InfoHub Logo

ءبىر اۋىلدا جاسى توقساننان اسقان ءبىر قاريا بولىپتى. اۋىل ادامدارى بۇل قاريانى ءقادىر تۇتىپ، ۇنەمى الدىنا بارىپ امان- سالەم جاساپ، اماندىق سۇراپ تۇرادى ەكەن.

ءبىر جولى اۋىل اعالارى بارىپ كوڭىلىن سۇراپ:

— اقساقال، حال-جايىڭىز قالاي؟ — دەگەندە، توسەگىندە جانتايىپ جاتقان ول باسىن كوتەرىپ:

— ە، قارعالارىم-اي،
كارىلىك كەلىپ قالدى كەزىمەنەن،
قارايدى كەلىن جامان كوزىمەنەن.
قولىنداعى كوسەۋمەن ۇرماسا دا،
ۇرعانداي بوپ كەتەدى سوزىمەنەن، — دەپتى دە، توسەگىنىڭ ىرگەسىندە سۇيەۋلى تۇرعان دومبىراسىن الىپ:

— جاستىقتىڭ جالىنى قايتقان، كارىلىكتىڭ قارىمى باتقان، سارعايىپ سارى بەلدە وتىرعانىم. ال تىڭداڭدار، — دەپتى دە دومبىراسىنان ءبىر ءتۇرلى مۇڭلى، كۇمبىرلى كۇي توگىپتى. سونان «سارى بەل» اتتى كۇي تاراپتى.

بۇل كۇيدى كەي بىلەتىندەر وتارباي دۇيسەكە ۇلىنىڭ قارتايعاندا شىعارعان كۇيى دەسەدى.

---