InfoHub Logo

ءبىر پاتشا تەڭىز ساياحاتىنا ەڭ جاقىن قىزمەتشىسىن دە ەرتىپ شىعادى. كەمەگە ومىرىندە ءبىرىنشى رەت مىنگەن قىزمەتشىسى «مەن تەڭىزدەن قورقامىن، مەنى كەرى قايتارىڭدار!» دەپ ايقايلاي باستايدى. كەمەدەگىلەر «قوي، ايقايلاما، پاتشانىڭ مازاسىن الما! كەمەگە مىنگەننەن كىم ءولىپتى؟!» دەپ قانشا ەسكەرتسە دە، قىزمەتشى توقتاماي ايقايلاي بەرەدى. ەشكىم ونى تىنىشتاندىرا المايدى.

كەمەدەگى ءبىر اقساقال پاتشاعا حابار جىبەرىپ، «مەن ونى قالاي ساباسىنا ءتۇسىرۋ كەرەكتىگىن بىلەمىن» دەيدى. ءسويتىپ، اقساقال قىزمەتشىنى اڭگىمەگە تارتپاق بولادى. قىزمەتشى بولسا، بايبالامىن ودان سايىن ۇدەتە باستاعانىندا اقساقال ونى يتەرىپ تەڭىزگە قۇلاتادى. سۋعا تۇسكەن قىزمەتشى: «ويباي، ءولىپ بارا جاتىرمىن! باتىپ بارامىن!» دەپ توقتاماي ايقايلاي بەرەدى. «ول نەتكەنىڭىز، ءولىپ كەتەدى عوي!» دەپ شىرىلداعان ادامدارعا اقساقال: «ۋايىمداماڭدار، ولمەيدى. ءبىراز قينالسىن» دەپ جاۋاپ بەرەدى. ءبىراز ۋاقىتتان سوڭ شارشاعان قىزمەتشىنىڭ ايقايلاۋعا دا شاماسى قالمايدى. وسى كەزدە اقساقال «ال، ەندى شىعارىڭدار» دەيدى. قىزمەتشىنى كەمەگە كوتەرىپ، كيىمدەرىن اۋىستىرادى. قىزمەتشى ءبىر بۇرىشتا ۇندەمەي وتىرادى. ادامدار جانىنا بارىپ: «باعانا قاتتى ايقايلاپ جاتقان ەدىڭ عوي، ءقازىر نە بولدى ساعان؟» دەپ سۇرايدى. قىزمەتشى تەڭىزدى كورسەتىپ: «ايقايلاسام مەنى تاعى انا جاققا لاقتىرادى» دەپ جاۋاپ بەرەدى. باسىندا كەمەدە اماندىقتا بولۋدىڭ راحاتىن ۇمىتىپ ايقايلاپ جاتقان ەدى، ەندى سول نيعمەتتىڭ ءقادىرىن ءتۇسىندى. سادي شيرازي حازرەتتەرى وسى وقيعانى ايتىپ بەرگەننەن كەيىن: «بەتەردىڭ دە بەتەرى بولادى، قولداعى بار كەتپەي تۇرىپ ءقادىرىن ءبىلۋ كەرەك» دەگەن. سوندىقتان، ودان دا بەتەرىنە دۋشار بولماي تۇرىپ، جاعدايىمىزعا شۇكىر ەتەيىك. سۇيىكتى پايعامبارىمىز دا بىلاي دەگەن:

«بەس نارسە كەلمەي تۇرىپ، بەس نارسەنىڭ ءقادىرىن بىلىڭدەر:

1) كارىلىك كەلمەي تۇرىپ جاستىق شاقتىڭ،

2) اۋرۋ كەلمەي تۇرىپ دەنساۋلىقتىڭ،

3) جۇمىسباستىلىق كەلمەي تۇرىپ بوس ۋاقىتتىڭ،

4) كەدەيلىك كەلمەي تۇرىپ بايلىقتىڭ،

5) ءولىم كەلمەي تۇرىپ ءومىردىڭ ءقادىرىن بىلىڭدەر!»

---