InfoHub Logo

سارجالا، قۇتتىعاي، شۇبار ۇشەۋى قۇرداس ەكەن، ولاردىڭ بىر-بىرىنە دەگەن سىيلاستىعى، قيماستىعى ەرەكشە بولىپتى دەپ ەل ءالى كۇنگە اڭىز ەتەدى. ۇلى وتان سوعىسىنىڭ ارداگەرى بولعان مارقۇم جۇماعالي ايتبايەۆ دەگەن اۋدانىمىزدا شەجىرەشى قارتى بولدى، ول كىسى وسى ءۇش باتىر تۋرالى كوپ بىلەتىن. سارجالا جورىقتا جۇرگەندە ەكى ۇلى، ايەلى قايتىس بولادى، ول حاباردى ۇيىنە جەتكىزبەي الدىنان شىعىپ ەستىرتۋدى قۇرداسى شۇبار باتىرعا تاپسىرادى، سالەمدى سارجالا بەرەدى ەكەن. شۇبارعا «اسسالاۋماعالايكۋم» دەپ امانداسقاندا، قۇرداسى «اتاڭنىڭ باسى» دەپتى.

«نە بولىپ قالدى» دەگەن ساۋالعا:

— نە بولسىن، اسپانىڭ اسپانعا ۇشتى، زەمبىلىڭ جەرگە ءتۇستى (اسپان، زەمبىل سارجالانىڭ قايتىس بولعان ۇلدارىنىڭ ەسىمى ەكەن)، ايەلىڭ قاسىنا جاتتى، — دەيدى. سوندا سارجالا:

— اپىر-اي، جانبايىم (ەنشىلەس ءىنىسى ەكەن) ءتىرى مە؟ — دەپ سۇرايدى، «ءتىرى» دەگەندە:

— ە، وندا بولدى، بالا-بەلدە، قاتىن-جولدا دەگەن، — دەپ اۋىر قايعىنى سىر بەرمەي كوتەرىپ جۇرە بەرىپتى-مىس.

شۇبار قۇتتىعايدىڭ نەمەرە تۋىسى، ءارى قۇرداسى، سان جورىقتارعا ەكەۋى تالاي بىرگە شىققان. قۇتتىعاي اۋىرىپ جاتقاندا اقكوڭىل، ءبىر مىنەزدى شۇبار قول جيناپ كەلىپ سار- بازدارىنا قۇتتىعاي جاتقان ءۇيدى قورشاتقىزىپ، «اجالدى كىرگىزبەڭدەر!» دەپ كۇزەتتىرىپ قويىپتى. قۇتتىعاي قايتىس بولعان سوڭ، «توعىز ۇلى بار قۇتتىعاي ولۋگە مۇمكىن ەمەس، ول ءبىزدى سىنايىن دەپ جاتىر»، — دەپ ءۇش كۇن بويى جەرلەۋگە رۇحسات بەرمەي قويىپتى. قۇتتىعايدىڭ مىڭ جارىم جىلقىسى بار ەكەن، «سونىڭ ءبارىن قۇتتىعايدىڭ قۇرماندىعىنا شالامىن» دەپ الەك سالىپتى دەگەن اڭىز بار. ءوزىنىڭ جانداي قۇرداسى، جاۋعا اتتانعان تالاي جورىقتاردا بىر-بىرىنە سۇيەۋ بولعان، ءارى جاقىن تۋىسى قۇتتىعاي قايتىس بولعاندا، سىڭارىنان ايىرىلعان شۇبار باتىر جانىن قويارعا جەر تابا الماي الاسۇرىپ كۇيىنىپ، شىعارعا جانى باسقا، قاتتى قينالسا كەرەك.

وقۋعا كەڭەس بەرەمىز:

ءجالاڭتوس باتىر

ەلشىبەك باتىر تۋرالى

بەردىقوجا (ءى نۇسقا)

---