InfoHub Logo

دۇنيەدە ادام كۇلەتىن، ادام جىلايتىن، ادام ۇيالاتىن، ادام جيىركەنەتىن، ادام لاعىنەت ايتاتىن قىلىقتار، ىس-ارەكەتتەر جاسالىپ جاتىر. بۇل ارەكەتتەردىڭ ءار جاعىندا مەيىرىمگە، ماحابباتقا، جىلىلىققا ءزارۋ ادام تۇر.

الۋ ءۇشىن بەرۋ كەرەك. بۇل - زاڭدىلىق. تەك الا بەرۋ ادامدى جالماۋىز ەتەدى. ەگوسىن عانا تويدىرا بەرگەن ادامنان قاسيەت كەتە باستايدى. سوسىن ونىڭ ورنىن ەشتەڭەمەن تولتىرا المايسىڭ. ەڭ سۇيىكتى دۇنيە دە، بيىك ورىندىق تا، ادەمى كيىم دە، اتاق تا، باسقا دا ۋاقىتشا جۇبانىش.

نەگە ادامدار تاپقان تايانعانىنا كيىم الا بەرەدى، نەگە دۇنيە جيناي بەرەدى، نەگە ۇنەمى دۇكەن ارالاپ جۇرەدى، جوق بولعاننان ەمەس، كوبى ەگوسىن قاناعاتتاندىرۋ ءۇشىن. ول قۋانىش تا ۇزاققا سوزىلماي، ءبىتىپ قالا بەرەدى. سوسىن تاعى كەرەك، كەرەك بولماسا دا كەرەك. كەيدە نەگە بۇلاي ەكەنىن ادامنىڭ ءوزى دە تۇسىنبەيدى. سەبەبى، رۋحاني الەمدەگى جىرتىق جامالماي تۇر. بوس تۇر. قۋىس الەم تەك ءوز دۇنيەسىمەن تولۋى كەرەك. ونى باسقامەن تولتىرىپ، الداي المايسىڭ. 

ادامنىڭ قولىنان ءبارى كەلسە دە، وزىنە ءالى كەلە بەرمەيتىن جاراتىلىس. ادامداردىڭ پەندەشىلىگىن بايقاعاندا، وسى جاسقا دەيىن تۇك بىتىرمەگەنىنە، ساناسىن وسىرە الماعانىنا قىنجىلاسىڭ. سەبەبى، ميدى كوپ تىڭدايدى. ەگونىڭ ايتقانىمەن جۇرەدى. جۇرەكتى، جاراتقاندى قينالعاندا عانا ەسكە الادى. ەگويزمنىڭ شىرماۋىنا ءتۇسىپ، ماتالىپ، بۋىنىپ، “ولەيىن” دەپ جاتقاندا جۇرەكتىڭ، مەيىرىمنىڭ بار ەكەنىن ەسكە الادى. جاراتقانعا جالبارىنادى. كوپ جاعدايدا ەسەگى سۋدان وتكەن سوڭ بۇرىنعى “تاز” قالپىنا قايتا تۇسەدى. مۇنداي شەڭبەردەن شىعۋ ءۇشىن سانانى وياتۋ كەرەك، جۇرەكتىڭ كوزىن اشۋ قاجەت. قاسيەتتەرگە ورالۋ كەرەك. قۇلدىقتان بوساپ، تىنىستى اشۋ قاجەت. 

ءوزىن جاقسى كورمەگەن ادام بار جاۋاپكەرشىلىكتى وزگەنىڭ موينىنا ىلگەندى جاقسى كورەدى. قۇداي جاۋاپتى، تاعدىر جاۋاپتى، باسقا ادامدار، تەك ءسىز ەمەس. حاۋا انانى ازعىرعان جىلان جاۋاپتى. جاۋاپكەرشىلىكتى وزگەگە ءىلۋ دەگەن ۇلكەن جاۋاپسىزدىق. جاۋاپكەرشىلىكتەن قاشۋ ادامنىڭ جەكە تۇلعا بولىپ قالىپتاسۋىنا كەرەعار اسەر ەتەدى. ادام جاۋاپكەرشىلىككە ءوزىن جاقسى كورە بىلگەن كەزدە كەلەدى. ءار ادام ءوز جاۋاپكەرشىلىگىنە قۋانىپ، سوعان ساي ءومىر سۇرەدى. جاۋاپكەرشىلىكتى وزگەگە ارتۋ ۋاقىت جوعالتۋ. ەركىندىگىڭدى ۇرلاتۋ. وزگەنىڭ تاۋەلدىلىگىنە ءتۇسۋ. جاۋاپتى بولۋ ادامعا قۋات-كۇش سىيلايدى. ادامنىڭ تامىرىن تەرەڭگە تارتۋعا مۇمكىندىك بەرەدى. جاۋاپكەرشىلىكتى الۋدىڭ قاينار بۇلاعى ءوزىڭدى جاقسى كورۋدەن باستالادى.

سانانىڭ ەڭ بيىگىنە جەتكەن ادام - ءوزىن جەڭگەن جان. مىقتى ادام دەپ سونى ايتادى. قالعان جەتىستىك دەپ جۇرگەنىمىز - ءبارىنىڭ قولىنان كەلەتىن دۇنيە.

---