قىرقا بار الماتىنىڭ شىعىسىندا،
جاتىر سوندا جاقىنىڭ، تۋىسىڭ دا.
بۇل عالامدى مىسە ەتپەس قايران جۇرەك،
ءقايتىپ جاتىر اياداي قۋىسىندا؟!
ءومىردى كەرەمەتتەي جىر قىلساق تا،
كەيىمەسەك داۋاڭ جوق بۇل ءبىر شاقتا.
ءبىراز كۇن الداندىرىپ، اۋىستىرار
ادامدى ءبىر قۇرساقتان ءبىر قۇرساققا.
قىرقا بار الاتاۋدىڭ باۋىرىندا،
سوندا جاتىر جولداسىڭ، باۋىرىڭ دا.
اپىر-اي، كەلەم بە دەپ تاعى مۇندا،
جونەلەر قانىڭ تاسىپ تامىرىڭدا.
ەرىكسىز الماتىنىڭ قىرىنا بۇل،
كەلمەسىڭە بولمايدى جىلىنا ءبىر.
كەلمەسىڭە قويمايدى.
كەتكەندەردىڭ ءبىرى - اكەڭ، ءبىرى - شەشەڭ، ءبىرى - باۋىر.
ءبارى جاتىر - سىرلاسىڭ، قۇرداسىڭ دا،
قۇداي-اۋ، قۇرتۋ ءۋشىن تۋعاسىڭ دا،
قۋانار ەم، وسى ءبىر قۋ قىرقاعا
ءبىر-اق رەت ورالسام ءبىر عاسىردا.

---