قوزعان قورانىڭ سوزىنەن
ارعى زاتى، رۋى — قوزعان، ونىڭ ىشىندە وراز دەيتىن تاپتان شىققان قورا دەيتىن وتە ناشار، كەدەي ادام بولىپتى. بىلايشا ايتقاندا قورانىڭ مىنەرگە اتى، ىشەرگە اسى بولماپتى. اتسىز بولعاندىقتان، وگىزگە ءمىنىپ ەل ارالايدى ەكەن. ءبىراق قورا ءوزى كەدەي، ناشار بولسا داعى ەل ىشىندە پىسىقشا ءتىلدى، شەشەن، وتكىر ادام ەكەن دەيدى.
ءبىر كۇنى قورا وگىزگە ءمىنىپ، كادىمگى اتاقتى ءتانتى دەگەن ءبيدىڭ اۋلىنا كەلگەن ەكەن. سوندا ءتانتى ايتقان ەكەن:
— ەي، قورام، سەنىڭ مۇنىڭ قالاي؟ سەنىڭ كەلگەنىڭ جاقسى. ەل امان، جۇرت تىنىشتا وگىزگە ءمىنىپ جۇرگەنىڭ قالاي؟ رۋلى ەل قوزعاننان، ونىڭ ىشىندە ورازدان، راقىم مەن تۇياقتان سەنى كوتەرەتىن جىلقىنىڭ ءبىر تايى تابىلمادى ما؟ — دەگەن ەكەن.
سوندا قورا تۇرىپ ايتقان ەكەن دەيدى.
— قاراعىم، ءتانتى، سەن بي بولساڭ دا، مىرزا بولساڭ دا، ءوزىڭ ەسىڭ. مەن سەنىڭ جانە انالاردىڭ ەشقايسىسىنان قىستاپ ات سۇرامادىم. ءبىراق رۋلى ەل ورازدى وسى استىمداعى الا وگىزبەن بىرنەشە رەت ارالاپ اينالىپ شىقتىم. ونىڭ ىشىندە ءوزىڭ ايتقان راقىمنىڭ اۋلىنا دا باردىم. يتتەرى قامالاپ، ۇزەڭگىمنەن الدى، ولاي بولسا داعى مەنى بۇلاردىڭ ەشقايسىلارى كوزىن سالىپ كورمەدى. كۇنىم تۋسا، ءبىر كەزدە كورەرمىن دەپ وگىزىمدى سانعا ءبىر سالىپ، جۇرە بەرگەن كۇنىم بولدى، — دەپتى.
سوندا ءتانتى بي ايتقان ەكەن:
— قورام، سەنىڭ ءسوزىڭ ءوتتى. ەندى وسى وگىزبەن قايدا بارا جاتىرسىڭ؟ — دەپتى.
سوندا قورا ايتقان ەكەن:
— ءبىر جەردە ەكى تىرناعىم قالىپ ەدى، سول تىرناعىمدى ىزدەپ بارامىن، — دەپتى. قورانىڭ بۇل سوزىنە ءتانتىنىڭ قاسىندا وتىرعان كەيبىر ادامدار تۇسىنبەي، بىر-بىرىنە قاراي بەرگەن ەكەن دەيدى. ءبىراق ءتانتى قورانىڭ بۇل جۇمباق ءسوزىن قاتتى ءتۇسىنىپتى. سەبەبى، قورانىڭ بۇل ءسوزى قاراكەسەككە بەرگەن ءبىر قىزى بولعان ەكەن. ول قىزى سول بەرگەن جەرىندە قايتىس بولىپ، سول قىزىنان ەكى جيەن جاس بالا بار ەكەن. سونى كورىپ قايتۋعا ىزدەپ بارامىن دەگەن ءسوزى ەكەن.
سوندا قوراعا ءتانتى ايتقان ەكەن:
— قورام، ەردى نامىس ولتىرەدى، قوياندى قامىس ولتىرەدى. استىڭداعى وگىزىڭدى تاستاپ، ورنىنا بىزدەن ءبىر ات ءمىنىپ كەتىڭىز. اتاسى باسقا جات ەلگە بارا جاتىرسىڭ عوي، — دەپ قورانىڭ وگىزىن الىپ قالىپ، ءتانتى جىلقىسىنان ءبىر ات الدىرىپ، قوراعا مىنگىزىپ جىبەرگەن ەكەن دەيدى.
سونىمەن قورا قاراكەسەككە بارىپ باعاناعى تىرناعىم دەگەن جيەندەرىن كوزىمەن كورىپ، امانداسىپ قايتقان ەكەن دەيدى.
You Might Also Like
-
اقمولا قالاسىنىڭ توڭىرەگىندەگى كەرەي رۋلارىنىڭ ءبىر اۋلىندا اۋقاتتى بىرەۋدىڭ كەمپىرى كەنەت قايتىس بولادى. اۋىل ادامدارى اياۋلى بايبىشەنى تازا ارۋلاپ، تەرەڭ جەرلەۋگە كىرىسەدى.
-
شاتا[نىڭ تۋعان جەرى] قازىرگى پاۆلودار وبلىسى، بايان اۋدانى، رۋى — ايدابول. شاتانىڭ شىن اتى جالماعامبەت ەكەن. اكەسىنىڭ اتى — دۇرىلدەك دەگەن ادام. شاتانىڭ اكەسى جاسىندا ءولىپ قالىپ، شەشەسى ...
