InfoHub Logo

ءبىر كۇنى قاناتقا شوپان اعاسى تاۋدان سۇيكىمدى قارا كۇشىك اكەلىپ بەردى. بۇعان قانات قانا ەمەس، ونىمەن بىرگە وقيتىن تالعات تا، بولات تا قۋاندى. ۇشەۋى كۇشىكتىڭ قۇلاعىنان كەزەك-كەزەك تارتىپ كورىپ ەدى، اناۋ ىرىلداپ ايبات شەكتى. قاباعان ەكەن دەپ قۋانىپ قالدى ولار. كۇشىككە مويناق دەگەن ات قويىلدى. بالالار مويناققا ءسۇت ىشكىزىپ، الدىنا نان تاستاپ الەككە ءتۇستى. العاشىندا ول بۇلاردان جاسقانىپ، ءسۇت تە ىشپەي قويىپ ەدى، كەلە-كەلە ءوزى قىڭسىلاپ سۇرايتىندى شىعاردى.

ارينە، ءوز كۇشىگىڭ بولماعان سوڭ قىزىق ەمەس. باسقا بالالار ەشقاشان قاناتتىڭ كۇشىگىن تالعاتتىكى نەمەسە بولاتتىكى دەپ ايتپايدى. ەندەشە قىزىعى، مويناق سياقتى كۇشىك اسىراپ، وعان كينوداعىداي كوكسەرەك، الىپسوق دەگەن سياقتى مىقتى يتتەردىڭ اتىن قويۋ كەرەك. تالعات وسىلاي ويلادى. ۇيىنە بارعان سوڭ اكە-شەشەسىنە قاناتتىكى سياقتى كۇشىك تاۋىپ بەرىڭدەر دەپ الەك سالدى.

كەلەسى كۇنى اكەسى وعان دا كۇشىك اكەلىپ بەردى. تالعات وعان الىپسوق دەپ ات قويدى.

مۇنان كەيىن بولات تا كۇشىك اسىرادى.

ايتسە دە، تالعاتتىڭ الىپسوعى دا، بولاتتىڭ تايماسى دا قاناتتىڭ مويناعىنداي مىقتى بولىپ شىقپادى. تالعاتتىڭ الىپسوعى قۇلاعىنان كوتەرسەڭ، قىڭسىلاپ قويا بەرەدى. ءبىر تاياقتى لاقتىرىپ جىبەرىپ، «اكەل» دەپ قولىڭدى سوزساڭ، ول بۇل بۇيرىقتى مويناقتاي ءمىنسىز ورىنداي المايدى. يىسكەپ-يىسكەپ، جەيتىن نارسە ەمەس ەكەن دەگەندەي قايتىپ كەلەدى. ال قاناتتىڭ كۇشىگى اۋپىلدەپ ءۇرىپ، بالالاردىڭ سوڭىنان قۋاتىندى شىعارعان.

ءبىر كۇنى قىزىق بولسىن دەپ، قانات پەن تالعات كۇشىكتەرىن تالاستىردى. ارينە، ولار ۇلكەن يتتەردەي ءبىرىن-بىرى اياماي تىستەپ، قاتتى جۇلىسقان جوق. مويناق الىپسوقتى باس سالىپ قۇلاعىنان تىستەسە، ول مىڭق ەتپەيدى.

بالالار تالعاتتى كۇشىگىڭ جامان دەپ مازاقتادى. وعان تالعات ىزا بولدى. مويناقتان ءوش الۋدى ويلادى. اۋلانىڭ ورتاسىندا ەركىنسىپ شاۋىپ جۇرگەن قارا كۇشىكتى ۇستاپ الىپ، توعاننىڭ سۋىنا اپارىپ لاقتىرىپ جىبەردى. قارا كۇشىك جاعاعا شىعۋعا قانشا تالپىنسا دا، اعىنى قاتتى سۋ ەرىك بەرمەي الا جونەلدى. مويناقتىڭ ماڭدايىنىڭ اعى بىرەسە كورىنىپ، بىرەسە كورىنبەي ۇزاپ بارا جاتتى. قولىنا ۇزىن تاياقتى ۇستاي سالا، ىلە تالعات كومەككە ۇمتىلعان. ءبىراق جەتىپ ۇلگەرمەدى.

ەرتەڭىنە تالعات قاناتتىڭ ۇيىنە باردى.

بالالار ءبىر نارسەگە ۇيمەلەپ قالىپتى. ول نە دەپ موينىن سوزىپ قاراسا، كەشەگى توعاننىڭ سۋىق سۋى ءوتىپ كەتسە كەرەك، ورتادا مويناق سۇلەسوق جاتىر. بۇلاردان كومەك سۇراعانداي، قىڭسىلاپ قويادى. ءۇنى سونداي ايانىشتى. قانات الدىنا بىرەسە ءسۇت قويىپ، بىرەسە نان ءجىبىتىپ سالىپ، اۋرەگە تۇسسە دە، قارا كۇشىكتە وعان قارايتىن دارمەن جوق-تى. ول ءتىپتى ءوزى اندا-ساندا ءتىسى اۋىرعاندا باساتىن «انالگين» دەگەن ءدارىنى كۇشىككە ىشكىزبەكشى دە بولدى. «وسىنى ىشسەڭ قۇلان-تازا ايىعىپ كەتەسىڭ» دەپ ەدى، مويناق قانشا اقىلدى بولسا دا، مۇنى تۇسىنبەدى. ۋاقىت وتكەن سايىن قىڭسىلاۋى جيىلەي ءتۇستى. كەنەت:

— مويناق جىلاپ جاتىر، قاراڭدارشى، — دەپ، بولات ايقايلاپ جىبەردى.

شىنىندا دا، مويناق جىلاپ جاتىر ەدى. مۇنى كورگەندە، مانادان بەرى كۇشىگىن اياپ قينالعان قانات: «مويناق، مويناق»،— دەپ، ەڭىرەپ قويا بەردى. تالعات ءتىپتى بۇلاي بولار دەپ ويلاماعان. ول مويناقتى دا، قاناتتى دا اياپ كەتتى. سودان كەيىن ءوزى دە شىداماي جىلاپ جىبەردى.

---