قىزدارعا سىيلىق
6-سىنىپتىڭ ءبىر توپ ەر بالاسى ۇيلەرىنەن وسى ءۇشىن سۇراپ العان اقشالارىنا 8 ناۋرىز مەرەكەسىنە بايلانىستى سىنىپتاس قىزدارىنا سىيلىق ساتىپ الماق بولىپ دۇكەنگە قاراي كەلە جاتتى. ولار دۇكەنگە كىرە بەرگەندە دۇكەن ىشىندە تۇرعان وزدەرىنىڭ سىنىپ جەتەكشى ۇستازدارىن كورىپ ىڭعايسىزدانىپ قالدى. ءبىراق سىنىپ جەتەكشى ۇستازدارى بالالاردىڭ نە ماقساتپەن جۇرگەنىن بىلگەننەن كەيىن ولاردىڭ ىسىنە ارالاسقان جوق.
ەندى دۇكەنشىنىڭ نازارى بالالارعا اۋدى. بالالار قولدارىنداعى اقشالارىنىڭ ءبارىن دۇكەنشى تاتەيدىڭ الاقانىنا سالدى. دۇكەنشى اقشانى تەز-تەز ساناپ شىقتى دا، بالالارعا كۇلىمسىرەي قاراپ: "سىيلىق نەشە قىزعا جاسالۋ كەرەك؟" - دەپ سۇرادى. بالالار سىنىپتاس قىزدارىنىڭ سانىن ايتتى. دۇكەنشى تاتەي بالالارعا وزدەرى ايتقان سىيلىقتى اسەمدەي وتىرىپ جاساپ بەردى. بالالار سىيلىقتاردى سومكەلەرىنە جاسىردى. "قىزدارعا بىردەن كورسەتىپ الماۋ كەرەك، - دەيدى ولار. - كورسەتىپ السا، سىيلىقتىڭ قىزىعى قالمايدى. تەك تاپسىرار كەزدە ءبىر-اق كورسەتەمىز".
اقىرى سىيلىق تاپسىراتىن ءسات تە كەلدى-اۋ. بالالار كەزەكتى ءپان مۇعاليماسىنان رۇقسات سۇراپ الىپ، قىسىلا-قىسىلا ءجۇرىپ قىزدارعا سىيلىقتارىن تاپسىرىپ شىقتى. قىزدار ولارعا راقمەتتەرىن ايتتى. ال سىنىپتا وتىرعان مۇعاليما ءوزىنىڭ دە شاكىرتتىك شاقتارى ەسىنە تۇسكەندەي، بالالاردىڭ قىلىعىنا كۇلىمسىرەگەن كۇيى قاراپ وتىردى.
ءبىراق وقيعا مۇنىمەن بىتكەن جوق ەدى. ءدال ساباق اياقتالار تۇستا قىزدار مەن ەر بالالار الدەنەگە شەكىستى دە قالدى. سول-اق ەكەن، بالالار شۇعىل شەشىمگە كەلدى:
"سىيلىقتارىمىزدى قايتارىڭدار!"
قىزدار سومكەلەرىن اشىپ جىبەرىپ، سىيلىقتارىن قايتارىپ جاتتى. بالالار ءبارىن دە قايتادان جيناپ الدى. قىزدار ۇيلەرىنە قايتىپ كەتتى. بالالار سىيلىقتارىن قۇشاقتاعان كۇيى ءالى وتىر. كوكتەمنىڭ قۇبىلمالى كۇنى دە ۇياسىنا بارىپ قوناقتادى.
"مىنا سىيلىقتاردى نە ىستەيمىز؟ - دەيدى بالالار. - مۇنى اقىرى قىزدار ءۇشىن الدىق قوي، ەندەشە، وزدەرىنە قايتىپ بەرەيىك".
بالالار ەندى جاڭا جىل كەشىندەگى اياز اتالار قۇساپ سىيلىقتارىن ارقالاعان كۇيىندە قىزداردىڭ ۇيلەرىن ارالاپ شىقتى. ولارعا سىيلىقتارىن قايتادان تابىستادى. قىزدار بالالارعا كۇلىمسىرەپ تۇرىپ تاعى دا راقمەتتەرىن ايتتى. ءسويتىپ، ەر بالالار ءبىر كۇننىڭ ىشىندە قىزدارعا 8 ناۋرىز مەرەكەسىنە ارناپ ەكى مارتە سىيلىق بەرىپ، ولاردان ەكى مارتە العىس ەستىدى.
You Might Also Like
-
ءار كومپانيادا بارىنە ورتاق ءبىر ىسپەن اينالىسۋعا نيەت بار، الايدا، ناقتى نە ىستەيتىنىن ەشكىم بىلمەيتىن ساتتەر بولىپ تۇرادى.
