قۇرمەتتى توي يەسى!
تۋعان كۇن يەسى پەرزەنتىنىڭ تىلەگى
قىمباتتى اكە!
ءسىز ءقازىر 80 جاستىق ءومىر اسۋىنىڭ بيىگىنە كوتەرىلىپ، ءبىز ءۇشىن بۇرىنعىدان دا اسقاقتاي، بۇرىنعىدان دا مارتەبەلى بولا تۇسكەندەي كورىندىڭىز. ءسىز وسىناۋ ءجۇرىپ وتكەن ۇلاعاتتى جولىڭىزدا پەرزەنتتەرىڭىز بەن جاقىندارىڭىز ءۇشىن ءاردايىم دا تاربيە مەكتەبى بولا الدىڭىز. ءبىز ءسىزدىڭ ونەگەلى ىستەرىڭىزدەن جارقىن ساۋلە، اكەلىك جۇرەگىڭىزدەن جىلى مەيىرىم سەزىنىپ ەر جەتتىك. ءتالىمى كوپ ىستەرىڭىزدەن ۇلگى الا وتىرىپ، ءسىزدىڭ اسقار تاۋداي بولمىسىڭىزعا ەلىكتەپ وستىك.
ءسىزدى پەرزەنتتىك جۇرەكپەن جاقسى كوردىك. ەندى، مىنە، 80 جاسقا تولىپ وتىرعان ساتىڭىزدە دە وسىناۋ اكە كوڭىلدەن دارىعان مەيىرىم مەن تالىم-تاربيەنى ەسكە ءتۇسىرىپ، ءبىزدىڭ ءوزىمىز دە وز-وزىمىزگە قايتا ءبىر ەسەپ بەرگەندەي كۇي كەشتىك. اتا-انا الدىنداعى پارىزىمىز بەن قارىزىمىز ۇشان-تەڭىز ەكەنىن سەزىنگەندەي بولدىق. اتا مەن انانىڭ ەڭبەگى ءۇشىن ولاردىڭ ءوز پەرزەنتتەرى قانداي قۇرمەت كورسەتسە دە ارتىق ەمەس ەكەن.
اكە!
80 جاس مەرەيتويىڭىز قۇتتى بولسىن! ءار ۋاقىتتا قاجىماي-تالماي ءوز ورتاڭىزدىڭ قادىرمەندى اقساقالى، ءوز پەرزەنتتەرىڭىزدىڭ ايبىندى اقىلشىسى بولىپ جۇرە بەرىڭىز!
ءبىز ءسىزدى ماقتان تۇتامىز، اكە!
ىزگى تىلەكپەن: ۇلىڭىز (قىزىڭىز).
*** *** ***
ۇجىم يەسىنىڭ ءسوزى
قۇرمەتتى________
ءسىز بۇگىنگى كۇندە ارتىڭىزعا ءماندى دە، ماعىنالى ءىز قالدىرىپ، 80 جاستىڭ ساليقالى بيىگىنە كوتەرىلىپ وتىرسىز.
ءومىر ءيىرىمىنىڭ سان تاراۋ تۇستارىندا قاشاندا اكەلەر جولى ارتىنداعى وسكەلەڭ ۇرپاققا عيبراتتى عۇمىر جولى بولىپ، ولاردىڭ ارمان بيىگىنە ءتالىمدى باعىتتى نۇسقاپ وتىردى. سانداعان ۇرپاقتار وسىنداي تاعىلىمدى عۇمىر جولىمەن شىڭدالا ءتۇسىپ، الدىڭعى اعا بۋىننىڭ ءماندى دە ونەگەلى ىستەرىن باسشىلىققا الىپ ەرجەتكەن ەدى.
سان مىڭداعان ۇرپاق لەگى داڭقتى اكەلەر جولىنىڭ جارقىن تۇستارىن بويلارىنا ءسىڭىرىپ، ونى ءداستۇر جولىمەن كەيىنگى بۋىنعا تابىستاپ وتىردى.
ءومىردىڭ سان تاراۋ سوقپاقتارىندا ارتىنداعى ۇرپاققا ءىرى بولمىستى، كەسەك ىستەرىمەن كورىنە العان اكەلەر قاتارى ءاردايىم دا از بولماعانىن ەسكە الىپ، قۇرمەت تۇتساق، ءسىز وسىنداي قۇرمەتكە يە جانسىز.
حالقىمىز قاشاندا ءوزىنىڭ ۇلكەندەرىن ءقادىر تۇتا ءبىلىپ، ولارعا دەگەن سىيلاستىق پەن ءىلتيپاتىن ۇزگەن جوق. تاعىلىمدى دا قاسيەتتى ءارى قاستەرلى ىستەرىنە ساي حالىق ءوز قاريالارىن اقساقال دەپ قۇرمەتتەپ وتىرسا، مىنە، ءسىز وسىنداي ونەگەلى دە ءىلتيپاتتى اتاققا لايىقتى ءومىر جولىمەن ءجۇرىپ ءوتتىڭىز.
بۇگىنگى 80 جاسقا تولىپ وتىرعان مەرەيتوي بيىگىڭىزدە دە وسىناۋ جارقىن دا ونەگەلى ىستەرىڭىز ءوزىڭىزدى ۇلگى تۇتار كەيىنگى بۋىنعا بار بولمىسىمەن تاعى دا ءبىر جارقىراي كورىنگەندەي. 80 جاستىڭ اسقاق بيىگىنە قاريالى دا قازىنالى قالپىڭىزبەن جەتىپ وتىرعان سىزگە ءدال بۇگىنگى كۇنى قانداي دا ءبىر قۇرمەتتى لەبىزدەردى ارناسا دا ارتىق ەمەس.
قۇرمەتتى توي يەسى!
80 جاس مەرەيتويىڭىز قۇتتى بولسىن! ءوزىڭىزدىڭ جالعاسىڭىز بولىپ وتىرعان ۇرپاقتارىڭىز بەن جاقىندارىڭىزدىڭ اراسىندا ونەگەلى اقساقال، ءتالىمدى اقىلشى بولىپ امان-ەسەن جۇرە بەرىڭىز. ءسىزدىڭ ومىرلىك باي تاجىريبەڭىز بۇگىنگى جاس بۋىن ءۇشىن دە ءاردايىم قاجەتتى ءارى قاستەرلى قۇندىلىق بولا بەرمەك.
80 جاس مەرەيتويىڭىز تاعى دا قۇتتى بولسىن!
You Might Also Like
-
بۇگىنگى تاڭدا قازاق ەلى ءوز الدىنا دەربەستىگىن الىپ، رۋحتى، پاتريوت جاستارىمەن شاڭىراق كوتەرگەن تاۋەلسىز مەملەكەت. ەندى مىنە، جاس ۇرپاقتى يماندىلىققا تاربيەلەپ، بارشا ادام بالاسىن بەيبىتشىلىككە، تۋر...
-
جاقىندا كورشى ەلدىڭ پرەزيدەنتى عىلىم اكادەمياسىنا مۇشەلىككە وتكەن، شەنەۋىنىكتىك قىزمەت پەن عالىمدىقتى قاتار الىپ جۇرگەندەردى ابدەن سوگىپ، ءتىپتى اتقارۋشى بيلىكتەگى كەيبىر جوعارى لاۋازىمدى «عال...
