قىزىق جۇمىس
مەن استە جالقاۋ ەمەسپىن. ءبىراق كەيدە ۇلكەندەر قايداعى ءبىر ءىش پىستىراتىن جۇمىستاردى تاپسىرادى دا، ورىنداماساڭ جالقاۋ دەپ بوستان بوس كىنالايدى. شىركىن، جۇمىستىڭ ءبارى مىنانداي بولسا: قار كۇرەپ جاتقاندا اياق استىنان بالمۇزداق جاۋسا، ال سۋ تاسىعان كەزدە كەنەتتەن شۇمەكتەن ليموناد اتقىلاسا. مىنە، كەرەمەت دەپ وسىنى ايت! مۇنداي مۇمكىندىك تۋسا، تاڭ اتقاننان كۇن باتقانشا ەرىنبەي جالىقپاي جۇمىس ىستەۋگە بارمىن عوي. وندا جەر بەتىندە جالقاۋ بالا قالماس ەدى. ءبارىنىڭ دە ءتامپىش تاناۋلارى تەرلەپ-تەپشىپ، جۇزدەرى الاۋلاپ جۇمىس ىستەپ جۇرگەنىن كورەر ەدىڭ.
سەندەرگە قۇپيالاپ ايتايىن. مەن قىزىعىپ ىستەيتىن ءبىر جۇمىس بار. ول — ءسۇتتىڭ قايماعىن ايىراتىن سەپاراتور ماشيناسىنىڭ ىدىستارىن جۋۋ. اپام الا سيىردى ساۋىپ، شەلەك تولى ءسۇتتى كوتەرىپ جازعى سەنەككە كىرگەننەن باستاپ مەنەن دەگبىر كەتە باستايدى. الگى ءسۇت تارتاتىن ماشينانىڭ جانعا جايلى ىزىڭىن تىڭداپ، ويىندى ۇمىتىپ، سول ارادان شىقپايمىن. قايتا-قايتا انامنىڭ قاسىنا بارىپ: «جۇمىستى اياقتاپ قالدىڭىز با؟» — دەپ، مازاسىن الامىن. «سونشا تاعاتىڭ تاۋسىلعانى نە، ءسۇتتى قۇيعانىم جاڭا عانا ەمەس پە؟ — دەيدى ول كىسى كۇلىپ. — ويناپ كەلسەيشى. سول ۋاقىتتا دايىن بولىپ قالادى». ءبىراق ويىنعا كەتە قويمايمىن. ويتكەنى ىدىستاردى مەنەن بۇرىن اپكەم جۋىپ قويۋى مۇمكىن عوي. ول بۇل ءىستىڭ قۇپياسىن ءبىر ءبىلىپ السا، «قىزىق جۇمىستان» ايىرىلدىم دەي بەر.سوندىقتان دا مەن ەشقايدا كەتپەي، اۋلادا اينالسوقتاپ جۇرەمىن دە قويامىن. مۇندايدا ۋاقىت دەگەن وتپەيدى عوي. زارىقتىرىپ بارىپ اپامنىڭ: «بولدىم»، — دەگەن داۋىسى ەستىلەدى.
جالما جان ماشينانىڭ ءسۇت جۇرەتىن، اجەمنىڭ كيمەشەگىنىڭ سالدەسى سياقتى داعاراداي ىدىستارىن بولشەكتەپ تاستايمىن دا، ىدىسقا جۇققان قايماقتى سۇق ساۋساعىممەن جالايمىن كەلىپ. قايماقتىڭ تاتتىلىگى سونداي، ساۋساعىمدى قوسا جۇتىپ قويا جازدايمىن. ابدەن جالاپ-جۇقتاپ بولعان كەزدە ىدىستى جۋماساڭ دا بولاتىن دەرلىكتەي جارقىراپ تۇرادى. ءبىراق سوعان قاراماي-اق سۋمەن ءبىر شايىپ قويامىن. «مەنىڭ ەركەتايىم سونداي ەڭبەكقور»، — دەپ شەشەم دە شىن سۇيسىنەدى. مىنە، كوردىڭىز بە، مەن اسا ەڭبەكقور بالامىن. تەك قىزىقتى جۇمىستار بولسا بولدى.
You Might Also Like
-
— سەن وتىرىك ايتىپ تۇرسىڭ، جاقسى بالا سويتە مە ەكەن،— دەدى ءىنىم كوزىمە كوزىن قاداپ تۇرىپ.
-
ءبىر كۇنى قاناتقا شوپان اعاسى تاۋدان سۇيكىمدى قارا كۇشىك اكەلىپ بەردى. بۇعان قانات قانا ەمەس، ونىمەن بىرگە وقيتىن تالعات تا، بولات تا قۋاندى. ۇشەۋى كۇشىكتىڭ قۇلاعىنان كەزەك-كەزەك تارتىپ كورىپ ەدى، ا...
