InfoHub Logo

انىقتاۋ تاسىلدەرى. سۇيەك ىسىكتەرىن انىقتاۋ اۋرۋدىڭ تاريحىنا مۇكيات زەر سالىپ، تىڭداۋدان، زاقىمدانعان سۇيەك ايماعىن كوزبەن قاراپ، ساۋساقپەن سيپاۋدان باستالادى. كوزبەن قاراعاندا ىسىك ايماعىندا دۇمپيگەن ىسىنۋشىلىك، تەرى بەتىنىڭ قىزارا جىلتىرلانۋى، تەرى استىنداعى كوكتامىرلاردىڭ كەڭەيە بىلەۋلەنۋى بايقالادى. سيپاپ جانە باسىپ قاراعاندا ىسىنگەن جەر تىعىز، قاتتى، سىرتقى بەتكەيى بۇدىر، ىعىسپالى، قوزعالىسسىز بولادى. اتاپ ايتقاندا، سۇيەك وبىرىنا كۇدىك تۋعىزاتىن مىناداي بەلگىلەر كەزدەسەدى:

- ىسىكتىك ايماقتا ۇنەمى بايقالاتىن جانە بىردەن-بىر ۇدەمەلى باعىتتا دامىعان اۋىرسىنۋ سەزىمى. بۇل بەلگى، جاراقاتسىز دا نەمەسە جاراقاتتان كەيىن بىركاتار مەزگىل (4-5 ايداي) وتكەننەن كەيىن پايدا بولۋى مۇمكىن؛

-  سۇيەكتەن شىققان قوزعالمايتىن ىسىك؛

-  اياق-قولداعى جىلىك سۇيەكتەرىندەگى ىسىك ورنالاسقان تۇستا بۋىن قوزعالىسىنىڭ تۇراقتى تەجەلۋى؛

-  ىسىك ايماعىنىڭ بىركەلكى نەمەسە اسسيمەتريالىق تۇردەگى سىرتقى كورىنىسى.

سۇيەك ىسىكتەرىن انىقتاۋدا رەنتگەنولوگيالىق بەلگىلەرى الۋان ءتۇرلى. اتاپ ايتقاندا، ولار:

- ىسىك ايماعىنداعى سۇيەكتىڭ نەگىزگى قالپى مەن سىرتقى ءپىشىنىنىڭ جانە مولشەرىنىڭ وزگەرۋى؛

- سۇيەكتىڭ سىرتقى بەتكەيىنىڭ بۇزىلىپ، ياعني قىرتىستى قاباتتان سۇيەك اجىراپ، پاتولوگيالىق سۇيەك ءتۇزۋشى پەريوستيتتەردىڭ (ينەلى پەريوستيت، ءۇشبۇرىشتى كۇنقاعار) پايدا بولۋى؛

- سۇيەك تىنىندەگى پاتولوگيالىق وزگەرىستەر:

ا)      سۇيەك باعانالارىنىڭ بۇزىلۋى؛

ءا)       سۇيەك تىنىندەگى سۇيەكتىڭ ەرىپ ىدىراۋى (وستەوليزدىك) جانە سۇيەكتىڭ بەرىشتەنۋى (وستەورسكلەروزدىق) وزگەرىستەر؛

ب)      ىسىكتىڭ سۇيەك اينالاسىنداعى جۇمساق تىندەرگە تارالىپ، جالپى ىسىك كۇرىلىمىندا شاشىراندى قىشالىق وشاقتىڭ پايدا بولۋى.

ىسىك قۇرىلىمىندا پاتولوگيالىق سۇيەك تۇزۋشىلىك تەك قانا وستەوگەندىك ءتۇبىرى بار قاتەرلى ىسىكتەردە بايقالادى. ولار سۇيەك قابىنان ىسىك قالىبىنا كاراي تارايتىن قان تامىرلارىن قۋالاي ءتۇزىلىپ، شاشىراندى تۇردە تارايدى. بۇل بەلگىنى ينەلى پەريوستيت دەپ اتايدى.

سۇيەك وبىرىنا ءتان بەلگىلەردىڭ قاتارىنا پەريوستالدىق رەاكسيا جاتادى. ول سۇيەك قابىنىڭ قىرتىستى قاباتتان ءسۇيىر بۇرىش ءتارىزدى بولىپ اجىراپ، كۇنقاعار نەمەسە تەپكى بەلگىسىنىڭ (كادمان ءۇشبۇرىشى) پايدا بولۋى وستەوگەندىك ساركوماعا، ال ىسىكتىڭ سىرتقى بەتكەيىن قۋالاي تاراعان كوپ قاباتتى قىشالانعان تەپكىلىك يۋينگ ساركوماسىنا ءتان. جالپى سۇيەك قاتەرلى ىسىكتەرىن بىر-بىرىنەن اجىراتۋدا ولاردىڭ جىلىكتى سۇيەكتەردە ءجيى ورنالاساتىن جەرىن ءبىلۋدىڭ ماڭىزى وتە زور. مىسالى، وستەوگەندىك ساركوما جىلىكتىڭ مەتافيزىندە، يۋينگ ساركوماسى ديافيزدە، حوندروساركوما ەپيفيزدە ءجيى ءوربيدى، ءبىراق ولار بۋىندىق شەمىرشەكتى بۇزىپ، ودان وتپەيدى. سۇيەك قاتەرلى ىسىكتەرىنىڭ ىشىندەگى ءجيى تاراعان تۇرىنە وستەوگەندىك ساركوما جاتادى. ول تەز وسەدى، سۇيەك ءتىنىن ينفيلتراسيالاپ، قۇرىلىمىن بۇزادى. سوندىقتان وستەوگەندىك ساركوماعا ءتان رەنتگەنولوگيالىق بەلگىلەردى دالدەپ سيپاتتاي كەتكەن ءجون. رەنتگەنولوگيالىق تۇرعىدان وستەوگەندىك ساركوما ءۇش تۇرگە بولىنەدى (وستەوليتيكالىق، وستەوبلاستيكالىق، ارالاس ءتىندى).

وستەوليتيكالىق ءتۇرىنىڭ باستاپقى دامۋ ساتىسىندا سۇيەك تىنىندە بوركەمىكتىك (وستەوپوروزدىق) وزگەرىس بايقالادى. ول ءبىرقالىپتى سۇيەك باعاندارىنىڭ ازايۋىمەن سيپاتتالادى. كەيىن ول جەردە سىرتقى ءپىشىنى انىق ەمەس، اينالاسى بەرىشتەنبەگەن، بىركەلكى اقاۋلانعان دەسترۋكسيالىق (بۇزىلىس) وشاعى تۇزىلەدى. كەيدە وسىنداي بىر-بىرىمەن بىرىككەن دەسترۋكسيالىق وشاقتار سۇيەك تىنىمەن ارالاسىپ، جينالعان ءۇيىندى نەمەسە تارتپا ءتارىزدى بولىپ كورىنەدى. دەسترۋكسيالىق وشاقتىڭ شەتكى بەتكەيىندە پەريستالدى «كۇنقاعار» بەلگىسى بايقالادى. اتالمىش دەسترۋكسيالىق وشاق گەماتوگەندىك وستەوميەليتتەن سەكۆەستردىڭ جوقتىعى ارقىلى اجىراتىلادى.

وستەوبلاستيكالىق نەمەسە سكلەروزداۋشى تۇرىندە دەسترۋكسيالىق وزگەرىس باستاپقىدا انىق ءپىشىنسىز قاتايۋ وشاقتارى پايدا بولۋىمەن سيپاتتالادى. كەيىن ۇدەرىستىڭ ءورشۋ كەزىندە ىسىك جىلىك مايى كانالىن تولىق تولتىرادى، قىرتىستى قاباتتى قامتي وتىرىپ، سۇيەكتى بارلىق جاعىنان قورشاپ، ءبىرىڭعاي تىعىز كونگلومەرات تۇزەدى. ىسىك كۇرامىندا ءارتۇرلى دەڭگەيدەگى پاتولوگيالىق سۇيەك ءتۇزۋشى ۇدەرىستەر مەن پوليمورفتىق كالسيناتتار، ياعني كولدەنەڭ ينەلى پەريوستيت پەن ىسىكتىڭ قىشالانۋى انىق بايقالادى. سۇيەك قابىنىڭ قىرتىستى قاباتتان اجىراۋى سەبەبىنەن ءۇشبۇرىشتى قالىڭداعان كۇنقاعار بەلگىسى پايدا بولادى. ءسويتىپ ىسىككە شالدىققان سۇيەك بەرىشتەنىپ، دۇرىس ەمەس پىشىندە تىعىزدالادى. ارالاس تۇرىندە ءارتۇرلى سۇيەك اقاۋلارىمەن بىرگە قىرتىستى قاباتتىڭ دەسترۋكسياسى، سۇيەك قابىنىڭ اجىراۋى، جىرتىلۋى، كولدەنەڭ ينەلى پەريوستيت، كۇنقاعار نەمەسە تەپكى بەلگىلەر كەزدەسەدى.

حوندروساركومادا سۇيەكتىڭ قىرتىستى قاباتىنىڭ كەيبىر جەرى بىركەلكى ەمەس جۇقارىپ، كەي جەرى ءبىرقالىپتى قالىڭدايدى، بەرىشتەنۋ ۇدەرىسىنىڭ اۋقىمدىلىعىنان ىسىككە شالدىققان سۇيەك جۋاندايدى، ىسىنگەن ءتىن ءبىرقالىپسىز قىشالانادى.

فيبروساركومادا ىسىك ۇدەرىسى جۇمساق دانەكەر تىندەردەن داميتىن بولعاندىقتان، ىسىك سۇيەكتىڭ ۇزىنا بويىنا قابى مەن ۇىرتىستى قابىنا جابىسىپ، ولاردى جاراقاتتايدى، ءبىراق ينەلى پەريوستيت تۇزىلمەيدى، ىسىكتىڭ سىرتكى ءپىشىنى انىق، سىرتقى كورىنىسى بۇلدىر. سۇيەك ميىنان داميتىن قاتەرلى ىسىكتەردىڭ ىشىندە ميەلومانىڭ رەنتگەنولوگيالىق كورىنىسى وقشاۋلاۋ بولادى. ول نەگىزىندە جالپاق جانە قىسقا سۇيەكتەردى (جامباس، قابىرعا، باس سۇيەگى، ومىرتقا) زاقىمدايدى. ميەلوما اۋرۋىندا الدىمەن سۇيەكتەر شاشىراندى بوركەمىك تۇرىندە دەسترۋكسيالانادى. كەيىن سۇيەكتەگى ىسىكتىك اقاۋلار كەيدە دوڭەلەك ءپىشىندى ومارتاداعى ارانىڭ ۇياسىنا، كەيدە كۇيە جەگەن كيىزگە ۇقساعان وستەوليزدىك دەسترۋكسياعا ۇقسايدى، ءبىراق پەريستالدىق رەاكسيا ونشا انىق بايقالمايدى.

سۇيەك قاتەرلى ىسىكتەرى وستەوميەليتتەن، سۇيەك تۋبەركۋلەزىنەن، فيبروزدىق ديسپلازيالاردان جانە قاتەرسىز ىسىكتەردەن كلينيكالىق جانە رەنتگەنولوگيالىق تاسىلدەر ارقىلى اجىراتىلادى.

وستەوميەليتتە قابىنۋ ۇدەرىسى سۇيەك ميىنان باستالىپ، گاۆەرس كانالى ارقىلى سۇيەك تىنىندەرىنە جانە قابىنا تارايدى. پايدا بولۋ سەبەپتەرىنە بايلانىستى وستەوميەليت گەماتوگەندىك جانە جاراقاتتىق بولىپ ەكىگە بولىنەدى.

ءجىتى وستەوميەليت كەنەتتەن ناۋقاستىڭ دەنە قىزۋىنىڭ كوتەرىلۋىمەن، تامىر سوعۋىنىڭ جيىلەنۋىمەن، باستىڭ جانە زاقىمدانعان سۇيەكتىڭ اۋرۋىمەن، قان قۇرامىنداعى نەيتروفيلدىك لەيكوسيتوزبەن، ەريتروسيتتەردىڭ شەگۋ جىلدامدىعىنىڭ جوعارىلاۋىمەن باستالادى. ناۋقاستىڭ كلينيكالىق بەلگىلەرىنىڭ ايقىندىعىنا قاراماستان باستاپقى كەزدە سۇيەكتە وستەوميەليتكە ءتان رەنتگەندىك بەلگىلەر بايقالا قويمايدى. تەك قانا ءبىر جۇماداي مەرزىمنەن كەيىن سۇيەك تىنىندە بوركەمىكتىك وزگەرىس پەن سۇيەكتىك دەسترۋكسيا وشاقتارى پايدا بولا باستايدى. قابىنۋدىڭ سالدارىنان جينالعان ەكسسۋدات سۇيەك قابىن قىرتىستى قاباتتان اجىراتادى. سۇيەك قابى تەسپە ءتارىزدى تارامدالىپ، شاشاقتى پەريوستيت، قىرتىستى قاباتتىڭ بەتى بۇدىرلانادى، سۇيەك قابى قىشالانادى. كەيىن دەسترۋكسيالىق وشاقتار بىر-بىرىمەن قوسىلىپ ىرىلەنەدى. سۇيەك ءتىنى جارىقشاكتالىنىپ ولەتتەنەدى، ءسويتىپ ءىرىڭ ارالاس سەكۆەستر پايدا بولادى. قابىنۋ ۇدەرىسى باستالعاندا جىلىك مايى كانالى تارىلادى، كەۋەكتى جانە قىرتىستى قاباتتار، شاشاقتالعان سۇيەك قابى بىر-بىرىنە ءسىڭىپ بەرىشتەنەدى. كەيدە قابىنۋ وشاعىنان جىلانكوز ءتۇزىلۋى مۇمكىن. وستەوميەليتتەگى پاتولوگيالىق وزگەرىستەر كومپيۋتەرلىك توموگرافيا ءتاسىلى ارقىلى تولىق انىقتالادى.

وكپەدەگى نەمەسە ىشەكتەگى تۋبەركۋلەزدىك ۇدەرىستەردەن قان اركىلى كوح تاياقشاسى سۇيەك ميىنا ءتۇسىپ سپەسيفيكالىق وستەوميەليتتى وربىتەدى. الدىمەن سۇيەك ميىندا تۋبەركۋلەزدىك گرانۋلوما نەمەسە سپەسيفيكالىق تۇبىرشىكتەنىپ قابىنۋ وشاعى تۇزىلەدى، ونىڭ اسەرىنەن سۇيەك باعانالارى بۇزىلادى. كوبىنە جىلىكتى سۇيەكتىڭ ەپيفيزىندە ورنالاسادى.

سۇيەكتىڭ كەيبىر قاتەرلى ىسىكتەرى (اسىرەسە ميەلوما اۋرۋى) ومىرتقادا ءوربيدى. سوندىقتان ومىرتقاارالىق شەمىرشەك بۇزىلىپ تارىلادى، ومىرتقا تىندەرى بوركەمىكتەنەدى، سپەسيفيكالىق قابىنۋدىڭ سالدارىنان پايدا بولعان كازەوزدىق (ىرىمشەكتەنگەن) سوقتا ومىرتقالار باعاناسىنىڭ ەكى جاعىن قۋالاي تارايدى، ونى ىركىلگەن ءىرىڭ دەپ اتايدى. اتالمىش بەلگىلەر رەنتگەنوگراممادا ايقىن بايقالادى. سۇيەك قاتەرلى ىسىكتەرىن دەفورماسيالاۋشى وستەوديستروفيادان نەمەسە پەدجەت اۋرۋىنان اجىراتۋدىڭ دا ماڭىزى زور. بۇل اۋرۋعا جىلىكتى سۇيەكتىڭ قالىپتان تىس جۋانداپ دەفورماسيالانۋى، ونىڭ قىرتىستى قاباتىنىڭ تارامدالۋى، سۇيەك ميى كانالىنىڭ ءارتۇرلى باعىتتا تۋىنداعان سۇيەك باعانالارىمەن بىتەلۋى جاتادى.

وستەوما، فيبروما، حوندروما، گەمانگيوما سۇيەكتىڭ قاتەرسىز ىسىكتەرى بولىپ تابىلادى. ولاردىڭ سۇيەكتىڭ قاتەرلى ىسىكتەرىنەن ايىرماشىلىعى باياۋ دامۋىندا، ىسىكتىك اقاۋدىڭ سىرتكى ءپىشىنىنىڭ انىقتىعىندا، ىشكى قۇرىلىمىنىڭ بىرتەكتىلىگىندە. ىسىك سۇيەكتى بۇزبايدى، تەك قانا ونىڭ ىشكى قۇرامىن وزگەرتەدى.

ەمدەۋ تاسىلدەرى. سۇيەك وبىرلارى ءارتۇرلى تىندەردىڭ پايدا بولۋىنا، مورفولوگيالىق قۇرىلىمىنىڭ الۋان تۇرلىلىگىنە بايلانىستى، ولارعا قولدانىلاتىن ەم تاسىلدەرى دە ءارالۋان. مىسالى، وستەوگەندىك ساركوما، حوندروساركوما، فيبروساركومالاردىڭ جەكەلەنىپ قولدانىلعان ساۋلەلىك، حيميوتەراپيالىق ەم تاسىلدەرىنە سەزىمتالدىعى وتە تومەن، ال يۋينگ ساركوماسى، رەتۋكيلوساركوما، ليمفوساركومالاردىڭ اتالمىش ەم تۇرلەرىنە سەزىمتالدىعى ايتارلىقتاي جوعارى. جەكە قولدانىلعان حيرۋرگيالىق ەمنىڭ دە شيپالىلىعى ەتە تومەن. مىسالى، وستەوگەندىك ساركومامەن جاسالعان تۇبەگەيلى وتالاردان كەيىن 12-18 اي وتپەي-اق ناۋقاستاردىڭ وكپەسىندە ىسىكتىڭ مەتاستازدارى پايدا بولادى. مىنە، اتالمىش سەبەپتەرگە بايلانىستى قازىرگى كەزدە سۇيەك قاتەرلى ىسىكتەرىن ارالاس تاسىلدەرمەن ەمدەۋ ارقىلى ەلەۋلى ناتيجەلەرگە قول جەتكىزىلدى.

رەسەيدىڭ ماسكەۋدەگى ونكولوگيالىق عىلىمي ورتالىعىنىڭ وستەوگەندىك ساركوما مەن يۋينگ ساركوماسىنا قارسى قولداناتىن ەمىنىڭ تيىمدىلىگى جوعارى بولعان.

وستەوگەندىك ساركومانى ەمدەۋ ءۇشىن مىناداي ۇلگى قولدانىلادى:

I كەزەڭدە – وتا الدىندا تومەندەگى كورسەتىلگەن ءۇش حيميو-پرەپاراتتتىڭ تەك قانا بىرەۋى ءوز تارتىبىمەن قولدانىلادى. ولار:

ا) ادرياميسين 30 مگ/م² اڭعاق (ارتەريا) تامىرى اركىلى 1، 2، 3 كۇندەردە، ياعني ءۇش رەت، ودان كەيىن 3-4 جۇما ۇزىلىستەن كەيىن تاعى دا ەم ءادىسى 3-4 رەت قايتالانادى.

ءا) سيسپلاتين 150 مگ/م² اڭعاق تامىرى ارقىلى ءبىر مارتە 3 ساعات ارالىعىندا ينفۋزيالىق ادىسپەن قولدانىلادى. وسىنداي دارىلىك ەم 3-4 جۇما ۇزىلىستەن كەيىن 5-6 رەت قايتالانادى.

ب) مەتوترەكسات 7-10 مگ/م² كوكتامىر ارقىلى، ەكى جۇمالىق ۇزىلىستەن كەيىن تاعى ەكى رەت قايتالانادى. مەتوترەكسات مولشەرىنىڭ وتە كوپ بولۋىنا بايلانىستى، ونىڭ ۋىتتىق اسقىنۋ ۇدەرىسىن بولدىرماۋ ءۇشىن مىندەتتى تۇردە لەيكوۆورين ءدارىسى پايدالانىلادى. لەيكوۆوريننىڭ مولشەرى 15 مگ/م² ، ونى سۋعا ارالاستىرىپ 6،12،18،24 ساعات ارالىعىندا ىشەدى.

II كەزەڭ – حيموتەراپيالىق ەم اياقتالعاننان 19-20 تاۋلىك وتكەننەن كەيىن وتا جاسالادى. ەگەر ىسىك سۇيەك اۋماعىنان شىعىپ جۇمساق تىندەرگە كوپ تاراماسا، وندا اياق نەمەسە قولدى ساقتاپ قالۋ ءۇشىن سۇيەكتىڭ ىسىككە شالدىققان بولىگىن نەمەسە ىسىككە ىرگەلەس ورنالاسقان بۋىن اۋماعىن قوسا رەزەكسيالاپ كەسىپ الىنعان سۇيەك پەن بۋىنداردىڭ ورنىنا جاساندى ەندروپروتەز ەنگىزىلەدى. ەگەر ىسىكتىك ۇدەرىس سۇيەك اينالاسىنداعى جۇمساق تىندەرگە كەڭ تاراپ، ماگيسترالدىق قان تامىرلارى مەن نەرۆتەرگە جابىسسا، ىسىكپەن زاقىمدالعان اياققا نەمەسە قولعا امپۋتاسيا، ءتىپتى ەكزوارتيكۋلياسيا جاسالىنادى.

III كەزەڭ – وتادان كەيىن 3-4 جۇماداي مەزگىل وتكەننەن كەيىن 5-6 رەت پوليحيميوتەراپيا جۇرگىزىلەدى. پوليحيميوتەراپيانى مىناداي ۇلگىمەن پايدالانۋ ءتيىمدى:

-        سيكلوفوسفان 40 مگ/م² كوكتامىر ارقىلى – 1ء-شى كۇنى؛

-        ادرياميسين 40 مگ/ م² كوكتامىر ارقىلى – 1ء-شى كۇنى؛

-        سيسپلاتين 30 مگ/ م² كوكتامىر ارقىلى – 1،2،3 كۇندەرى. وسىنداي ۇلگىمەن ەمدى 3 جۇماداي ۇزىلىستەن كەيىن 5-6 رەت قايتالايدى.

يۋينگ ساركوماسىنا كارسى قولدانىلاتىن نەگىزگى ەم – ساۋلەلىك جانە حيميوتەراپيالىق تاسىلدەر. ول مىناداي ۇلگىمەن جاسالادى:

I        كەزەڭ – كلاسسيكالىق فراكسيالاۋ تاسىلىمەن 5-6 جۇما ارالىعىندا ساۋلەلىك ەم جۇرگىزىلەدى. ونىڭ ىسىك وشاعىنداعى مولشەرى 50-60 گرەي.

II       كەزەڭ – ەكى جىل مەرزىم ارالىعىندا 6 سيكل پوليحيميوتەراپيا جۇرگىزىلەدى، ونىڭ العاشكى 4 سيكلى ءبىرىنشى جىل ىشىندە ءۇش ايلىق ۇزىلىسپەن، ال قالعان ەكى سيكلى ەكىنشى جىلى 6 ايلىق ۇزىلىسپەن قولدانىلادى. ءاربىر سيكل مىناداي ۇلگىدە وتكىزىلەدى:

-        ادرياميسين 20 مگ/ م² كوكتامىر ارقىلى 1،8،15 كۇندەرى؛

-        ۆينكريستين 0،75 مگ/ م² كوكتامىر ارقىلى 1،8،15 كۇندەرى؛

-        سيكلوفوسفان 250-300 مگ/ م² بۇلشىك ەت ارقىلى 1،3،5 كۇندەرى.

يۋينگ ساركوماسىنا حيرۋرگيالىق ءتاسىل سيرەك قولدانىلادى. ونى تەك قانا پايدالانعان ساۋلەلىك جانە حيميوتەراپيالىق ەمدەردىڭ ىسىكتىك ۇدەرىسكە ايتارلىقتاي اسەرى بولماعاندا جانە ەم جۇرگىزىلۋى بارىسىندا ءارتۇرلى كۇردەلى اسقىنۋلار (ىسىكتىڭ ىدىراۋى، قانسىراۋى، ت.ب.) پايدا بولىپ، ءارى قاراي جوسپارلانعان ەمدى جالعاستىرۋعا مۇمكىندىك بولماعان جاعدايدا الدىمەن 2-3 سيكل پوليحيميوتەراپيا (3 جۇماداي ۇزىلىسپەن) جۇرگىزىلىپ، ودان كەيىن ىسىككە شالدىققان سۇيەكتى حيرۋرگيالىق تاسىلمەن رەزەكسيالاپ، كەسىپ الىنعان سۇيەكتىڭ ورنىنا ەندوپروتەز قويىلادى. وتادان كەيىن ءاربىر ءۇش جۇمالىق ۇزىلىسپەن جوعارىدا كورسەتىلگەن ۇلگىمەن 6 سيكل پوليحيميوتەراپيا جۇرگىزۋ دە ءتيىمدى ەم قاتارىنا جاتادى.

سۇيەك وبىرلارىن حيرۋرگيالىق تاسىلمەن ەمدەۋ بارىسىندا مىنا قاعيدالاردى ساقتاۋ كەرەك:

*وتانىڭ تۇبەگەيلى سيپاتىن ساقتاي وتىرىپ، ونىڭ ادام ومىرىنە تيگىزەتىن ءقاۋپىن مەيلىنشە ازايتۋ؛

*وتا ابلاستيكالىق ءۇردىستىڭ ساقتالۋى جاعدايىندا جاسالۋى ءتيىس؛

*مۇمكىندىگى بولعانىنشا ىسىككە شالدىققان اياق-قولدى ساقتاپ، ونىڭ قالىپتى قىزمەتىن مەيلىنشە وزگەرتپەۋگە تىرىسۋ كەرەك.

ساۋلەلىك جانە حيميوتەراپيالىق ەم تاسىلدەرىنە سەزىمتالدىعى وتە ناشار ىسىكتەر (حوندروساركوما، فيبروساركوما، وستەوبلاستوكلاستوما) حيرۋرگيالىق تاسىلمەن ەمدەلەدى. سۇيەكتىڭ قاتەرسىز ىسىكتەرىنە تەك قانا حيرۋرگيالىق ەم قولدانىلادى.

س. سادىقوۆ،
م. سادىقوۆ

---