InfoHub Logo

نەگە بولسا دا قىزعانشاق ءبىر كىسىنىڭ ۇيىنە ءبىر جولاۋشى كەلىپ قونىپتى. قىزعانشاق جولاۋشىدان كوزىن الماي: «الدەنە قىلىپ جۇرگەن ادام» دەگەن ويمەن تاڭ اتىپ، ۇيىنەن كەتكەنشە اڭدۋمەن بولىپتى. كەتەر مەزگىلىندە جولاۋشى جوتەلىپ قالعانىندا قىزعانشاقتىڭ ايەلى دە جوتەلىپ قالىپتى. ودان جولاۋشى تۇشكىرىپ قالعانىندا، ايەلى ادەيى كەلىسكەندەي تۇشكىرىپ جىبەرىپتى.

جولاۋشى كەتكەن سوڭ قىزعانشاق ايەلىنە:

— ە... سەنىڭ بۇل جولاۋشىمەن ءبىر شاتاسىڭ بار ەكەن عوي. ايتپەسە تەگىننەن- تەگىن ول جوتەلسە جوتەلىپ، تۇشكىرسە تۇشكىرىپ جۇمباقتاسقاندارىڭ جاي ەمەس. مەن بۇل قورلىقتى كورگەنشە قاڭعىرىپ ولەيىن، — دەپ ايەلىن تاستاپ، قاڭعىرىپ وتىرىپ ءبىر ەلگە قونىپتى.

جولدا تىماۋ ءتيىپ، قونعان ۇيىندە جوتەلىپ قالعانىندا، ءۇي يەسىنىڭ دە ايەلى جوتەلىپ جىبەرىپتى، ودان ەندى تۇشكىرىپ جىبەرگەنىندە، ادەيى اڭدىپ وتىرعانداي ايەلى دە تۇشكىرىپ قالىپتى. «بۇل قالاي» دەپ تاڭدانعان قىزعانشاق بايقاپ وتىرسا، ءوزى سىقىلدى ايەل دە تىماۋراتىپ وتىر ەكەن. سودان دەرەۋ ايەلىنىڭ سول كۇنى تىماۋمەن اۋىرعانى ەسىنە ءتۇسىپ «مەن ايەلىمدى بوستان بوس قىزعانعان ەكەنمىن عوي» دەگەن وي اقىل-ەسىنە كىرىپ، ايەلىنە قايتىپ كەلىپ، قىزعانشاقتىعىن قويۋعا انت بەرگەن ەكەن.

---