۋعا بارلىق جاعداي جاسالعان (قازۇۋ قالاشىعىنىڭ سپورت كەشەنى، ستۋدەنتتەردىڭ سپورتتىق كلۋبى، ءتۇرلى سەكسيالار، دەنساۋلىق توپتارى). قىزمەتكەرلەر مەن ستۋدەنتتەردىڭ سپارتاكياداسى ۇدايى وتكىزىلىپ، ولاردىڭ قالالىق جارىستارعا قاتىناسۋى قامتاماسىز ەتىلەدى.

ۋنيۆەرسيتەت ستۋدەنتتەرىنىڭ ءومىرى قىزىقتىلىعىمەن ءارى الۋاندىعىمەن ەرەكشەلەنەدى. ول تەك دارىستەر مەن سەمينارلارعا قاتىسۋمەن عانا شەكتەلمەيدى. ولار شالقىعان شىعارماشىلىق قۋات پەن جاستىق جالىندى، بالعىن تالانتتى شىڭدايتىن تەاتر ستۋديالارى مەن پوەتيكالىق كلۋبتارعا، كوڭىلدى جانە تاپقىرلار سايىسىنا بەلسەنە قاتىسادى.

قازۇۋ-دا تەك ءبىلىم الىپ قويماي، ءبىلىمىمىزدى ءتۇرلى تاجىريبەلىك جۇمىستار ارقىلى سىناي الامىز. قازىرگى تاڭدا 4-كۋرس ستۋدەنتتەرىنىڭ 

«احمەت بايتۇرسىن ۇلى «ءتىل-قۇرال» وقۋ-ادىستەمەلىك، عىلىمي-زەرتتەۋ ورتالىعىنان» وندىرىستىك تاجىريبەدەن ءوتۋى وسى باستامالاردىڭ دالەلى دەۋگە بولادى. تاجىريبە جۇمىسىنىڭ نەگىزگى ماقساتى – ستۋدەنتتەردىڭ پەداگوگيكالىق قىزمەتتىڭ نەگىزگى فۋنكسيالارىن مەڭگەرۋى، پەداگوگيكالىق قۇزىرەتتىلىكتى، كاسىبي قاسيەتتەردى قالىپتاستىرۋ جانە دامىتۋ، عىلىمي بايلانىستاردى جۇزەگە اسىراتىن نەگىزگى ۇيىمداردىڭ، مەكەمەلەردىڭ قىزمەتىمەن تانىستىرۋ.  

مۇراجاي جەتەكشىسى يماحانبەت رايحان ساقىبەك قىزى ءبىزدىڭ وندىرىستىك تاجىريبەمىزگە باسشىلىق ەتىپ، اتقارىلۋى ءتيىس جۇمىستاردى ءتۇسىندىرىپ، باعىت-باعدار كورسەتىپ وتىردى.

سونىمەن قاتار، مەكەبايەۆا لەيلا ادام قىزى ءبىزدىڭ  اتقاراتىن جۇمىسىمىزدى ءبولىپ بەرىپ، قالاي ورىنداعانىمىزدى تەكسەرىپ، قاتەمىزدى تۇزەتىپ وتىردى. بۇل تاجىريبەدەن ءوتۋ ارقىلى ءبىز احمەت بايتۇرسىن ۇلى تۋرالى ءبىلىمىمىزدى كەڭەيتىپ، ەڭبەكتەرىمەن تولىقتاي تانىستىق. بۇل تاجىريبەدەن ۇيرەنگەنىمىز كوپ بولدى.  الداعى ۋاقىتتا دا ۇيرەنەرىمىز كوپ بولادى دەگەن سەنىمدەمىز.

قوشىم-نوعاي اقەركە

ءال-فارابي اتىنداعى قازاق ۇلتتىق ۋنيۆەرسيتەتى

فيلولوگيا جانە الەم تىلدەرى فاكۋلتەتى قازاق ءتىلى مەن ادەبيەتى ماماندىعىنىڭ 4-كۋرس ستۋدەنتى

مەكەبايەۆا لەيلا ادام قىزى، ف.ع.ك، اعا وقىتۋشى

---