InfoHub Logo

ت. جۇرگەنوۆ اتىنداعى قازاق ۇلتتىق ونەر اكادەمياسىندا ءساۋىر ايىنىڭ 24ء-شى جۇلدىزىندا اشىلعان «سەزىنۋ ءتاسىلى» دەپ اتالاتىن 2ء-شى كۋرس وپەراتورلانىنىڭ فوتوكورمەسىنەن العان اسەر نەگىزىندە.

 «قولدار ءتىل قاتادى»

ت. جۇرگەنوۆ اتىنداعى قازاق ۇلتتىق ونەر اكادەمياسى «كينو جانە تۆ» فاكۋلتەتىنىڭ 2 كۋرس ستۋدەنتى - مويسەيەۆا كاميلانىڭ «قولدار ءتىل قاتادى» دەپ اتالاتىن فوتوسۋرەتتەر توپتاماسىنان العان اسەرىم تاماشا. سونشالىقتى جۇرەگى سەزىمتال كىپ-كىشكەنتاي قىزدىڭ تۋىندىلارىن كورىپ، ول قوزعاعان اۋقىمدى تاقىرىپتاردى وي ەلەگىنەن وتكىزبەۋ ونەردەن الىس ادامنىڭ وزىنە قيىن بولارى ءسوزسىز. ءبىراق شىعارمانى وقۋدا اركىمنىڭ ءوز دەڭگەيىندە ساراپتايتىندىعىن ەسكەرسەك، اۆتوردىڭ جەكە ويىن ەستۋ مەن ءۇشىن قاجەت دۇنيە بولدى. ەرىكسىز كاميلاعا سۇراقتار قويدىم. العان جاۋابىم دا تىم سالماقتى بولدى...

مويسەيەۆا كاميلا: بىردە مەنەن: «نەگە فوتوكورمەن قولدار تاقىرىبىنا ارنالعان؟»، دەپ سۇراق قويدى ءبىر جان. مەن ويلانباستان «بۇل مەنىڭ جانىما جاقىن دەنە مۇشەم»، دەپ جاۋاپ قاتتىم. مەنىڭ بەرگەن جاۋابىمنىڭ اياسى تار ەكەندىگىن ءىشىم سەزدى. 

ال ەندى بۇل سۇراققا بەرەر جاۋابىمدى تولىقتىرار بولسام، مەنىڭ ايتارىم كوپ.  «قولدار» ادام ءومىرىنىڭ اينىماس بولشەگىنە اينالعان. ولار سازدان قۇمىرا جاساپ، ادەمى قۇمىرانى مايدا بولشەكتەرگە شاعا الادى. دەمەك، جاقسىنى دا، جاماندى دا قولدارىمىزبەن ىسكە اسىرامىز، تەك پيعىلعا بايلانىستى ءبارى. 

زاعيپتار ءۇشىن قولدار - كوز، مىلقاۋلار ءۇشىن قولدار - ءتىل. «كوزدى ادام جانىنىڭ ايناسى» دەي تۇرىپ، قولدار دا ادام تۋرالى كوپ اقپارات بەرەتىندىگىن  ۇمىتپايمىز.

بۇل فوتوكورمەدە قولدار ءتىل قاتادى. ولار مەنىڭ باستى كەيىپكەرلەرىم. مەن اكتەرلارعا قوياتىن تالاپتى قولدارعا قويدىم.  ەسەسىنە ولار ماعان دۇنەتانىمىمدا، مەنىڭ سانامدا ساقتالعان وبرازدار مەن قيالىمدى جەتكىزۋگە جاردەم بەردى. سونداي-اق، «اركىمنىڭ ءوز باقىتى - ءوز قولىندا»، «بولاشاقتى بۇگىن جاسايمىز» دەگەن ۇستانىمداردى فوتوسۋرەتتەردە  سويلەتكىم كەلدى. سەبەبى مەن وعان كامىل سەنەمىن. ال ءسىز؟..

مەنىڭ وي تولعاۋىم

ون سەگىز مىڭ الەمدى جاراتقان اللا تاعالانىڭ سانالى ق ۇلى ادامزاتتىڭ تىرشىلىكتىك قاعيدالارى ۇقساس بولعانمەن، ولاردىڭ ساۋساق تاڭبالارى ەش ۋاقىتتا قايتالانبايدى. ساۋساق تەرىسىن قانشا رەت سىپىرساڭ دا، تەرىسى قايتا قالپىنا كەلگەندە، بۇرىنعى ساۋساق پەن الاقان سىزىقتارى قاز قالپىنا وزگەرىسسىز كەلەدى ەكەن. سوندىقتان دا، الاقان مەن ساۋساق تاڭبالارىن ادامنىڭ وزىندىك كودتىق تاڭباسى دەپ تانىپ، دۇنيەجۇزىندە قىلمىسكەرلەردى تەك قانا وسى تاڭبالى بەلگى ارقىلى انىقتايدى.

ەجەلگى تاسقا قاشالىپ جازىلعان قولدىڭ تاڭبالارى دا، سوناۋ كوڭە زامانداردان حابار بەرەدى بىزگە اتا-بابالارىمىزدان. ەرتەدەگى ادامدار تەك XIX عاسىردا عانا بىزگە ءمالىم بولعان سىردى سوناۋ ىقىلىم زامانداردا قايدان ءبىلدى ەكەن دەپ ويعا كەتەسىن ەرىكسىز.

الاقانداعى سىزاتتار مەن ايرىقشا بەلگىلەردى زەرتتەيتىن ەرەكشە سالا حيرومانتيا دا وسى نەگىزدە. كوشە كەزىپ، الاقان سيپاپ جۇرگەن سىعان حالقى دا ءوز ناپاحاسىن وسى سالانى تۇرمىس تىرشىلىگىنە اينالدىرعاندىعىنان سىنايلى.

ادام قولىنىڭ ءپىشىنى ونىڭ شىعۋ تەگى، جاسايتىن جۇمىسى، الەۋمەتتىك جاعدايى مەن قىزىعۋشىلىعىنان حابار بەرەتىندىگى تاعى بار. جىلى جەردە تۇرىپ، جاقسى مەن پايدالىنى جەپ، اۋىر جۇمىس ىستەمەگەن قولداردى، جەر تىرمالاپ، سۋىق سۋدان شىقپاعان قولدان ايىرۋ قيىن دۇنيە ەمەس. ال كىشكەنتاي بالانىڭ ۇزىن ساۋساقتارىنا قاراپ، «وسى بالا مۋزىكانت بولادى»، «ءمۇسىنشى بولادى»، «سپورتسمەن بولادى» دەپ بولاشاققا بولجام جاساۋدى دا كۇندەلىكتى ومىردە ءجيى كەزدەستىرەمىز.

مەديسينادا دا ەڭ لاس دەنە مۇشەلەرىنىڭ ءبىرى دەپ وسى قولدى اتايدى. بالالار اراسىنداعى اۋرۋلاردىڭ تەڭ جارتىسى اۋا ارقىلى جۇعاتىن بولسا، قالعان جارتىسى وسى قول ارقىلى جۇعاتىندىعىن اتايدى دارىگەرلەر. ەسى كىرە قويماعان بالالارعا قاراپايىم گيگيەنانى ۇستاۋدىڭ قيىن بولۋىنىڭ ارقاسىندا دەپ تۇسىندىرەدى ولار بۇنىڭ سەبەبىن.

ءدىنىمىز بەن سالتىمىزدا قول جۋۋعا ەرەكشە ءمان بەرگەن. ءتىپتى كيىز ءۇيدىڭ كىرە بەرىسىنە قۇمعان مەن شىلاپشىندى قويىپ قويۋ ءۇردىسى دە بولعان. دارەت الۋدا دا قولدى شىنتاققا دەيىن جۋۋعا ەرەكشە ءمان بەرىلەدى. رەتى مەن سانى دا ماڭىزدى. ال دۇعا، تىلەك ايتىلعاندا بەت سيپاپ، قۇران وقىعاندا الاقان جايۋ، نامازعا جىعىلعانداعى قولدىڭ قوزعالىسى تىم ۇلكەن اڭگىمە. ول تۋرالى پىكىرلەر مەن ءسوزتالاستار قانشاما؟..

اسەل ءسالىم

---