ءار كومپانيادا بارىنە ورتاق ءبىر ىسپەن اينالىسۋعا نيەت بار، الايدا، ناقتى نە ىستەيتىنىن ەشكىم بىلمەيتىن ساتتەر بولىپ تۇرادى.

bilim-all.kz كوڭىل كوتەرگەندى عانا ەمەس، ويلانۋدى دا ۇناتاتىن كوڭىلدى، ايرىقشا ۇجىمدا ۋاقىتتى قىزىقتى ەتىپ وتكىزۋدىڭ جولدارىن ۇسىنادى.

كۇندەلىكتى كۇيبەڭنەن جانە جۇمىستان ءبىر ءسات باس كوتەرىپ، نازارىڭىزدى باسقا جاققا اۋدارىپ قانا قويماي، ساناڭىزدى سەرگىتىپ، شيراتقىڭىز كەلسە، تومەندەگى قىزىقتى ۇجىمدىق ويىندارىن ۇسىنامىز.

«كىم ەكەنىڭدى تاپ» ويىنى  

ويىن ەرەجەسى

قاتىسۋشىلاردىڭ (كەم دەگەندە ەكى ادامنان سانسىز كوپ ادامعا دەيىن ويناي بەرەدى) ءارقايسىسى شامامەن 2ح5 سم تازا پاراق الىپ، كەز كەلگەن مادەنيەت قايراتكەرى، تاريحي تۇلعا نەمەسە كينو، ادەبي شىعارما كەيىپكەرىنىڭ ەسىمىن جازادى. بار شارت – ول ەسىم ويىنعا قاتىسىپ وتىرعانداردىڭ بارلىعىنا تانىس بولۋى ءتيىس.

ويىنشىلاردىڭ ءبارى كەيىپكەر ويلاپ تاۋىپ، جازىپ بولعاننەن كەيىن، پاراعىن جانىندا وتىرعان كورشىسىنە شەڭبەر بويىمەن (وڭنان سولعا، سولدان وڭعا – ماڭىزدى ەمەس) بەرەدى. ءوز پاراعىڭىزدا نە جازعانىڭىزدى ويىن باستالعانعا دەيىن ەشكىم كورمەۋى ءتيىس ەكەنىن ەسكەرىڭىز.

سونىمەن، ءارقايسىسىڭىز پاراعىن تازا جاعىن جوعارى كورسەتە وتىرىپ كورشىسىنە بەرەدى، ال ءسىز كورشىڭىزدەن العان پاراقتى، وندا نە جازىلعانىنا قاراماي ماڭدايىڭىزعا جابىستىرىپ الاسىز.

ارينە، ءتۇرىڭىز كۇلكىلى بولىپ كورىنەدى، الايدا، ونىڭ ەش سوكەتتىگى جوق –ويىنعا قاتىسىپ وتىرعانداردىڭ ءبارىنىڭ ءتۇرى سونداي. بۇل ەڭ وڭتايلى شەشىم: وزىڭىزگە تيگەن پاراقتا نە جازىلعانىن ءسىز كورە المايسىز، ال باسقالاردىڭ ءبارى ءسىزدىڭ وسى ويىندا كىم ەكەنىڭىزدى ەسكە ءتۇسىرىپ وتىرۋ ءۇشىن كەز كەلگەن ۋاقىتتا ءسىزدىڭ جۇزىڭىزگە قاراسا جەتكىلىكتى.

دايىندىق جۇمىستارى اياقتالىپ، پاراقتار تاراتىلىپ، ماڭدايلارعا جابىستىرىلىپ بولىپ، ءبارى ويىنعا كىرىسۋگە ءازىر بولعاندا، ويىن باستالادى.

ەڭ الدىمەن، ءارقايسىسىڭىز ارىپتەستەرىڭىزگە بۇيىرعان «رولدەرمەن» تانىسىپ الۋىڭىز كەرەك. باسەكەلەستەرىڭىزدىڭ ءبىرىنىڭ ماڭدايىنداعى كەيىپكەردى تانىمايتىن بولساڭىز، اقىرىنداپ دوستارىڭىزدان سۇراپ الىڭىز.

سونىمەن، جۇرتتىڭ ءبارى وزىنە كەرەگىن ءبىلىپ بولعاننان كەيىن ويىننىڭ ەڭ قىزىق تۇسى – سۇراق قويۋعاكىرىسە بەرۋگە بولادى.

ەڭ الدىمەن، اينالىمدى كىمنەن باستايتىندارىڭىزدى تاڭداپ الاسىزدار: مۇندا بەلگىلەنگەن ەرەجە جوق، الايدا، ەكىنشى اينالىمنان باستاپ، الدىڭعىسىندا جەڭىلىپ قالعان ادام باستايدى. سول ادام ءبىرىنشى بولىپ سۇراق قويادى.

سۇراقتى وعان تەك «ءيا» نەمەسە «جوق» دەپ جاۋاپ بەرۋگە بولاتىنداي ەتىپ قۇراستىرۋ كەرەك.

مىسالى، ءبىرىنشى سۇراق ادەتتە «مەن شىنىمەن بار كەيىپكەرمىن بە؟» دەپ باستالادى.

سوندا ويىنشىلاردىڭ ءبارى ول ادامعا «ءيا» نەمەسە «جوق» دەپ جاۋاپ بەرەدى. ادەتتە، ءبارى جامىراپ جاۋاپ بەرەدى، سوندىقتان دا، بىر-ەكى ادام قانداي دا ءبىر سۇراقتىڭ جاۋابىن بىلمەي قالسا دا ەشتەڭە ەتپەيدى.

سونىمەن، ادامنىڭ سۇراعىنا «ءيا» دەپ جاۋاپ بەرگەننەن كەيىن ول سۇراق قويۋىن جالعاستىرا بەرەدى. ءار ادام سۇراعىنا «جوق» دەپ جاۋاپ العانعا دەيىن نەمەسە ءوزى «پاس» دەگەنگە دەيىن ويىندى جالعاستىرا بەرەدى. «پاس» مۇمكىندىگىن لايىقتى سۇراقتارىڭىز تاۋسىلعاندا نەمەسە وسىعان دەيىن العان اقپاراتتى ويلانىپ الۋ كەرەك بولعاندا الۋعا بولادى.

ءار ويىنشى كوماندانىڭ ءبىر مۇشەسى ءوزىنىڭ كىم ەكەنىن تاپقانعا دەيىن بۇكىل كومانداعا سۇراق قويا بەرەدى.

ايتالىق، ادام تولىق اقپارات الىپ، سونىڭ ءبارىن ويلانىپ بولىپ، «مەن لەرمونتوۆپىن با؟» دەپ سۇراق قويادى. وعان «ءيا» دەگەن جاۋاپ السا، جەڭىمپاز بولىپ ويىننان شىعادى، الايدا ارىپتەستەرىنىڭ سۇراقتارىنا جاۋاپ بەرۋگە قۇقىلى بولادى. ال ەگەر قاتەلەسىپ قالسا نەمەسە «جوق» دەگەن جاۋاپ السا، باسقالارمەن بىرگە ويىندى جالعاستىرا بەرەدى.

سىزگە قانداي رول بۇيىرعانىنا قاتىستى ءۇش رەت قانا بولجام ايتۋعا بولادى. ءۇشىنشى رەتتە دە «جوق» دەگەن جاۋاپ الساڭىز، جازا رەتىندە كەلەسى ءجۇرىسىڭىزدى وتكىزەسىز.

ەكى ويىنشى قالعان كەزدە، ولار بىرەۋى ءوز كەيىپكەرىن تاپقانعا دەيىن جارىسا بەرەدى. سوندا قالعان ويىنشىعا ءۇش ءجۇرىس بەرىلەدى: ياعني، وعان ءۇش رەت «جوق» دەپ جاۋاپ بەرۋگە بولادى، ءۇشىنشى رەتتەن كەيىن ول جەڭىلگەن بولىپ سانالىپ، ماڭدايىنداعى قاعازدى الىپ، دوستارى ونى كىمگە بالاعانىن كورەدى.

«فانت» ويىنى

«فانت» ويىنى – دوستارىڭىزبەن بىرگە ۋاقىتتى كوڭىلدى وتكىزىپ، كوپ جاڭا دۇنيە ءبىلىپ، ءوز مۇمكىندىكتەرىڭىزدى سىناپ كورۋگە تاپتىرماس مۇمكىندىك. «فانت» ءسوزىنىڭ ءوزى «كەپىل» دەگەندى بىلدىرەدى. ويىننىڭ ءمانى دە وسىندا. ويىنعا قاتىسۋشىلاردىڭ ءبارى ءبىر زاتىن كەپىلگە بەرەدى دە، سودان كەيىن ءبىر تاپسىرمانى ورىنداپ، سول زاتىن قايتا ساتىپ الادى.

«فانت» ويىنىنىڭ ەرەجەسى

«فانت» ويىنىنىڭ نەگىزگى ەكى نۇسقاسى بار.

1)جۇرگىزۋشىمەن.

2) قاعازبەن.

ءبىرىنشى نۇسقانىڭەرەجەلەرى مىناداي. جۇرگىزۋشى ويىنعا قاتىسۋشىلاردىڭ «فانتتارىن» جيناپ الادى دا، ونى قاپقا نەمەسە باسقا ءبىر ىدىسقا سالادى. سودان كەيىن ول تەرىس قاراپ تۇرادى، ال ويىنعا قاتىسۋشىلاردىڭ ءبىرى قاپتان ءبىر «فانتتى» شىعارىپ الىپ، «مىنا فانتقا قانداي تاپسىرما بەرەيىك؟» دەپ سۇرايدى. جۇرگىزۋشى وعان تاپسىرما ويلاپ تابادى، ال «فانتى» شىققان ويىنشى سول تاپسىرمانى ورىنداۋى ءتيىس. ويىنشى تاپسىرمانى ءساتتى ورىنداپ شىقسا، كەپىل زاتىن قايتارىپ الادى. سودان كەيىن كەزەك كەلەسى «فانتقا» كەلەدى. جۇرگىزۋشىنىڭ ءوزى دە «فانت» وتكىزۋدى ۇمىتپاعانى دۇرىس. وسىلايشا، قاتىسۋشىلارعا قيىن تاپسىرما بەرمەس بۇرىن، ءوز باسىن دا ءبىر ويلاپ الادى. ويتكەنى، ءدال سول تاپسىرما وزىنە ءتۇسۋى مۇمكىن عوي. ونىڭ ۇستىنە، جۇرگىزۋشى كىم بولاتىنىن دا الدىن الا ويلاستىرعان ءجون. قىزىقتى دا سالماقتى تاپسىرمالار ويلاپ تاباتىن سول ەمەس پە.

ەكىنشى نۇسقادا جۇرگىزۋشى قاجەت ەمەس. ويىنشىلار الدىن الا قاعازدارعا تاپسىرما جازىپ، ول قاعازداردى قالپاققا، نە قاپقا سالىپ قويادى. سودان كەيىن بارىپ ويىنشىلار كەزەككە تۇرىپ،  وزىنە تاپسىرما سۋىرادى. مۇندا دا «فانتتار» كەپىل زاتى رەتىندە جيناپ الىنادى.

بۇل – «فانت» ويىنىنىڭ نەداۋىر ۇيرەنشىكتى ەرەجەلەرى. الايدا، ءار كومپانيا ولاردى وزگەرتىپ، قالاۋىنشا جاڭاسىن قوسۋىنا بولادى. مىسالى، تاپسىرمانى ورىنداۋدان باس تارتقاندارعا كەپىل زاتىنان ايىرۋدان باسقا كەز كەلگەن جازا ءتۇرىن تاعايىنداۋىنا بولادى.

«فانت» ويىنى كەز كەلگەن باسقا ويىننىڭ جالعاسىنا اينالۋى دا مۇمكىن. مىسالى، قانداي دا ءبىر ويىننان شىعىپ قالساڭىز  – «فانت» بەرىڭىز. سول ويىن اياقتالعانعا دەيىن فانتتار جينالىپ بولادى دا، جەڭىمپاز الدەقانداي ارتىقشىلىققا (مىسالى، تاپسىرمانى ورىنداۋدان باس تارتۋ) يە بولادى.

«فانت» ويىنىنداعى باستىسى –تاپسىرمالار. سوندىقتان دا، ويىنشىلار قانداي تاپسىرمانى ورىندايتىنىن، ال قاندايىن ورىندامايتىنىن الدىن-الا اقىلداسىپ، كەلىسىپ العانى ءجون. سونىمەن قاتار، تاپسىرمالاردىڭ ءوزى دە جينالعان جۇرتتىڭ بىر-بىرىنە دەگەن كوزقاراسىنا، ورتاق قىزىعۋشىلىقتارىنا بايلانىستى بولادى. ال باسقا جاعىنان مۇندا ەشقانداي شەكتەۋ جوق. كەز كەلگەن تاپسىرما بەرۋگە بولادى: باستىسى - ويىنشىلار امان قالىپ، ەشكىم ەشكىمگە زيان كەلتىرمەۋى.

«فانت» ويىنى كوپ جىلدان بەرى وينالىپ كەلە جاتقانىنا قاراماستان، ەسكىرگەن جوق. ونىڭ تانىمالدىعىنا دالەل -  وسىنداي ەرەجەلەرى بار ونلاين-ويىن جاسالۋى. سان ۇرپاق اۋىسسا دا، ويىننىڭ شىتىرمان تابيعاتى وزگەرگەن جوق.

كوڭىلدەرىڭىز كوتەرىڭكى بولۋىنا تىلەكتەسپىز!

 

---