InfoHub Logo

ەلباسى نۇرسۇلتان نازاربايەۆ ءبىلىم جانە عىلىم ءمينيسترى ەرلان ساعادييەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

كەزدەسۋ بارىسىندا مەملەكەت باسشىسىنا ءبىلىم جانە عىلىم مينيسترلىگىنىڭ 2016 جىلعى جۇمىسىنىڭ قورىتىندىلارى جونىندە ەسەپ بەرىلدى.

نۇرسۇلتان نازاربايەۆ ءبىلىم جانە عىلىم جۇيەسىنىڭ الداعى رەفورمالاردى، قازاقستان پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن ىسكە اسىرۋداعى ماڭىزدى ءرولىن اتاپ ءوتتى.

- ءبىز ەل ىشىندە دە، شەتەلدىك وقۋ ورىندارى قابىرعاسىندا دا كادرلار دايارلاۋ ءىسى بويىنشا اۋقىمدى جۇمىستار جۇرگىزدىك. ءۇش تىلدە ءبىلىم بەرۋگە، سيفرلىق وقىتۋ ادىسىنە كوشىپ جاتىرمىز. ءبىلىم جانە عىلىم مينيسترلىگى الدىندا بۇل سالانى ودان ءارى دامىتۋعا بايلانىستى زور مىندەتتەر تۇر. قاجەتتى ادام رەسۋرستارىنسىز جولداۋدا العا قويىلعان مىندەتتەردى ورىنداۋ، سونىڭ ىشىندە تەحنولوگيالىق جاڭعىرۋدى جۇزەگە اسىرۋ، «سيفرلىق قازاقستان» مەملەكەتتىك باعدارلاماسىن ىسكە اسىرۋ مۇمكىن ەمەس، - دەدى قازاقستان پرەزيدەنتى.

ە. ساعادييەۆ مەملەكەت باسشىسىنا ءبىلىم بەرۋدىڭ جاڭارتىلعان مازمۇنداعى فورماتىن ەنگىزۋگە، بەس كۇندىك وقۋ اپتاسىنا كوشۋگە، بازالىق وقۋلىقتار ازىرلەۋگە قاتىستى مينيسترلىك جۇرگىزىپ جاتقان رەفورمالار تۋرالى باياندادى.

سوڭىندا نۇرسۇلتان نازاربايەۆ ءبىلىم بەرۋ جۇيەسىندە ىسكە اسىرىلىپ جاتقان وزگەرىستەردىڭ ناتيجەلەرىن اتاپ ءوتىپ، ولاردى اقپاراتتىق تۇرعىدان قولداۋ ماسەلەلەرىنە، سونداي-اق قويىلعان مىندەتتەردىڭ ىسكە اسىرىلۋ قاجەتتىگىنە نازار اۋداردى.

كەزدەسۋ قورىتىندىسى بويىنشا ەلباسى ءبىرقاتار تاپسىرما بەردى.

---