InfoHub Logo

ءال-فارابي اتىنداعى قازاق ۇلتتىق ۋنيۆەرسيتەتى حالىقارالىق رەيتينگتە كەزەكتى ساتىعا كوتەرىلىپ، ورتالىق ازيا ايماعى مەن قازاقستان جوعارى وقۋ ورىندارى اراسىندا  العاشقى بولىپ الەمنىڭ 250 ۇزدىك ۋنيۆەرسيتەتى قاتارىنا ەندى.

بۇل تۋرالى اتالعان جوو-نىڭ باسپا ءسوز قىزمەتى حابارلايدى.

World University Rankings QS (ۇلىبريتانيا) بەدەلدى رەيتينگتىك اگەنتتىگىنىڭ زەرتتەۋ قورىتىندىلارى بويىنشا، ءال-فارابي اتىنداعى قازاق ۇلتتىق ۋنيۆەرسيتەتى 236-ورىننان كورىنىپ، الەمنىڭ 250 ۇزدىك ۋنيۆەرسيتەتى قاتارىنا ەندى. ايتا كەتەرلىگى، بۇل توپقا تمد ەلدەرىنەن ەكى جوو - لومونوسوۆ اتىنداعى ممۋ مەن ءال-فارابي اتىنداعى قازۇۋ عانا كىردى. وسىلايشا جەتەكشى قازاقستاندىق ۋنيۆەرسيتەت ورتالىق ازيا مەن تمد-داعى تەڭدەسسىز كوشباسشىلىعىن تاعى دا دالەلدەدى.

حالىقارالىق رەيتينگتە ۋنيۆەرسيتەتتىڭ تابىستى العا جىلجۋىنا زاماناۋي تالاپتارعا ساي جۇرگىزىلگەن كەشەندى قۇرىلىمدىق جاڭارتۋ ىقپال ەتتى. ناتيجەگە باعىتتالعان پروسەستىك مەنەدجمەنت، باسقارۋ جۇيەسى جانە ەڭبەكتى رەيتينگتىك باعالاۋ ەنگىزىلدى. سونداي-اق، جوعارى الەمدىك تالاپتارعا ساي ءارى حالىقارالىق اككرەديتاسيادان وتكەن ەكسپەريمەنتتىك ءبىلىم بەرۋ باعدارلامالارى دايىندالدى جانە ەنگىزىلدى، عىلىمي-زەرتتەۋ جۇمىستارى  بەلسەندى جۇرگىزىلۋدە.

 شەتەلدىك رەيتينگىلىك عىلىمي جۋرنالداردا جاريالانعان قازاقستاندىق ءاربىر ءۇشىنشى ماقالا قازۇۋ عالىمدارىنا تيەسىلى. مەملەكەتتىك-جەكە سەرىكتەستىك قاعيدالارى نەگىزىندە بىرەگەي نىساندار سالىنىپ، ۋنيۆەرسيتەت كامپۋسىنىڭ ينفراقۇرىلىمدىق قۇرىلىستارىنىڭ ەكىنشى كەزەڭى اياقتالدى.

QS ساراپشىلارىنىڭ ۇسىنىستارى بويىنشا قازۇۋ تاجىريبەسى الەمدەگى ۇزدىك ۋنيۆەرسيتەتتەردە زەرتتەلۋدە. بۇل كورسەتكىش الەمدىك ءبىلىم مەن عىلىم نارىعىندا باسەكەلەستىككە قابىلەتتىلىكتىڭ ايقىن دالەلى بولىپ تابىلادى.

قازۇۋ عىلىم، ءبىلىم بەرۋ جانە يننوۆاسيالىق جەتەكشى ورتالىق رەتىندە ەل پرەزيدەنتى نۇرسۇلتان نازاربايەۆتىڭ حالىققا جولداۋىندا ايتىلعان قازاقستاننىڭ ەڭ دامىعان 30 ەلدىڭ قاتارىنا كىرۋى جانە ەكى جوو-نىڭ الەمنىڭ 200 ۇزدىك توپ ۋنيۆەرسيتەتى قۇرامىنا ەنۋى جونىندەگى مەملەكەتتىك ماڭىزى زور تاپسىرمالاردى جۇزەگە اسىرۋ ماقساتىندا جۇمىس ىستەۋدە.

---