InfoHub Logo

ءبىز اقپاراتتىق تەحنولوگيالار داۋىرىندە ءومىر ءسۇرىپ وتىرمىز. اينالامىزداعى تۇرمىستىق قۇرالداردىڭ مىندەتى – تىرشىلىگىمىزدى وڭايىراق، ىڭعايلىراق ەتە ءتۇسۋ سياقتى كورىنەدى، الايدا، شىنىمەن سولاي ما؟ تۇرمىستىق تەحنيكانىڭ زياندى ەكەنىنە بۇلجىتپاس بىرنەشە دالەل بار.

تەلەديدار

ادام التىن ۋاقىتىن ءتۇرلى تەليەۆيزيالىق باعدارلامالار كورۋگە جۇمسايدى دا، تەلەديدار وعان قانداي زيان كەلتىرەتىنىن ويلامايدى. ەڭ الدىمەن، سول ۋاقىتتى نەداۋىر پايدالى نارسەگە، مىسالى، سپورتپەن شۇعىلدانۋعا جۇمساۋعا بولادى. ونىڭ ۇستىنە، تەلەديدارعا تەلمىرگەن ادامنىڭ كورۋى ناشارلايتىنى دا دالەلدەنگەن. سۇيىكتى تەلەباعدارلاماسىن كورۋ ءۇشىن ءبىر ورنىندا بىرنەشە ساعات تاپجىلماي وتىرعاننىڭ سالدارىنان ادام سەمىرىپ كەتەدى. سوڭعى كەزدە كوپتەگەن ارنالار ادامنىڭ ساناسىن «تۇمانداندىرىپ»، وعان مۇلدە كەرەك ەمەس ستەرەوتيپتەردى تاڭا باستادى. بۇل بەيسانا دەڭگەيدە اسەر ەتىپ، ادامدار سۇيىكتى كەيىپكەرلەرىنىڭ ىس-ارەكەتىنە ەلىكتەي باستايدى. ال ولار ءارقاشان جاقسى جاعىنان كورىنە بەرەدى دەۋگە كەلمەيدى.

ميكروتولقىندى پەش

ميكروتولقىندى پەش دۇرىس قولدانباعان جاعدايدا زيان كەلتىرەدى. قاراپايىم ەرەجەلەردى ەسكەرىپ وتىرساڭىز، ميكروتولقىندى پەش ءسىز ءۇشىن ءقاۋىپسىز ءارى پايدالى قۇرالعا اينالادى.

ميكروتولقىندى پەشتى ەسىگىن اشىپ قويىپ قوسۋعا بولمايدى.

كەزدەيسوقتا ميكروتولقىندى پەشتى بوس كۇيىندە ىسكە قوسىپ جىبەرمەۋ ءۇشىن، ىشىنە ستاكانعا سۋ قۇيىپ قويىپ ءجۇرىڭىز.

وسى ءبىر ماڭىزدى قۇرالدى تەك قاجەتىنشە عانا قولدانىڭىز.

شاڭسورعىش جانە كونديسيونەر

شاڭسورعىشتىڭ سۇزگىسىن ۋاقىتىلى تازارتىپ وتىرماسا، ول باكتەريا وشاعىنا اينالادى. بۇل ءتۇرلى اۋرۋلاردىڭ اسقىنىپ، ادامنىڭ دەمىكپەگە شالدىعۋىنا سەبەپ بولۋى مۇمكىن. ءۇي تازالاعان سايىن شاڭسورعىشتىڭ قوقىس جينالاتىن ىدىسىن بوساتىپ، سۇزگىلەرىن تازارتىپ وتىرساڭىز –دەنساۋلىعىڭىزعا زيان كەلتىرەتىن باكتەريالاردان اۋلاق بولاسىز. ال كونديسيونەرلەر سۋىق ءتيىپ جانە وكپە قابىنىپ اۋىرۋعا سەبەپ بولۋى مۇمكىن. اسىرەسە، كۇن ىستىق كەزدە، ادام وسى قۇرىلعىدان ەسكەن سالقىن لەپكە راحاتتانىپ، دەنەسىن قارماعان سۋىقتى سەزبەي قالادى. ەشقاشان كونديسيونەرگە تىم جاقىن وتىرماڭىز، اسىرەسە، كۇن قاتتى ىستىقتا.

كومپيۋتەرلەر

ادام دەنساۋلىعىنا بارىنەن ارتىق، جانە جاعىمسىز ىقپال ەتەدى. مونيتور ەكرانىنا ساعاتتاپ تەلمىرىپ وتىرىپ كوز جانارىڭىزدى تالدىرىپ، ومىرتقاڭىزدى قۇرىستىراتىنىڭىز ءوز الدىنا، جۇيكە جۇيەڭىزدى اسىرەسە قارقىندى جۇمىس ىستەۋگە ماجبۇرلەيسىز. ول – جۇيكە توزۋى مەن كۇيزەلىستىڭ سەبەبى بولۋى مۇمكىن. اسىرەسە، پسيحيكاسى ءالى قالىپتاسىپ بولماعان بالالارعا كومپيۋتەردەن كەلەتىن زيان زور. كومپيۋتەرلىك ويىنداردىڭ كوبى زورلىق-زومبىلىق پەن كىسى ءولتىرۋدى ناسيحاتتايدى. بالالارىڭىزعا ساعاتتاپ كومپيۋتەر الدىندا وتىرۋعا رۇقسات بەرۋدىڭ قاجەتى جوق. ال ەگەر جۇمىسىڭىز كومپيۋتەرمەن تىكەلەي بايلانىستى بولسا، دەنساۋلىعىڭىزعا كەلەتىن زياننىڭ الدىن الۋعا كومەكتەسەتىن بىرنەشە ەرەجە ەسىڭىزدە بولسىن.

ءار  30-40 مينۋت سايىن ورنىڭىزدان تۇرىپ، بوي جازىڭىز.

ءار ساعات سايىن كوزگە ارنالعان جاتتىعۋلار جاساپ وتىرىڭىز، مىسالى، جانارىڭىزدى ءبىر شەتكە قاداپ، سودان كەيىن باسقا جاققا قاراپ، سودان كەيىن جوعارى-تومەن سىرعىتىڭىز. بۇل جاتتىعۋ كوز جانارىن ساقتاپ قالادى.

نەگاتيۆ سيپاتقا يە جانە جۇيكە جۇيەسىن قوزدىراتىن اسەرى بار روليكتەردى كورۋدەن ءوزىڭىزدى شەكتەڭىز. كۇيزەلىس پەن جۇيكە توزۋىنان وسىلاي اۋلاق بولا الاسىز.. 

وسىنداي قاراپايىم جاتتىعۋلاردى ورىنداپ جۇرسەڭىز، كومپيۋتەر سەنىمدى سەرىگىڭىزگە جانە كومەكشىڭىزگە اينالادى، ال باستىسى –دەنساۋلىعىڭىزعا زيان كەلتىرمەيدى.

---