InfoHub Logo

قوجا احمەت ياساۋي جولىنىڭ كۇن ساناپ كۇشەيىپ بارا جاتقانىن يسلام الەمىنىڭ باسقا ايماقتارىنداعى ءدىندارلار حاباردار بولادى. ولار ياساۋي جولىنىڭ دۇرىستىعىنا كۇمان كەلتىرىپ، قالاي دا ونىڭ جولىنا توسقاۋىل قويۋدى ويلاستىرا باستايدا. سولاردىڭ ءبىرى — قوراسان ەلىنەن شىققان اتاقتى عۇلاما بابا ماشىن ەدى. ول ءوزىنىڭ مىقتى دەگەن ءتورت ءجۇز شاكىرتى مەن ياسى قالاسىنا قوجا احمەتتى ىزدەپ كەلەدى. ياسىعا
كەلگەن سوڭ، قوجا احمەتكە جولىعىپ:

— ەلدى ءبۇلدىرىپ، جولدان شىعارىپ جۇرگەن جاسىل شاپاندى سەنبىسىڭ؟ — دەپ دۇرسە قويا بەرەدى. ياساۋي اتا شاكىرتتەرىنە:

— بۇل سويلەگەن كەزىندە ەسىنەن اداسادى، نە ايتىپ جاتقانىن ءوزى ۇقپايدى. سوندىكتان بۇنى ۇستاپ، ۇستىنعا بايلاڭدار! — دەپ بۇيىرادى.

شاكىرتتەرى ۇستاپ، بايلاعان سوڭ، ونىڭ دەنەسىن جالاڭاشتاپ دۇرە سوعۋعا بۇيىرادى. العاشقى قىرىق دۇرە سوققاندا بابا ماشىن بىلق ەتپەي، اللا اتىن اۋزىنا ءبىر رەت تە المايدى. ونى ءبىراز ۋاقىت دەمالدىرىپ، تاعى دا قىرىق دۇرە سوعادى. وسى كەزدە عانا بابا ماشىننىڭ قۇلىنداي شىڭعىرىپ، «اللا!» دەگەن جان داۋسى شىعادى. ياساۋي اتا دۇرە سوعۋدى توقتاتۋعا بۇيىرادى. مۇنى كورىپ تۇرعان حاسان حان ياساۋي اتادان:

— ءبىرىنشى رەت دۇرە سوققاندا، ول ءبىر رەت تە اللانىڭ اتىن ەسىنە المادى. قىرىق دۇرەنى ەكىنشى رەت سوققاندا «اللا!» دەپ شىڭعىرعان جان داۋىسى شىقتى. بۇنىڭ سەبەبى نەدە؟ — دەپ سۇرادى.

ياساۋي:

— ونىڭ ارقاسىنا جىن-پەرىلەر جابىسىپ الىپ، العاشقى قىرىق دۇرەنى وتكىزبەدى. سول سەبەپتى العاشىندا وعان دۇرە باتپاي، اللا اتىن جاد ەتپەدى. سوڭعى قىرىق دۇرە بابا ماشىننىڭ ارقاسىنا ءتيىپ ەدى. سوندىقتان ونىڭ جان داۋىسى شىقتى، — دەدى.

ودان كەيىن ياساۋي اتا ەسىن جيعان بابا ماشىنعا قاراپ:

— ءوزىڭنىڭ قايدان ەكەنىڭدى ءبىلدىڭ بە؟ — دەپ سۇرادى. ول كوز جاسى كول بولىپ، ادەپسىزدىگى ءۇشىن ياساۋيدەن كەشىرىم سۇراپ، تاۋبەسىنە كەلدى. اتانىڭ شاكىرتى بولدى. ءۇش رەت قىلۋەتكە ءتۇسىپ، ءياساۋيدىڭ سۇيىكتى شاكىرتتەرىنىڭ بىرىنە اينالادى.

---